Samuel u Hiihii 17:1-58
17 Tsô Mbafiliti+ kohol akumautya* a ve u za nôngon ityav. Ve kohol hen Soko+ u Yuda, ve haa afo hen atô u Soko man Aseka,+ ken Efese-damim.+
2 Saulu man nomso mba Iserael di kohol za haa afo shin Pev* u Ela,+ maa ve za kase u nôngon ityav a Mbafiliti.
3 Mbafiliti haa sha uwo vegher môm, Mbaiserael di haa sha uwo vegher ugen la, pev gema lu ve hen atô.
4 Maa nomor ugen due ken afo a Mbafiliti; i yilan un ér Goliati,+ lu or u ken Gati,+ ityaven na lu aseva ataratar man tiôn.*
5 A cir idyer i togula sha ityo shi a hua rigautya.* Rigautya u sha togula+ ne yuhwa kuma ushekel 5,000.*
6 Or ne wa akaa a i er sha togula yô sha agongo sha u kuran angahar a na, shi har dagi+ u sha togula ken ijime.
7 Ityôgh ki iwange na kehe er kon u mbatumen akondo nahan,+ shi gbenger-iyôôgh u iwange na la yuhwa kuma ushekel 600;* or u tôôn un perutya lu zan un sha hemen.
8 Tsô, a za tile a yila mbautyaav mba Iserael genger genger,+ a kaa a ve ér: “Er nan ne va kase ner ne nôngo ityava? Mo m ngu Orfiliti gaa, ne di ne mba mbatomov mba Saulu gaa? Tsua nen or môm ken a ven nana sen nana va nôngo kwagh a mo.
9 Aluer nana fatyô u nôngon kwagh a mo wuan mo yô, se hingir ikpan yen. Kpa aluer m hemba nan m wua nan yô, ne ne hingir ikpan yase, ne eren se tom.”
10 Maa Orfiliti la kaa ér: “M ngu lahan mbautyaav mba Iserael+ sha iyange ne. Nam nen ase or nana va nôngo kwagh a mo!”
11 Saulu man Iserael cii mba ongo akaaôron a Orfiliti ne yô, ve gbidye akarkase iyol shi cier ve iyol kpishi.
12 Davidi lu wan u Oreferata+ ken Betelehem+ u Yuda; i yilan un ér Yese,+ un lu a ônov mba nomso anigheni,+ shi sha ayange a Saulu la nahan, or ne bee iyol.
13 Ônov mba Yese mba nomso mba vesen mba utar za ityav vea Saulu.+ Ka ati a ônov nav mba nomso mba utar mba ve za ityav la je ne; i yilan u hiihii la ér Eliabi,+ i yilan u sha uhar la ér Abinadabi,+ u sha utar la di i yilan un ér Shama.+
14 Davidi lu u kiriki,+ mbavesen mba utar mbara gema yem vea Saulu.
15 Davidi yange a za kura iyôngo+ i ter na ken Betelehem, shi a cin a hide hen Saulu.
16 Hen shighe ne cii, hanma pepe man aikighe yô, Orfiliti la a due a va tile a laha ve; a er kwagh ne zan zan ayange 40.
17 Tsô Yese kaa a wan na Davidi ér: “Wea lumun yô, tôô efa* u samuyia u mgbaghen man ikpenberedi i pue ne, za a mi fese za na anmgbianev ou ken afo.
18 Shi tôô uciisi* mba puev mban za na orhemen u iorov dubu; shi za nenge er anmgbianev ou ve lu yô, shi ve na u kwagh u tesen ér mba dedoo hide a mi.”
19 Anmgbianev nav lu vea Saulu kua nomso mba Iserael mbagen mbara cii shin Pev* u Ela,+ ve lu nôngon ityav a Mbafiliti.+
20 Tsô Davidi mough pepe pepe, gema iyôngo wa orgen sha ikyev; maa a wa ikyav a yem, vough er Yese kaa ér a er nahan. Shighe u za nyôr hen ape i haa afo la, ikyumutya la lu duen u za nôngon ityav, ve lu geren amo a utya.
21 Ikyumutya i Iserael man ikyumutya i Mbafiliti kase ityav, nahan ikyumutya igen na ishigh sha ikyumutya igen.
22 Fese je, Davidi undu ikyav nav sha ikyev i or u nengen sha uikya la, maa a yevese a za hen ape i kase ityav la. Za nyer yô, gba pinen er anmgbianev nav ve lu yô.+
23 Er lu lamen a ve la, nomor u i yilan ér Goliati,+ Orfiliti u ken Gati la za due. A due ape Mbafiliti kase ityav la, maa a ôr mkaanem ma vanden ôron la+ Davidi kpa ungwa.
24 Nomso mba Iserael cii mba nengen a or la yô, ve yevese un, ve gbidye akarkase iyol.+
25 Nomso mba Iserael lu kaan ér: “Ne nenge a or u a dugh a lu van la kpa? Ka a va a va laha Iserael.+ Or u nana wua or ne la tor una na nan inyaregh kpishi, shi una na nan wan na u kwase,+ shi ya u ter u nan una kera taan tor kpandegh shin una eren tor tom ken Iserael kpaa ga.”
26 Davidi gema pine nomso mba ve tile ikyua a na la ér: “Aluer or wua Orfiliti u a til keela la, nan kar a ilyahan sha Iserael kera nahan, ka nyi iyua a na nanaa? Orfiliti u a lu oripyusu ne* ngu nyi je ve, a lahan mbautyaav mba Aôndo u uma?”+
27 Maa ior mbara ôr un kwagh u i vande ôron la, ér: “Ka kwagh u a er sha ci u or u nana wua un la je la.”
28 Eliabi, anmgbian u Davidi u nomso u vesen la+ ongo er lu lamen a nomso mbara yô, ishima vihi un ker a na, maa Eliabi pine ér: “Er nan u sen u ve heene? U undu iyôngo i i vese iyenge ga la ken taaikyôngo a ana?+ M fa er kwagh a hange u, shi mbamhen ou ve lu mba bov yô; ka ityav tseegh u sen u ve heen u va nengen ye.”
29 Davidi gema kaa ér: “Ka nyi m er hegene? M pine ka mpin tsô gaa?”
30 Nahan a kar hen anmgbian na kera a yem hen orgen, a za pine nan kwagh u a vande pinen la,+ maa ior mbara ôr un kwagh u i vande ôron un la.+
31 Tsô i ungwa kwagh u Davidi ôr la, maa i za ôr Saulu. Nahan a tindi ér i za va a na.
32 Davidi kaa a Saulu ér: “Ishima i de yen* or môm sha kwagh na ga. Wanye wou una za nôngo ityav a Orfiliti la.”+
33 Kpa Saulu kaa a Davidi ér: “U fatyô u za nôngon ityav a Orfiliti la ga, sha ci u u ngu wanye,+ kpa un ka orshoja* hii iyev je.”
34 Davidi maa kaa a Saulu ér: “Wanye wou yange lu kuran ilev mbi ter na, maa begha+ va kôr iyôngo lu yemen a mi, shi sha shighe ugen la, biya* kpa va, va er nahan.
35 Maa m zenda ve m za wua, m ngohol iyôngo la sha ijô ve kera. Mba moughon num a mo yô, m kôr ve sha ice m ta inya, m wua.
36 Wanye wou wua begha man biya* la cii, nahan kape Orfiliti u a lu oripyusu ne* una hingir er mô ve nahan je la, gadia a laha mbautyaav mba Aôndo u uma la.”+
37 Davidi shi kaa ér: “Yehova, un u yange yimam sha ikyev i akughur a begha man biya* la, ka un shi una yimam sha ikyev i Orfiliti ne ye.”+ Maa Saulu kaa a Davidi ér: “Za ase, Yehova a lu a we.”
38 Saulu tôô akondo a na hua Davidi. A cir un idyer i togula sha ityo, maa a tôô rigautya a hua un.
39 Tsô Davidi kange sanker na sha akondo a na gba nôngon ér una zende a yem, kpa a fatyô ga, sha ci u vanden huan a ga. Maa Davidi kaa a Saulu ér: “Me fatyô u zenden yemen a akondo ne ga, sha ci u m vanden huan a ga.” Nahan Davidi er a kera.
40 Davidi maa tôô gbough nagh kôr ken uwe, shi a za sange awen ataan a kôngor shin uwagh, a wa ken anikpa na u cuku ken ikpa na i kuran ilev la, shi lu a mzu na+ ken uwe. Maa a gba kporom zan ape Orfiliti la lu la.
41 Orfiliti la gba kporom van ikyua ikyua a Davidi, or u tôôn un perutya la gema lu un ken hemen.
42 Orfiliti la te ashe za nengen a Davidi yô, a gba sen, nahan un tar sha ci u lu wanye, nyian shi doo or.+
43 Maa Orfiliti la pine Davidi ér: “M ngu aniwa+ ve u lu van u va nôngon ityav a mo a gbough yee?” Nahan Orfiliti la wa Davidi ifyan ken iti i mbaaôndo nav.
44 Orfiliti la kaa a Davidi ér: “Va ase hen a mo, m gema inyam you m na inyon i sha man inyamtoho i ya.”
45 Davidi gema kaa a Orfiliti la ér: “U ngu van u va nôngon ityav a mo a sanker man iwange kua dagi,+ kpa mo yô, m ngu van u va nôngon ityav a we ken iti Yehova u akum a sha,+ Aôndo u ikyumutya i Iserael u u laha un la.+
46 Sha iyange i nyian ne, Yehova una na u sha ikyev yam,+ nahan me wua u, me gber u ityough; shi sha iyange ne, me na inyon i sha man inyamtoho i shin tar ikyom i ikyumutya i Mbafiliti ia ya; nahan ior mba sha tar cii vea fa er Aôndo a lu ken Iserael yô.+
47 Shi ior mba ve kohol heen cii vea* fa er Yehova a yiman, i lu sha sanker shin sha iwange ga yô,+ gadia ka Yehova una wase se, se hemba ityav mbin ye,+ shi una na ne cii sha ikyev yase.”+
48 Tsô Orfiliti la mough gba van sha kume u va nôngon num a Davidi, Davidi kpa gba yevese zan ape nôngon ityav la, sha u una za nôngo num a Orfiliti la yô.
49 Davidi maa za uwegh ken ikpa na dugh iwen wa ken mzu, ker. Iwen la za ta Orfiliti la sha icul nyôr za tema ker, maa a gba a cir ishigh inya.+
50 Tsô Davidi hemba Orfiliti la num sha mzu man iwen; a kende Orfiliti la inya, a wua un, shin er Davidi lu a sanker ken uwe ga nahan kpaa.+
51 Davidi yevese zan zan za unde tile sha a na. Maa Davidi kôr sanker u Orfiliti la+ tsua ken var gber un ityough a mi sha er una kpe yô. Mbafiliti mba nengen ér orageegh ve kpe yô, ve yevese.+
52 Tsô nomso mba Iserael man nomso mba Yuda mough gba ngoron zendan Mbafiliti; ve hii u zendan ve hen pev+ zan zan za nyôr hen ihindagar i Ekeron;+ i wua Mbafiliti i haa sha gbenda hii hen Shaaraim+ zan zan nyôr Gati man Ekeron.
53 Mbaiserael mba zende Mbafiliti sha kume mba hidi yô, ve kar ve za ya ishar hen afo a ve la.
54 Maa Davidi tôô ityough ki Orfiliti la va a mi ken Yerusalem, kpa a gema a za ver ikyav mbi utyaav mbi Orfiliti la ken tenti na.+
55 Hen shighe u Saulu nenge Davidi due u za nôngon num a Orfiliti la, a pine kurutya na Abiner+ ér: “Abiner, ka wan u an nee?”+ Abiner gema kaa ér: “Tor a lu uma gbem, mimi je m fa ga!”
56 Tor gema kaa ér: “Tôv fa or u gumor ne a lu wan u nan yô.”
57 Davidi za woo Orfiliti la hidi nahan maa, Abiner za a na hen Saulu; Davidi lu a ityough ki Orfiliti+ la sha uwe.
58 Tsô Saulu pine Davidi ér: “U ngu wan u ana?” Davidi gema kaa ér: “M ngu wan u wanye wou, Yese,+ Orbetelehem.”+
Ngeren mba shin kpe
^ Zwa Heberu, “afo.”
^ Shin “Pev u Lun Gburumaa.”
^ Yange tav kuma er angahar 9 man inci 5.75 nahan. Nenge Ngeren u Seer u B14 la.
^ Yange i er rigautya ne sha ikyondo shin sha ikyôv, i gema i tôô abamber a iyôôgh a lun er akember a ishu nahan i var sha mi.
^ Yuhwa kuma er ukilogeram 57 nahan. Nenge Ngeren u Seer u B14 la.
^ Yuhwa kuma er ukilogeram 6.84 nahan. Nenge Ngeren u Seer u B14 la.
^ Efa môm yange a nôngo u kuman ulita 22. Nenge Ngeren u Seer u B14 la.
^ Zwa Heberu, “atumba.”
^ Shin “Pev u Lun Gburumaa.”
^ Shin “or u i tsenge un ga ne.”
^ Shin “iyol i de kpeen.”
^ Shin “orutya.”
^ Ka i yila inyamkume ne ken zwa Buter ér bear.
^ Shin “or u i tsenge un ga ne.”
^ Ka i yila inyamkume ne ken zwa Buter ér bear.
^ Ka i yila inyamkume ne ken zwa Buter ér bear.
^ Zwa Heberu, “nongoior ne cii ua.”
