Kroniku u sha Uhar 23:1-21
23 Ken inyom i sha utaankaruhar la, Yehoyada er kwagh sha ishimataver; a za ya ikyur a mbahemen ior deri deri,+ ve yô, lu Asaria wan u Yeroham, man Ishemael wan u Yehohanan, man Asaria wan u Obedi, man Maaseia wan u Adaia, kua Elishafati wan u Shikeri.
2 Tsô ve zende ken Yuda cii ve kohol Mbalevi+ mba ve lu ken agar a Yuda la cii imôngo, kua mbayaav mba sha uya mba uter mba Iserael. Mba za nyer ken Yerusalem yô,
3 nongoior la cii ya ikyur+ a tor ken iyou i Aôndo u mimi la, mba been yô, a kaa a ve ér:
“Nenge! Wan u tor una hemen, vough er Yehova tôndo zwa sha kwagh u ônov mba Davidi nahan.+
4 Ka kwagh u ne er je ne: Pav nen upristi man Mbalevi mba vea eren tom+ sha Iyange i Memen la ker ikwe itiar, kwe môm u kuran ihinda;+
5 kwe ugen u lu hen iyou i tor,*+ kwe ugen la di u lu hen hunda u i yilan ér Hunda u Ityôyoughough la; ior mbagen cii yô, ve lu ken ityembe i iyou i Yehova.+
6 De deen nen ner or môm nana nyôr ken iyou i Yehova ga, saa upristi man Mbalevi mba ve eren tom la tseegh.+ Mban yô, vea fatyô u nyôron ker, sha ci u i tsegha ve ér ve eren icighantom. Ior mbagen cii yô, ve kuran tindi u Yehova.
7 Mbalevi ve kase tor hanma vegher cii ve ningir ve tser, hanma or a ikyav mbi tswamev mbi nan ken uwe. Aluer orgen nyôr ken iyou la yô, i wua nan. Lu nen vea tor ape a lu zan cii.”*
8 Mbalevi man Yuda cii er kwagh u pristi Yehoyada ôr la vough. Nahan hanma ve nan tôô ior mba nan mba ve yar tom sha Iyange i Memen la, kua ior mba ve yar tom sha Iyange i Memen ga la,+ sha ci u pristi Yehoyada na ikwe i i yar tom la ian+ i kurun ga.
9 Pristi Yehoyada maa na mbahemen ior deri deri+ awange man ipyerutya i kiriki* kua ipyerutya i gbilititi i Tor Davidi,+ i i lu ken iyou i Aôndo u mimi la.+
10 Tsô a ver ior cii, hanma ve a ikyagh ki tswamegh ki nan ken uwe,* hii vegher u iyou la ken iyan, za nyôr vegher u iyou la ken imese, man hen atse a nan nagh la, kua hen iyou la ningir tor tser.
11 Nahan ve due a wan u tor,+ ve va cir un idyer i tor shi ve penda un Shiada+ sha ityo,* maa ve ver un tor, shi Yehoyada man ônov nav mba nomso shighe un mkurem. Tsô ve kaa ér: “Tor a lu uma gbem!”+
12 Atalia ongo iov i ior mba ve lu yevese shi wuese tor la yô, fese je a va hen ior mba ve lu ken iyou i Yehova la.+
13 Maa a nenge tor tile her hen ityôgh nagh, hen hunda. Mbahemenev+ man mbatôngon ibusa lu vea tor, shi ior mba ken tar la cii lu ember+ tôngon ibusa; mbaatsamev mba ve lu a ikyav mbi kuhwan kwagh la gema hemen u wan atsam a iwuese.* Atalia nengen kwagh ne yô, a ande akondo a na, a gba ôron genger genger ér: “I zua zwa sha a mo! I zua zwa sha a mo!”
14 Kpa pristi Yehoyada due a mbahemen ior deri deri, mba i tsua ve ve lu hemen ikyumutya la, kaa a ve ér: “Due nen a na hen ior kera, shi aluer or dondo un ijime yô, wua nen nan sha sanker!” Gadia pristi kaa ér: “De woo un ken iyou i Yehova ga.”
15 Tsô ve kôr un, mba za nyer hen Hunda u Anyinya u ya u tor la yô, fese je ve wua un her.
16 Yehoyada maa ya ikyur ér un man ior cii kua tor, vea za hemen u lun ior mba Yehova.+
17 Mba been yô, ior cii va hen iyou i Baal va hembe i haa inya;*+ ve hembe atse a na man ieev nav avur avur,+ shi ve wua Matan, pristi u Baal+ sha ishigh ki atse la.
18 Yehoyada maa gema ya u Yehova wa sha ikyev i upristi man Mbalevi ér ve nengen sha mi; lu ve Davidi pav ve ker ér ve nengen sha iyou i Yehova, shi ve naan iniav mbi nanden mbi Yehova,+ er i nger ken Tindi u Mose nahan ye;+ ve eren nahan a iember man a icam i wan, er Davidi kaa nahan.
19 Shi a ver mbakuranhunda+ sha ihinda i iyou i Yehova sha er or u nan hôngor iyol i nan sha nyityô gbenda cii yô, nana de nyer ga yô.
20 Tsô a tôô mbahemen ior deri deri,+ man ashagbaaior man mbahemen ior kua ior mba ken tar la cii, ve mough hen iyou i Yehova ve ver tor gbenda ve sen, ve kar hen hunda u sha la ve va hen iyou i tor, ve va ver tor sha ikyônough ki torough+ ki tartor la.+
21 Nahan ior mba ken tar la cii ember, shi gar kpa huan ving, sha ci u i wua Atalia sha sanker.
Ngeren mba shin kpe
^ Shin “ya u tor.”
^ Zwa Heberu, “shighe u a lu duen shi nyôron yô.”
^ Perutya u kiriki, u ashighe kpishi mbakerenavaan yange ve lu a mi la.
^ Shin “a iwange i nan ken uwe.”
^ Shin “shi ve na un ruamabera u Tindi u Aôndo la.”
^ Shin “gema lu tesen er a wa atsam a iwuese yô.”
^ Shin “ior cii va hen tempel u Baal va hembe un haa inya.”
