Kroniku u sha Uhar 19:1-11
19 Tsô Yehoshafati tor u Yuda hide doo doo*+ hen ya na* ken Yerusalem.
2 Yehu+ wan u Hanani,+ ornengenmbampase la due za kohol Tor Yehoshafati, kaa a na ér: “Ka mbaaferev i gbe u u wasen ve yee?+ Shi ka mba ve ker Yehova ihyom la vea doo u ishima yee?+ Sha ityôkyaa ne yô, ishima vihi Yehova a we tsung.
3 Nahan kpa, i zua a akaa a dedoo ken a we,+ sha ci u yange u bee a mtôm ma akombom ma sha ikyon* ken tar ne kera, shi u sôr ishima you* u keren Aôndo u mimi.”+
4 Yehoshafati za hemen u lun ken Yerusalem, shi a va due a za hen ior mba ve lu, hii hen Bersheba zan zan nyôr hen haregh u iwoogh u Eferaim la,+ sha u una hide a ve hen Yehova Aôndo u uter vev yô.+
5 Shi a ver mbaajiriv ken tar la cii, ken agar a Yuda a lun a ugir mba taver la cii; a er nahan ken hanma gar cii.+
6 Shi a kaa a mbaajiriv ér: “Ver nen ishima sha kwagh u ne lu eren yô, gadia ne mba ôron ijir ka sha ci u or ga, kpa ka sha ci u Yehova, shi una lu a ven shighe u ne lu ôron ijir yô.+
7 Hegen yô, cian nen Yehova.+ Wa nen ikyo sha kwagh u ne eren yô, sha ci u Yehova Aôndo wase ka Aôndo u ôron ijir sha mimi,+ sangen a sange ga,+ ngohol ingyatu kpaa ga.”+
8 Ken Yerusalem kpa Yehoshafati ver Mbalevi man upristi mbagen kua mbayaav mba sha uya mba uter mba Iserael mbagen ér ve lu mbaajiriv sha ci u Yehova, shi ve ôron ajir a ior mba ken Yerusalem.+
9 Shi a kaa a ve ér: “Ka kwagh u ne er sha u cian Yehova, eren kwagh sha mimi man a ishima i jighilii* je ne:
10 Hanma shighe u anmgbianev enev mba ve lu ken agar a ve la, ve ve a ijir ér i haa awambe a or inya,+ shin ve pin kwagh sha kwagh u tindi shin atindiakaa shin akaawan gayô ajiraôron yô, ta nen ve icin sha er vea lu a ibo sha ishigh ki Yehova ga yô; ne er nahan ga yô, ishima ia vihi un a ven man anmgbianev enev tsung. Ka kwagh u ne er ve ne lu a ibo ga je la.
11 Pristi u tamen Amaria ngun, una nengen sha a ven shi una wasen ne u fan hanma kwagh u Yehova cii.+ Sebadia wan u Ishemael ka orvesen u una nengen sha ya u Yuda man tom u tor yô. Mbalevi di vea wasen ne tom. Taver nen ishima er nen tom sha gbashima, nahan Yehova a lu a mba vea er kwagh u dedoo la.”+
