Samuel u Hiihii 12:1-25
12 Ken masejime yô, Samuel kaa a Iserael cii ér: “Hegen m er* hanma kwagh u ne kaa ner m er la cii; m ver ne tor u nana hemen ne yô.+
2 Hegen ka tor u a lu hemen* ne je ne!+ Mo yô, m bee iyol, m mende ivu, shi ônov av mba nomso mba heen vea ven,+ shi m hemen ne hii iyev je zan zan nyian.+
3 Nenge m ngun. Ôr nen sha ishigh ki Yehova man sha ishigh ki un u a shigh un mkurem la,+ aluer ne mba a kwagh u nan mo ibo sha mi yô: Ka an m ngohol nan nombua shin jaki?+ Ka an m nyighe nan shin m nzughul a nana? Ka an m ngohol ingyatu hen a nan, sha u me gema me kenger vegher ugene?+ Aluer m er nahan yô, me hide a mi.”+
4 Ve gema ve kaa ér: “U nyighe se ga, u nzughul a vese ga, shi u ngohol or wase môm kwagh kpaa ga.”
5 Tsô a kaa a ve ér: “Yehova ngu shiada wam hen atô wen, shi un u i shigh un mkurem la kpa ngu shiada hen atô wam a ven sha iyange ne, gadia ne zua a kwagh môm u ne nam ibo sha mi ga.”* Maa ve kaa ér: “Ngu shiada.”
6 Nahan Samuel kaa a ior ér: “Yehova, un u yange tsua Mose man Aron, shi due a uter enev ken tar u Igipiti kera la+ ngu shiada.
7 Hegen va tile ase nen heen, m ôr ne ijir sha ishigh ki Yehova sha akaa a perapera a Yehova a er sha ci wen, man sha ci u uter enev la cii.
8 “Yange Yakob za nyer ken Igipiti+ shi uter enev mba ngur yilan Yehova ér a wase ve yô,+ fese je, Yehova tindi Mose+ man Aron ér ve hemen uter enev ve due a ve ken Igipiti kera, shi ve va a ve hen ijiir ne.+
9 Kpa ve hungur a Yehova Aôndo ve, nahan a na ve+ sha ikyev i Shisera,+ kurutya u ikyumutya i Hasor, man sha ikyev i Mbafiliti,+ kua sha ikyev i tor u Moabi,+ ve nôngo ityav a ve.
10 Shi ve yila Yehova ér a wase ve,+ ve kaa ér, ‘Se er isholibo+ sha ci u se undu Yehova se yem civir ieev mbi Baal,+ man ieev mbi Ashetaroti.+ Nahan yô, yima se sha ikyev i mbahyomov asev sha er se civir we yô.’
11 Maa Yehova tindi Yerubaal+ man Bedan man Yefeta+ man Samuel,+ ve yima ne sha ikyev i mbahyomov enev mba ve kase ne la cii, sha er ne tema a kpe ne iyol yô.+
12 Zum u ne nenge Nahashi,+ tor u Mbaamon, va u tan ityav sha a ven la, ne zer yilan mo kaan ner, ‘Ei, se kange ishima ser se lu a tor u nana hemen se+ yô!’ shin er Yehova Aôndo wen a lu Tor wen nahan kpaa.+
13 Hegen ne, ka tor u ne tsough u yange ne lu keren je ne. Nenge! Yehova na ne tor u nana hemen ne yô.+
14 Aluer ne mba cian Yehova+ shi civir un+ shi ungwan imo na,+ shi ne hemba Yehova ato sha u peren atindi a na ga, shi ne man tor u a lu hemen ne la, ne mba dondon Yehova Aôndo wen yô, doo.
15 Kpa aluer ne mba ungwan imo i Yehova ga, shi ne mba hemban Yehova ato sha u peren atindi a na yô, uwegh ku Yehova ku a lu num a ven kua uter enev.+
16 Hegen va tile ase nen heen, nenge nen kwagh u vesen u Yehova a lu eren sha ashe a en ne.
17 Ka nyian i lu iyange i sundan alakema gaa? Me yila Yehova a dura shi a nôô ura; nahan ne fa shi ne kav er ne er iferkwagh sha ishigh ki Yehova er ne lu keren tor sha ci wen yô.”+
18 Tsô Samuel yila Yehova, maa Yehova dura shi nôô ura sha iyange la, nahan ior cii cia Yehova man Samuel tsung.
19 Maa ior cii kaa a Samuel ér: “Sôn Yehova Aôndo wou sha ci u mbayev ou,+ gadia se soo u kpen ga, sha ci u se seer iferkwagh igen sha asorabo a ase cii sha u kaan ser i na se tor.”
20 Nahan Samuel kaa a ior ér: “De cie nen ga. Ne er iferkwagh ne di je ve. Kpa mayange de deen nen u dondon Yehova ga,+ shi civir nen Yehova a ishima yen cii.+
21 De hidi za dondon nen agbilinakaa*+ a a lu a inja ga,+ shi aa fatyô u yiman or ga la ze, sha ci u ka agbilinakaa.*
22 Yehova una undu ior nav ga,+ sha ci u zegeti na la,+ gadia Yehova tsua ér una gema ne, ne hingir ior nav.+
23 Kpa mo yô, mayange me er Yehova isholibo sha u den u eren msen sha ci wen ga, shi me za hemen u tesen ne gbenda u dedoo man u vough.
24 Cia nen Yehova,+ shi civir nen un sha mimi a ishima yen cii, gadia nenge nen akaa a vesen a a er sha ci wen ne.+
25 Kpa aluer ne mba eren kwaghbo sha apera yô, a ese ne kera,+ ne kua tor wen cii.”+
