Samuel u Hiihii 22:1-23
22 Tsô Davidi mough heela+ yevese yem ken bar u Adulam.+ Anmgbianev nav man ya u ter na cii mba ongo kwagh ne yô, ve sen ve za kohol un her.
2 Shi ior mba ve lu ken zayol man mba ve gba anzô, kua mba ishima vihi ve ker la cii, ve za kohol hen a na, maa a hingir orhemen ve. Nomso mba kuman er 400 nahan lu vea na.
3 Shighe kar yô, Davidi mough heela yem ken Misepe ken Moabi za kaa a tor u Moabi ér:+ “Wea lumun yô, de terem man ngôm ve lu vea we zan zan me kar fan kwagh u Aôndo una er sha ci wam yô.”
4 Nahan a undu ve vea tor u Moabi, ve lu vea na hen shighe u Davidi za yer sha uwo la cii.+
5 Shighe kar yô, profeti Gadi+ kaa a Davidi ér: “De kera lu sha uwo ape u yer la ga. Mough her yem ken tar u Yuda.”+ Maa Davidi mough yem ken ikyô i Hereti.
6 Saulu va ungwa ér i nenge a Davidi man ior mba ve lu vea na la. Hen shighe ne, Saulu tema ken Gibea+ hen itinekon u tsamia sha ijiir i taven a iwange na ken uwe, mbatomov nav cii tile kase un.
7 Tsô Saulu kaa a mbatomov nav mba ve tile ve kase un la ér: “Nea lumun yô, kegh nen ato a mo, ne Mbabenyamin. Wan u Yese+ una fatyô u nan ne cii ishule, man ishule i ikyon i wain kpa? Una fatyô u veren ne cii ne lu mbahemen ior dubu dubu, man mbahemen ior deri deri kpa?+
8 Ne cii ne zua zwa sha a mo! Shighe u wan wam ya ikyur a wan u Yese la,+ or môm ôrom ga! Kunya kôr mô wen môm a mo, nan va ôrom ér wan wam tuur ortom wam ken ijime ér a za yer ken toho, a keghen mo ér una ta num sha a mo er i lu hegen ne nahan ga.”
9 Maa Doegi,+ Oredom u lu nengen sha mbatomov mba Saulu mba ve tile her la kaa ér:+ “Yange m nenge a wan u Yese za hen Ahimeleki wan u Ahitubi+ ken Nobu.
10 Nahan a sôn Yehova ér a tese Davidi kwagh u una er yô, shi na un akaayan. Shi yange na un sanker u Goliati, Orfiliti la je kpaa.”+
11 Fese je, tor tindi ér i za kaa pristi Ahimeleki wan u Ahitubi, man upristi mba hen ya u ter na cii, mba ve lu ken Nobu la ér ve va. Nahan ve cii ve va hen tor.
12 Saulu maa kaa ér: “Wea lumun yô, kegh ato we wan u Ahitubi!” maa a gema a kaa ér: “M kegh ato terem.”
13 Saulu kaa a na ér: “Er nan we man wan u Yese ne zough zwa sha a mo, u ne un beredi man sanker, shi u pin Aôndo kwagh sha ci naa? Ngu hendan kwagh a mo, shi a za yer ken toho ér una ta num sha a mo er i lu hegen nahan.”
14 Ahimeleki gema kaa a tor ér: “Ken mbatomov ou cii, ka an i hembe nan nan jighjigh a Davidi?+ Ngu wankem u tor,+ shi ngu orhemen u mbakurantor, shi ngu a icivir hen ya wou.+
15 Ka nyian m hii pinen Aôndo kwagh sha ci na yee?+ Kwagh u u lu ôron ne ka u mayange me er ga yô! Tor a de ne ortom na ibo ga, shi ya u terem kpa a de ne un ibo ga, sha ci u ortom wou fa kwagh môm sha kwagh ne ga.”+
16 Kpa tor kaa ér: “U kpe kpee a bunde ga,+ Ahimeleki, we a ya u teru cii.”+
17 Maa tor kaa a mbakuran* mba ve tile ve kase un la ér: “Wua nen upristi mba Yehova mban sha ci u ve ta ikyaa a Davidi! Yange ve fa er lu yevese yô, kpa ve ôrom ga!” Kpa mbatomov mba tor soo u wuan upristi mba Yehova ga.
18 Nahan tor kaa a Doegi ér:+ “We wua upristi mban!” Fese je Doegi, Oredom+ la wua upristi mbara iyol na. A wua ior 85 mba ve hua efodi yô sha iyange la.+
19 Shi a za wua ior i Nobu,+ gar u upristi la sha sanker; a wua nomsoor man kwase, wanye man wanikyundan, nombua man jaki, man iyôngo cii sha sanker.
20 Nahan kpa, wan u Ahimeleki u i yilan un ér Abiatar+ la war, yevese za kohol Davidi. Ahimeleki lu wan u Ahitubi.
21 Abiatar za kaa a Davidi ér: “Saulu wua upristi mba Yehova.”
22 Maa Davidi kaa a Abiatar ér: “Yange Doegi, Oredom la lu her, nahan sha iyange la je+ m fa mer una ôr Saulu kwagh ne a bunde ga. Ka mo jighilii je m ne ve i woo hanma or hen ya u teru ye.
23 Lu vea mo. De cie ga, sha ci u hanma or u nan lu keren we a ku yô, mo kpa nan ngu keren mo a ku; me kuran we.”+
Ngeren mba shin kpe
^ Zwa Heberu, “mbayevese.”
