Kroniku u sha Uhar 7:1-22
7 Solomon eren msen been nahan maa,+ usu sen sha+ va hia nagh ku nanden man iniav mbigen, shi iengem i Yehova iv iyou la.+
2 Upristi kera fatyô u nyôron ken iyou i Yehova ga, sha ci u iengem i Yehova iv iyou i Yehova la.+
3 Shighe u usu sen shi iengem i Yehova lu sha iyou la, ior i Iserael cii lu kenger, nahan ve ngurum ve wa ityough inya, maa ve yav inya ve sugh Yehova, “gadia a doo; dooshima na ka u been mayange ga.”
4 Tsô tor man ior cii, na iniav sha ishigh ki Yehova.+
5 Tor Solomon na nagh sha ibua 22,000 man iyôngo 120,000. Kape tor man ior cii tsegha iyou i Aôndo u mimi la.+
6 Upristi tile sha ajiir a ve a eren tom, Mbalevi kpa tile sha ajiir a ve, kôr akaa a i kuhwan kwagh a mi shighe u i lu wan Yehova icam yô.+ (Tor Davidi er ikyav mbin sha u wuese Yehova a mi, shighe u Davidi una waan atsam a ve* yô, “gadia dooshima na ka u been mayange ga.”) Upristi lu tôngon ibusa+ sha ishigh vev taver taver, Mbaiserael cii gema tile sha.
7 Tsô Solomon tsegha tembe u hen atô, u u lu sha ishigh ki iyou i Yehova la, gadia lu her a na iniav mbi nanden+ man ahôm a iniav mbi bem ye, sha ci u atse a nan nagh a sha togula+ a Solomon er la, yina u nan iniav mbi nanden man iniav mbi sha samuyia,+ kua ahôm+ a iniav mbi bem la sha mi.
8 Hen shighe la, Solomon er iniongo ayange ataankarahar+ vea Iserael cii imôngo, lu zege mkohol; hii hen Lebo-hamati* sen za nyôr hen Uwagh u Igipiti.+
9 Kpa sha iyange* i sha anigheni la, ve er icighanmkohol;+ sha ci u ve vande eren iniongo i tseghan atse a nan nagh la ayange ataankarahar, shi ve er iniongo di kpa ayange ataankarahar.
10 Nahan sha iyange i sha 23, i uwer u sha utaankaruhar la, a na ior gbenda ve yem sha uya vev saan saan,+ doo ve kpishi sha erdoo u Yehova tese Davidi man Solomon kua ior nav Iserael la.+
11 Kape Solomon maa iyou i Yehova man iyou i tor*+ bee kua hanma kwagh u sar Solomon u eren sha iyou i Yehova man iyou na cii kure doo doo la.+
12 Yehova maa ande hen Solomon+ tugh, kaa a na ér: “M ungwa msen wou, nahan m tsua ijiir ne sha ci wam mer i lu iyou i nan nagh.+
13 Aluer m cir usha, ura kera nôô ga, shi m tindi mbaahungwa va ya imendenev mbi ken tar ne, shi m tindi bouange hen atô u ior av,
14 kpa ior av mba i yer ve sha iti yam ne,+ ve hide a ayol a ve ijime,+ ve er msen ve ker ishigh yagh shi ve undu igbenda ve i ifer la yô,+ me ungwa sha usha, me de ve isholibo ve shi me sôr tar ve.+
15 Hegen yô, me bugh ashe a am man ato a am me ungwa msen u a er hen ijiir ne yô.+
16 Shi hegen m tsua iyou ne shi m tsegha i̱ sha er iti yam ia lu her gbem+ shi ashe a am man ishima yam vea luun her hanma shighe yô.+
17 “Man aluer u ngu zenden sha ishigh yagh er teru Davidi zenden nahan, u ngu eren hanma kwagh u m kaa a we mer er, shi u ngu dondon akaawan a am man ajiraôron a am yô,+
18 me ver ikyônough ki torough ki hementor wou kia taver,+ vough er yange m ya ikyur a teru Davidi+ m kaa mer, ‘Mayange or nana ban hen tsombor wou u nana tema sha ikyônough ki torough ki Iserael ga’+ la nahan.
19 Kpa aluer ne gema ijime a mo ne de u dondon akaawan a am shi kuran atindi a am, a m ver sha ishigh yenegh la, ne yem ne mba za civir mbaaôndo mbagen, guren ve inya yô,+
20 me tim Mbaiserael ken tar wam u m ne ve la kera,+ shi iyou i m tsegh sha ci u iti yam la kpa, me kar a mi sha ishigh yagh kera, shi me gema i ia hingir kwagh u kunya* man kwagh u ior cii vea lahan yô.+
21 Shi iyou ne ia hingir atihi a alôgh. Hanma or u nana kar gbenda her cii, nana nenge a kpiligh nan iyol,+ nana pine ér, ‘Er nan Yehova a er kwagh la a tar ne man iyou ne nahana?’+
22 Maa vea kaa ér, ‘Lu sha ci u ve undu Yehova+ Aôndo u uter vev, un u yange due a ve ken tar u Igipiti kera la,+ ve za var a mbaaôndo mbagen ve lu guren ve inya civir ve.+ Ka nahan ve, a ve a ican ne cii sha a ve ye.’”+
