Kroniku u sha Uhar 16:1-14
16 Ken inyom i sha 36 i Asa tema tor la, Baasha+ tor u Iserael kôndo u za nôngon ityav a Yuda, maa gba va maan Rama*+ sha er or môm nana de duen shin nyôron hen* Asa tor u Yuda ga yô.+
2 Nahan Asa due a azurufa man zanaria mba ve lu ken ayou a koson akaainjaa a ken iyou i Yehova+ man a ken iyou i tor* la, tindi a mi hen Ben-hada tor u Shiria,+ u lu ken Damaseku la, kaa ér:
3 “Ikyuryan ngi hen atô wam a we, man hen atô u terem a teru. Nenge, m ngu tindin we a azurufa man zanaria. Yô, va va vihi ikyuryan you a Baasha tor u Iserael, sha er una due ken tar wam kera yô.”
4 Ben-hada ungwa kwagh u Tor Asa ôr la, nahan a tindi ukurmbautyaav mba akumautya a na za ta ityav sha agar a Iserael, ve ngohol Iyon+ man Dan+ man Abelmaim kua ajiir a koson akaa a ken agar a Nafetali cii.+
5 Baasha ongo kwagh ne yô, fese je a de u maan Rama,* a de tom u a lu eren la.
6 Tor Asa maa za a ior mba ken Yuda cii, ve za kura awen man ikyon i Rama,+ i Baasha lu maan kwagh a mi la,+ a gema awen man ikyon la a maa* Geba+ man Misepa a mi.+
7 Hen shighe la, Hanani+ ornengen akaa a ken hemen la va hen Asa tor u Yuda, va kaa a na ér: “Ka er u suur sha tor u Shiria, u suur i lu sha Yehova Aôndo wou ga ve, u hembe ikyumutya i tor u Shiria ityav ga ye.+
8 Mbaetiopia man Mbalibia lu a ikyumutya i vesen i i lu a akekeautya man mbahendananyinya kpishi gaa? Kpa er yange u suur sha Yehova yô, a na ve sha ikyev you.+
9 Gadia ashe a Yehova nga jingen shin tar cii,+ sha er una tese agee a na sha ci u mba ishima ve i lu sha a na jighilii* la yô.+ U er kwagh sha ibume sha ikyaa ne; nahan hii hegen je, a lu nôngon ityav a we.”+
10 Nahan kpa ishima vihi Asa a ornengen akaa a ken hemen la, nahan a kende un ken purusu* sha ci u ishima vihi un a na sha kwagh u ôr la pev. Shi hen shighe shon môm, Asa lu nzughul a mbagen ken ior mbara.
11 Akaa a ken yiase i Asa, ken mhii zan zan mkur, i nger ken Takeda u Ator a Yuda man a Iserael.+
12 Ken inyom i sha 39 i Asa tema tor la, angev kôr Asa shin angahar zan zan va vihi un iyol kpishi; er gba angev nahan je kpa, a ker iwasen hen Yehova ga, a gema a ker iwasen hen mbatwerev.
13 Tsô Asa kpe, i ii un vea uter nav;+ a kpe ken inyom i sha 41 i hementor na la.
14 Nahan ve ii un ken uwar u icivirigh u time ken Gar u Davidi+ sha ci na la, ve gbir un sha gambe u i haa mkurem ma balsam kpishi, kua mkurem ma human doon atô kposo kposo ma i nungwa yô.+ Heela tseegh ga, ve nande zegeusu u vesen hen ku na sha ci na.*
Ngeren mba shin kpe
^ Shin “maan Rama kasen; hiden maan Rama.”
^ Shin “duen shin nyôron hen haregh u.”
^ Shin “ya u tor.”
^ Shin “maan Rama kasen; hiden maan Rama.”
^ Shin “maa Gaba man Misepa kase; hide maa Geba man Misepa.”
^ Shin “mba ve civir un a ishima ve cii.”
^ Zwa Heberu, “iyou i agbe.”
^ Ikyav tese ér lu Asa yange i nande ga, kpa lu akaahumandoon i nande ye.
