Samuel u Hiihii 9:1-27
-
Samuel za zua vea Saulu (1-27)
9 Yange Orbenyamin ugen lu, i yilan un ér Kishi,+ lu wan u Abiel, wan u Seror, wan u Bekorati, wan u Afia, Orbenyamin;+ or ne lu a kwagh ave kpishi.
2 Or ne lu a wan u nomso, i yilan un ér Saulu.+ Saulu lu gumor shi doo or—ken Mbaiserael cii or môm hemba doon or a na ga—shi hemba taven a ior cii je yô, ve gba un sha akende.
3 Yange ujaki* mba Kishi, ter u Saulu mba saan yô, Kishi kaa a wan na Saulu ér: “Wea lumun yô, za vea ortom môm za ker nen ujaki mbara.”
4 Maa ve mough ve kar hen haregh u iwoogh u Eferaim, shi ve kar ken tar u Shalisha, kpa ve zua a ve ga. Shi ve za kar ken tar u Shaalim, kpa ujaki mbara lu ker ga. Ve kar hanma ijiir ken tar u Mbabenyamin, kpa ve zua a ujaki mbara ga.
5 Tsô ve za nyôr ken tar u Sufi, maa Saulu kaa a ortom na u lu vea na la ér: “Hide se yem, sha er ishima a va hii u nyian terem sha kwagh wase, a kera lu ujaki mbara ga yô.”+
6 Kpa ortom la gema kaa a na ér: “Nenge, or u Aôndo ugen ngu ken gar ne, ka or u i ne un icivir yô. Hanma kwagh u a ôr cii, ka a kure sha mi vough.+ De se za her hegen je. Alaghga tsô una tese se gbenda u se za yô.”
7 Saulu gema kaa a ortom na la ér: “Aluer se za yô, se za na or la nyi? Se mba a beredi ken akpa a ase ga; se mba a iyua i môm i se za na or u Aôndo u mimi la ga. Ka nyi se lu a mini?”
8 Tsô ortom la kaa a Saulu ér: “Nenge! M ngu a gbenger u shekel u azurufa* ken uwegh agh. Me gema un me na or u Aôndo u mimi la, nahan una tese se gbenda u se za yô.”
9 (Sha ayange a tsuaa a Mbaiserael la, ka kwagh u yange or nan ôr shighe u nan lu zan u za pinen Aôndo ér a tese nan kwagh u nana er je ne, ér: “Va, se za hen ornengen akaa a ken hemen.”+ Sha ci u or u i yer nan nyian ér profeti la, i yilan nan sha ayange a tsuaa la ér, ornengen akaa a ken hemen.)
10 Maa Saulu kaa a ortom na la ér: “Kwagh u u ôr la doo. Se za ase.” Nahan ve za hen gar u or u Aôndo u mimi lu la.
11 Mba ngur unden igyungu kôndon sha gar la yô, ve zua a mbayevkasev lu zan u za kesen mngerem. Maa ve pine ve ér: “Ornengen akaa a ken hemen+ ngu hen ijiir nee?”
12 Ve gema ve kaa ér: “Een, ngu. Nenge, ka un je a lu shaala la. Yô, za ase nen fese, gadia nyian a va ken gar sha ci u ior mba nan nagh+ nyian sha ijiir i taven+ la.
13 Ne nyôron ken gar je ne zua a na, cii ve una kôndo sha ijiir i taven la u za yan kwagh ye. Ior vea ya kwagh ga zan zan una kar zan, sha ci u ka un ka a haa iveren sha nagh ku i ne la ye. Ka una eren nahan yô, maa ior mba i lehe ve la ve ya kwagh. Kôndo za nen hegen je, nahan ne zua a na.”
14 Tsô ve kôndo ve za sha gar la. Er ve lu nyôron hen atô u gar la, Samuel di due lu van u va kohol ve sha u vea kôndo a za sha ijiir i taven la yô.
15 Sha iyange i kpernan Saulu va la, Yehova vande kaan a* Samuel ér:
16 “Kper, er hen shighe ne nahan, me tindi or u ken tar u Benyamin+ nana va hen a we. Nahan u shighe nan mkurem, nana hingir orhemen u ior av Iserael+ shi nana yima ior av sha ikyev i Mbafiliti. Gadia m nenge a ican i ior av shi mliam vem nyôr a mo.”+
17 Samuel nengen a Saulu yô, Yehova kaa a na ér: “Ka or u m ôr u kwagh na mer, ‘Ka un una hemen ior av’”* je ne.+
18 Tsô Saulu kporom za hen Samuel ape a lu hen atô u hundagar la, za pine un ér: “Wea lumun yô ôrom, ka han ya u ornengen akaa a ken hemen la a lu?”
19 Samuel gema kaa a Saulu ér: “Ka mo m lu ornengen akaa a ken hemen la ye. Kar hemen gbenda se kôndo sha ijiir i taven la, gadia ne ya kwaghyan vea mo nyian.+ Maa kper pepe me ver u gbenda u yem, shi me ôr u hanma kwagh u u soo u fan cii.*
20 Sha kwagh u ujaki mba ve saa ayange atar ken ijime la yô,+ ishima i de ze u iyol sha kwagh ve ga, sha ci u i zua a ve. Ka an i gbe u a na nan akaa a injaa a Iserael ciilii? Ka we man ya u teru cii ga zee?”+
21 Saulu gema kaa ér: “Mo m ngu Orbenyamin, ipyaven wam hemba ndahar ken uipyaven mba Iserael cii,+ shi ken icombor i ipyaven u Benyamin cii, ka tsombor wam u hembe lun sha kwarkyaa ga ye. Nahan er nan u ôr kwagh ne a mo nahana?”
22 Tsô Samuel kar a Saulu man ortom na za ver ve ken iyou i yan kwaghyan la, a ver ve hen ijiir i hemban doon ape mba i lôhô ve kwaghyan tema la; ve nôngo u kuman er nomso 30 nahan.
23 Samuel kaa a or u yôron iwer la ér: “Va a inyam i m ne u, m kaa mer, ‘Za ver i kposo la.’”
24 Tsô or u yôron iwer la tôô namegh ku inyam man kwagh u lu sha mi la, za ver sha ishigh ki Saulu. Maa Samuel kaa ér: “Ka kwagh u i dugh i ver je, i pende sha ishigh you ne. Ya, gadia ve ver u i sha ci u iniongo ne. M vande kaan a ve mer, ‘Me lu a mbavannya.’” Nahan Saulu ya kwagh vea Samuel sha iyange la.
25 Maa ve hungwa sha ijiir i taven la+ ve nyôr ken gar, nahan a za hemen u lamen vea Saulu sha ityough ki iyoughough.
26 Tsô ve nder tsuaa, nahan sev mbu va wanger yô, Samuel yila Saulu sha ityough ki iyoughough, kaa ér: “Wa iyol sha er me ver u gbenda u yem yô.” Nahan Saulu wa iyol, maa un man Samuel ve due ken won.
27 Mba ngur zenden senen ken won u gar la yô, Samuel kaa a Saulu ér: “Ôr ortom wou+ a kar a yemen se ken hemen,” maa a kar a hemen. “Kpa we yô, tile heen, sha er me pase u kwagh u Aôndo a ôr yô.”
