Kroniku u sha Uhar 33:1-25
33 Manase+ lu anyom 12 shighe u hingir tor la, a hemen anyom 55 ken Yerusalem.+
2 A er kwaghbo sha ishigh ki Yehova, lu dondon aeren a ndôhôrshima a akuraior a Yehova zenda a sha ishigh ki ior i Iserael kera la.+
3 A hide a maa ajiir a taven a ter na Hesekia hembe kera la,+ a er atse a nan nagh sha ci u ieev mbi Baal, shi a tim mtôm ma akombom ma sha ikyon,* shi a gure akum a sha cii inya, a civir a.+
4 Shi a maa atse a nan nagh ken iyou i Yehova,+ i Yehova yange kaa ér: “Iti yam ia lu ken Yerusalem gbem la.”+
5 Shi a maa atse a nan nagh sha ci u akum a sha cii, hen ityembe i ihiar i iyou i Yehova la.+
6 Shi a er ônov nav mba nomso kar ken usu,+ shin Pev u Wan u Hinom;+ lu eren ahir,+ kpehen ishor shi sôron akombo, shi ver mbalamen a ujijingi mba mbakpenev man mbatsenganpasenakaa.+ A er kwaghbo u vesen sha ishigh ki Yehova, a vihi un ishima.
7 A ver eev mbu gban a gba mbu a er la ken iyou i Aôndo u mimi,+ i Aôndo ôr kwagh u i a Davidi man wan na Solomon ér: “Me ver iti yam ia lu gbem sha won ken iyou ne, man ken Yerusalem, u m tsough un ken uipyaven mba Iserael cii la.+
8 Shi mayange me kar a angahar a Mbaiserael ken tar u m na uter vev la kera ga, aluer ve kundu ishima mba eren akaa a m kaa ve la cii yô, ka Tindi jimin cii man akaawan man atindiakaa a i na sha ikyev i Mose je la.”
9 Manase za hemen u hemen Yuda man ior mba ken Yerusalem u eren kwaghbo, a na ve hemba eren kwagh u vihin a akuraior a Yehova tim a sha ishigh ki Mbaiserael la.+
10 Yehova za hemen u lamen a Manase man ior nav, kpa ve kegh ato ga.+
11 Tsô Yehova va a ukurmbautyaav mba tor u Ashiria va ta ityav sha a ve, nahan ve kôr Manase sha utsue,* ve kange un sha mshirim ma togula mhar, ve tôô un ve yem a mi ken Babilon.
12 Er lu yan ican la, a zamber a Yehova Aôndo na ér a zungwe un mhôônom,* shi a za hemen u hiden a iyol na ijime tsung sha ishigh ki Aôndo u uter nav.
13 A za hemen u eren msen hen Aôndo, nahan er a zamber yô, Aôndo ungwa msen u a er ér i zungwe un mhôônom la. Tsô Aôndo hide a na ken Yerusalem, va ver un sha ikyônough nagh ki torough.+ Maa Manase mase fan er Yehova a lu Aôndo u mimi yô.+
14 Shighe kar yô, a maa kpekpe ugen ken won u Gar u Davidi+ hen Gihon,+ vegher u shin ityôtar shin pev* zan zan nyôr hen Hunda u Ishu,+ ningir kar za nyôr Ofel;+ a maa kpekpe la tav geng. Heela tseegh ga, a ver ukurmbautyaav ken agar a Yuda a lun a ugir mba taver cii.
15 Maa a kura mbaaôndo mba akuraior man eev mbu akombo, a due a mi ken iyou i Yehova kera,+ kua atse a nan nagh a a maa sha uwo u iyou i Yehova+ man ken Yerusalem la cii, a za haa ken won u gar.
16 Shi a sôr atse a Yehova,+ maa a gba nan iniav mbi bem+ man iniav mbi ishughun+ sha mi, shi a kaa a Yuda ér a civir Yehova Aôndo u Iserael.
17 Nahan kpa, ior lu nan iniav sha ajiir a taven her, kpa lu hen Yehova Aôndo ve tseegh.
18 Akaa agen ken yiase i Manase cii, msen u a er hen Aôndo na, kua akaaôron a mbanengen mbampase ôr un ken iti i Yehova Aôndo u Iserael la, i nger ken yiase i utor mba Iserael.
19 Shi msen na,+ man er i ungwa zamber na la man asorabo a na man ihyembeato na cii,+ man uharegh mba a maa ajiir a taven sha, shi a tim mtôm ma akombom ma sha ikyon*+ kua ieev mbi gban a gba, mbi a er cii ve a hide a iyol ijime la, i nger a ken akaaôron a ior mba nengen un mbampase.
20 Tsô Manase kpe, i ii un vea uter nav, i ii un hen ya na; maa wan na Amon kar tema tor sha ityough nagh.+
21 Amon+ lu anyom 22 shighe u hingir tor la, a hemen anyom ahar ken Yerusalem.+
22 A za hemen u eren kwaghbo sha ishigh ki Yehova, vough er ter na Manase er nahan;+ shi Amon lu nan ieev mbi gban a gba mbi ter na Manase er la cii iniav,+ civir mbi.
23 Kpa Amon hide a iyol na ijime sha ishigh ki Yehova,+ er ter na Manase hide a iyol na ijime nahan ga,+ kpa lu eren kwaghbo seer a seer.
24 Shighe kar yô, mbatomov nav zua zwa sha a na,+ wua un hen ya na.
25 Kpa ior mba ken tar la wua mba ve zua zwa sha Tor Amon la cii,+ maa ve ver wan na Yoshia+ tor sha ityough nagh.
Ngeren mba shin kpe
^ Nenge Ngeren u Pasen Asember, “Ityôgh ki akombough ki sha kon.”
^ Shin a fatyô u kaan ér, “shin zwa.”
^ Shin “a er kwagh u ishima a gba Yehova Aôndo na shimi yô.”
^ Shin “uwagh.”
^ Nenge Ngeren u Pasen Asember, “Ityôgh ki akombough ki sha kon.”
