Samuel u Hiihii 25:1-44
25 Shighe kar yô, Samuel+ kpe; nahan Iserael cii za kohol imôngo u vaan un shi iin un hen ya na ken Rama.+ Maa Davidi mough sen shin taaikyôngo u Paran.
2 Hen shighe ne, orgen lu ken Maon+ u eren tom ken Karmel* yô.+ Or ne lu a inyaregh kpishi; lu a iyôngo 3,000 man ivo 1,000. Hen shighe ne, lu tôndon iyôngo na aive ken Karmel.
3 I yilan or ne ér Nabal,+ kwase na di i yilan un ér Abigail.+ Abigail lu kwase u fan kwagh shi doo ashe, kpa nom na u lu Orkalebu+ la yô, vihi tu shi eren kwagh sha inja ga.+
4 Davidi za ungwa ken taaikyôngo ér Nabal ngu tôndon iyôngo na aive.
5 Tsô Davidi tindi agumaior pue hen a na. Davidi kaa a agumaior la ér: “Kôndo za nen sha Karmel. Ne za nengen a Nabal yô, kaa nen a na ner m kaa mer ne sugh un ne fa er a lu yô.
6 Maa kaa nen ner, ‘Lu uma gbem shi i kpe u iyol* shi ya wou a lu dedoo shi akaa a u lu a mi cii a lu doo doo.
7 Hegen m ungwa mer u ngu tôndon iyôngo you aive. Shighe u mbakuranilev ou lu vea vese la se bula ve ga,+ shi shighe u ve lu ken Karmel la cii kwagh môm saa ve ga.
8 Pine agumaior a ou tsô vea ôr u. I doo u a agumaior a am sha ci u se va sha shighe u saan iyol.* Wea lumun yô, na mbayev ou man wan wou Davidi kwagh u u fetyô la cii.’”+
9 Tsô agumaior a Davidi yem za ôr Nabal akaa a Davidi ôr la cii, mba been yô,
10 Nabal pine mbatomov mba Davidi ér: “Ka an nan lu Davidi, man ka an nan lu wan u Yese? Ayange ne mbayev kpishi mba yevese undun mbavesen vev.+
11 M tôô beredi wam man mngerem am man inyam i m bur sha ci u mbatôndon iyôngo yam aive, m na ior mba m fe ape ve dugh ve ve ga ne mer nyi?”
12 Nahan agumaior a Davidi hide za ôr un akaa a Nabal ôr la cii.
13 Fese je, Davidi kaa a ior nav ér: “Hanma wen nana kange sanker u nan!”+ Maa ve cii ve kange usanker vev, Davidi kpa kange sanker na. Davidi kôndo za vea ior mba kuman er 400 nahan, iorov 200 gema lu her lu nengen sha uikya.
14 Nahan kpa, môm ken mbatomov mbara za ôr Abigail kwase u Nabal ér: “Nenge! Davidi tindi mbaôron-loho ken taaikyôngo ér ve va sugh orvesen wase, kpa a gema a ngor a lam a ve caveraa.+
15 Man yô, ior mbara yange ve er kwagh a vese doo kpen kpen. Mayange ve bula se ga, shi shighe u se lu vea ve ken taaikyôngo la cii, kwagh môm saa se ga.+
16 Shighe u se lu vea ve se lu kuran ilev la cii, ve lu se er kpekpe u i maa u kuran se nahan, tugh man atetan cii.
17 Nahan fa kwagh u u er yô, sha ci u kwagh ne una na kwagh a tser orvesen wase kua ya na cii kpee a bunde ga,+ shi ngu gbilinor je yô,+ ka i taver u lamen a na.”
18 Fese je Abigail+ tôô ikpenberedi 200, man mtem ma wain ma vesen mhar, man iyôngo itian i i vande sôngon kera yô, man uikyaren mba sea utaan* mba samuyia u mgbaghen, man azen a atam a wain a uman 100, kua azen a atam a tur a uman a i kam yô 200, maa a kange akaa ne cii sha ujaki.+
19 Nahan a kaa a mbatomov nav ér: “Hemen nen gbenda; mo me vaan ne ken ijime.” Kpa a ôr nom na Nabal kwagh môm sha kwagh ne ga.
20 Er mough lu senen sha jaki la, uwo gema yisa un, Davidi vea ior nav kpa lu senen van vegher na la, maa a va zua a ve.
21 Hen shighe ne, Davidi lu ôron ér: “Yange lu gbilin tsô m kura hanma kwagh u or ne ken taaikyôngo ye. Kwagh na môm yange saa ga.+ Er m er kwagh u dedoo a na nahan kpa, a gema a er a mo doo ga.+
22 Aluer m de nomsoor na* môm nan ngu uma zan zan kper pepe yô, Aôndo a tsaha mbahyomov mba Davidi tsung.”*
23 Abigail te ashe za nengen a Davidi yô, a hungwa sha jaki fese, maa a gure a wa ityough inya sha ishigh ki Davidi u nan un icivir.
24 A gure hen angahar a na, a kaa ér: “Terem, de ibo i lu i yam; de wanyekwase wou a lam a we shi kegh ato a mkaanem ma wanyekwase wou a lu ôron ne.
25 Terem, wea lumun yô, kwagh a de gbe u sha kwagh u Nabal gbilinor la ga,+ sha ci u eren kwagh vough er iti na nahan. Iti na ér Nabal,* nahan a ban a kwaghfan. Kpa mo wanyekwase wou yange m nenge a agumaior a terem tindi la ga.
26 Man hegen yô terem, mimi je, er Yehova a lu u uma ne, man er we kpa u lu uma ne, ka Yehova a yange u+ u lun a iboawambe+ shi oron iyev* sha uwegh ough ye. Mbahyomov ou man mba ve lu keren u eren terem kwaghbo la ve hingir er Nabal nahan.
27 Nahan terem a ngohol iyua*+ i wanyekwase na a ve a mi u nan un ne, a na agumaior a a lu dondon terem la.+
28 Wea lumun yô, gba den wanyekwase wou a kwaghbo na tsô, sha ci u Yehova una maa terem ya u tsôron kpee a bunde ga;+ gadia terem ngu nôngon ityav mbi Yehova,+ shi sha ayange a ou cii i zua u a ifer ga.+
29 Shighe u or nan mough u zendan we shi keren we a ku yô, Yehova Aôndo wou una kange uma u terem gbang ken ibya i uma; kpa uuma mba mbahyomov ou yô, una vishigh ve kera er awen a ken mzu nahan.
30 Shi shighe u Yehova una er terem akaa a dedoo a a tende zwa la cii, shi una ver u ér u hemen Iserael la,+
31 ishima ia vihi u shin u vaa afanyô* sha ci u u haa awambe inya a ityôkyaa shio ga, man sha ci u terem or iyev* sha uwegh nagh ga.+ Shighe u Yehova una er a terem doo doo yô, umbur wanyekwase wou.”
32 Davidi maa kaa a Abigail ér: “I wuese Yehova Aôndo u Iserael, un u a tindi u sha iyange ne u va kohol mo ne!
33 Shi Aôndo a ver kwaghfan wou u injaa la! Aôndo a ver u, er u yangem u lun a iboawambe sha iyange ne yô,+ shi u yangem u oron iyev* sha ave a am yô.
34 Mimi je, er Yehova Aôndo u Iserael, un u a yangem u bulan we+ a lu u uma ne, luun er wea ve fese wea va kohol mo ga yô,+ kper pepe, nomsoor* u Nabal môm ma nan kera lu uma ga.”+
35 Maa Davidi ngohol akaa a a va a mi u nan un la, shi kaa a na ér: “Kôndo yem sha ya wou bem bem. Nenge, m ungwa kwagh u u kaa la, shi me er kwagh sha mi kpaa.”
36 Tsô Abigail hide hen Nabal; Nabal lu eren iniongo hen ya na er ka tor nahan. Saan Nabal iyol shi ma msôrom lu hunden kpishi. Abigail ôr un kwagh môm ga zan zan kpernan pepe.
37 Sev mbu aven ka wanger Nabal ashe yô, kwase na ôr un akaa ne. Maa ishima na hingir er ka i orkpen nahan, a kera tenger ga, er ka iwen nahan.
38 Ayange nga kar er pue nahan yô, Yehova tsaha Nabal, maa a kpe.
39 Davidi ongo ér Nabal kpe yô, a kaa ér: “I wuese Yehova, un u Nabal a laham,+ kpa a te ikyaa a mo,+ shi a yange ortom na u eren ma kwagh u bo la;+ shi Yehova hide a kwaghbo u Nabal sha ityough nagh!” Maa Davidi tindi ér i za kaa Abigail ér un soo ér a hingir kwase na.
40 Tsô mbatomov mba Davidi va hen Abigail hen Karmel va kaa a na ér: “Davidi tindi se ér se va kua a we u za hingir kwase na.”
41 Fese je a mough sha, a ngurum a wa ityough inya a kaa ér: “Kpan wou u kwase ngun. Me eren tom u ôôn mbatomov mba terem angahar.”+
42 Maa Abigail+ mough fese henda jaki na gba yemen, mbayevkasev mba eren un tom utaan gema lu van un ken ijime; nahan Abigail yem vea mbaôron-loho mba Davidi za hingir kwase na.
43 Shi Davidi yange vôso Ahinoam+ ken Yesereel,+ nahan ve cii ve hingir kasev nav.+
44 Kpa Saulu gema tôô wan na u kwase Mikal+ kwase u Davidi la na Palti+ wan u Laishi, or u ken Galim.
Ngeren mba shin kpe
^ Ka gar u ken Yuda; ngu kwaghmôm a Uwo u Karmel ga.
^ Shin “bem a lu sha a we.”
^ Zwa Heberu, “sha iyange i dedoo.”
^ Sea môm yange a lu ulita 7.33. Nenge Ngeren u Seer u B14 la.
^ Zwa Heberu, “hanma or u nyanden sha kpekpe.” Ka mkaanem ma ken zwa Heberu ma tuhwan nomso a mi.
^ Shin a fatyô u kaan ér, “Aôndo a tsaha Davidi tsung.”
^ Inja na yô ér, “m-ban u kwaghfan; ibumegh.”
^ Shin “van a myom.”
^ Zwa Heberu, “iveren.”
^ Zwa Heberu, “u er ze-ze-ze shin u nôngo gbeev.”
^ Shin “va a myom.”
^ Shin “van a myom.”
^ Zwa Heberu, “hanma or u nyanden sha kpekpe.” Ka mkaanem ma ken zwa Heberu ma tuhwan nomso a mi.
