Samuel u Hiihii 20:1-42
-
Yonatan er kwagh a Davidi sha mimi (1-42)
20 Tsô Davidi yevese undu Nayoti u Rama. Nahan kpa, a va hen Yonatan a va pine ér: “Ka nyi m ere?+ Ka nyi kwaghbo m ere? Man ka nyi m er ter u ve a lu keren u wuan mo?”
2 Nahan Yonatan kaa a na ér: “Mayange kwagh a er nahan ga!+ U kpe ga. Nenge! Terem una fatyô u eren ma kwagh môm u vesen shin u kiriki a u ôron mo shio ga. A er nan ve terem una yerem a kwagh ne? Kwagh a er nahan ga.”
3 Kpa Davidi za hemen bum, kaa ér: “Teru fa wang je ér mo m doo u ishima,+ nahan una kaa ér, ‘De ôron Yonatan kwagh sha kwagh ne ga; u ôr un yô, ishima a vihi un ker.’ Kpa mimi je er Yehova a lu u uma ne, man er we kpa u lu uma ne, ku ngu ica a mo ga!”+
4 Maa Yonatan kaa a Davidi ér: “Hanma kwagh u u ôr cii me er sha ci wou.”
5 Davidi gema kaa a Yonatan ér: “Kper a lu uwer u he,+ nahan a gba u me za tema vea tor me ya kwagh kpee je; de m yem m za yer ken toho zan zan iyange i sha utar aikighe.
6 Aluer teru nenge a mo ga, man a pine yô, kaa a na wer, ‘Davidi zamber a mo ér m na un ian una za ken gar na ken Betelehem kpase,+ una za kohol ior mba hen tsombor na cii ker vea na nagh ku i ne hanma inyom la.’+
7 Aluer a kaa ér, ‘Doo’ yô, tese ér ngu ken bem a wanye wou. Kpa aluer ishima vihi un ker yô, fa je wer a kange ishima u bulan mo.
8 Tese wanye wou erdoo+ sha ci u u ya ikyur a wanye wou sha ishigh ki Yehova.+ Kpa aluer m er kwaghbo yô,+ wuam iyol you. De nem sha ikyev i teru wer a wuam ga.”
9 Maa Yonatan kaa ér: “Mayange me hen imbakwagh la sha iyol you ga! Aluer m fa mer terem kange ishima u bulan we yô, me ôr u gaa?”+
10 Nahan Davidi pine Yonatan ér: “Aluer ishima vihi teru a mo yô, ka an nana va ôromo?”
11 Yonatan gema kaa a Davidi ér: “Va se za ken toho.” Maa ve uhar cii ve due ve za ken toho.
12 Nahan Yonatan kaa a Davidi ér: “Yehova Aôndo u Iserael a lu shiada, aluer kper er shighe ne nahan, shin sha iyange i sha utar la m pine terem kwagh sha kwagh ne ga yô. Aluer a wa ishima u eren Davidi kwaghbo ga yô, me tindi a loho hen a we me pase u.
13 Kpa aluer terem wa ishima u bulan we, man m pase u kwagh ne ga, shi m de u, u yem bem bem ga yô, Yehova a tsaha Yonatan tsung. Yehova a lu a we,+ vough er yange lu a terem nahan.+
14 Shi tesem dooshima u Yehova a tesen la, er m lu uma ne, man shighe u me va kpe la je kpaa.+
15 Aluer Yehova va ese mbahyomov mba Davidi cii sha tar kera je kpa, mayange de deen u tesen ya wam dooshima ga.”+
16 Tsô Yonatan ya ikyur a ya u Davidi, kaa ér, “Yehova una tsaha mbahyomov mba Davidi.”
17 Nahan Yonatan na Davidi shi bum u tesen ér un doo Davidi ishima, gadia Davidi doo Yonatan ishima er iyol na nahan.+
18 Yonatan maa kaa a na ér: “Kper a lu uwer u he,+ nahan terem una ker u sha ci u kwaghteman wou una lu gbilin.
19 Sha iyange i sha utar la, terem una hemba keren we cii, nahan a gba u u za yer hen ijiir i yange u vande za yeren iyange igen la,* ikyua a iwen i i lu heen ne.
20 Maa me ker avaan atar hen vegher ugen u iwen la er m ngu keren me ta ma kwagh nahan.
21 Me tindin wanye wam yô, me kaa mer, ‘Za, za ker avaan la.’ Aluer m kaa a wanye wam la mer, ‘Nenge! Avaan la nga vegher u u til la, za tôô a va a mi’ yô, u fatyô u hiden sha ci u mimi je er Yehova a lu u uma ne, a tese ér bem ngu shi zayol ngu ga.
22 Kpa aluer m kaa a wanye wam la mer, ‘Nenge! Avaan la nga u ken hemen’ yô, yem sha ci u Yehova soo ér we u yem.
23 Kpa hide iceghzwa i mo man we se er la yô,+ Yehova a lu hen atô wase gbem sha won.”+
24 Tsô Davidi za yer ken toho. Uwer u he ngu va dugh yô, tor za tema sha ikyônough nagh u yan kwaghyan.+
25 Tor tema sha ikyônough nagh ki vanden teman sha mi la ikyua a kpekpe. Yonatan tema na ishigh sha a na, Abiner+ di tema dondo a Saulu, kpa kwaghteman u Davidi yô lu gbilin.
26 Saulu ôr kwagh môm sha iyange la ga, sha ci u kaa ken ishima na ér: ‘Ma kwagh er, nahan ngu wang ga.+ Een, a̱ shi nan kpa ngu wang ga.’
27 Iyange i uwer u he la kar, sha iyange i sha uhar la kpa kwaghteman u Davidi lu gbilin her. Saulu maa pine wan na Yonatan ér: “Er nan ve nyen wan u Yese+ va ya kwagh ga, shi nyian kpa a ve ga?”
28 Yonatan gema kaa a Saulu ér: “Davidi zamber a mo ér mo m na un ian una za ken Betelehem.+
29 A kaa ér, ‘Wea lumun yô, nam ian m za sha ci u tsombor wam ngu nan nagh ken gar, nahan anmgbian wam kaa ér mo m za. Aluer doo u a mo yô, de m za kpase m za nenge a anmgbianev av.’ Ka nahan ve a ve hen tebul u tor ga ye.”
30 Maa ishima vihi Saulu a Yonatan tsung, nahan a kaa a na ér: “We wan u kwase u hemban ato ne; u hen wer m fa er u lu tan ikyaa a wan u Yese, heen iyol you kua ngôu gaa?*
31 Er wan u Yese a lu uma ne, we man tartor wou ne lu gbem ga.+ Nahan tindi or nana za va a na hen a mo sha ci u gba u una kpe keng.”+
32 Nahan kpa, Yonatan kaa a ter na Saulu ér: “Gba u una kpe sha ci u nyi?+ Ka nyi a ere?”
33 Maa Saulu ker iwange ér i tume un,+ nahan Yonatan fa je ér ter na kange ishima u wuan Davidi.+
34 Fese je, Yonatan kighir mough hen tebul la sha ishimavihin, nahan ya kwagh môm sha iyange i sha uhar i uwer u he la ga, gadia ishima vihi un sha ci u Davidi,+ man er ter na hee Davidi yô.
35 Yonatan nderen pepe yô, a due a yem ken toho er vande ôron a Davidi nahan; wanye ugen u eren un tom lu vea na.+
36 Maa a kaa a wanye na la ér: “Wea lumun yô, yevese za ker avaan a me ker la.” Wanye la karen ayem yô, Yonatan ker ivaan ken hemen na.
37 Wanye la za nyer ape Yonatan ker ivaan la yô, Yonatan pine wanye la genger genger ér: “Ivaan la ngi ken hemen wou gaa?”
38 Yonatan yila wanye la genger genger kaa ér: “Yevese! Za fele! De ngôôr ga!” Maa wanye u Yonatan la za tôô avaan la cin hide hen orvesen na.
39 Wanye la fa kwagh môm sha kwagh ne ga; lu Yonatan man Davidi tseegh ve fa inja i kwagh ne ye.
40 Yonatan maa gema ikyav nav mbi utyaav na wanye na la, kaa a na ér: “Ngohol, yem a mi ken gar.”
41 Wanye la yemen yô, Davidi mough due hen ijiir i yer ica ga, vegher u ken imbusutariyan la. A gure a cir ishigh inya shi a ngurum kwa tar, maa ve suse ayol a ve zwa shi ve vaa ayol a ve, kpa Davidi hemba vaan cii.
42 Yonatan kaa a Davidi ér: “Za bem bem sha ci u se bum+ ken iti i Yehova se kaa ser: ‘Yehova a lu hen atô wou man mo, kua hen atô u ônov ou* man ônov av* gbem sha won.’”+
Maa Davidi mough yem, Yonatan di hide yem ken gar.
