Samuel u Hiihii 1:1-28
1 Yange orgen lu ken Ramataim-sofim*+ hen haregh u iwoogh u Eferaim.+ I yilan un ér Elkana,+ un lu wan u Yeroham, wan u Elihu, wan u Tohu, wan u Sufi, Oreferaim.
2 Or ne lu a kasev uhar; i yilan u môm ér Hana, i yilan ugen la ér Penina. Penina lu a ônov, kpa Hana yô, lu a wan ga.
3 Or ne a mough hen gar na hanma inyom, a kôndo a za ken Shilo,+ u za civir Yehova u akum a sha* shi nan un nagh. Ka hen ijiir ne ônov mba Eli mba nomso mba uhar, Hofeni man Pinehashi,+ eren Yehova tom u pristi+ ye.
4 Iyange igen Elkana ne nagh yô, a pande inyam i na nagh a mi la a na kwase na Penina kua mbayev nav mba nomso man mba kasev cii.+
5 Kpa a gema a na Hana cinyam i hemban doon la, sha ci u Hana hemba doon un ishima, kpa Yehova na Hana ônov ga.*
6 Heela tseegh ga, wuhe na a zer nahan un tar sha u vihin un ishima, sha ci u Yehova na Hana ônov ga.
7 Lu kwagh u kwase ne eren hanma inyom je la; hanma shighe Hana una kôndo una za hen iyou i Yehova yô,+ wuhe na a naha un tar kpishi je yô, a vaa, a ya kwagh ga.
8 Kpa nom na Elkana pine un ér: “Hana, er nan u vaana? Man er nan u lu yan kwagh ga? Shi er nan u ure kpishi nahana?* Mo m hemba u ônov mba nomso pue gaa?”
9 Tsô mba ye kwagh shi mba me kwagh hen Shilo mba been yô, Hana due yem. Hen shighe ne, pristi Eli tema sha kwaghteman u lu hen kpandehunda u tempel*+ u Yehova la.
10 Ishima vihi Hana tsung, nahan a gba eren msen hen Yehova+ vaan tsung.
11 Tsô a er iceghzwa ne a kaa ér: “Yehova u akum a sha, aluer u nenge a ican i wanyekwase wou shi u umbur mo, u hungur a wanyekwase wou ga, u na wanyekwase wou wan u nomso yô,+ me gema un me na u Yehova; una er u tom sha ayange a uma na cii, shi atsem una kar un sha ityo ga.”+
12 Er lu eren msen shighe gôgônan sha ishigh ki Yehova la, Eli lu kenger un sha zwa.
13 Hana lu ôron kwagh ken ishima, lu ityumbujôôgh na tseegh lu tenger ye, kpa ikyenge na yô, or ungwa ga. Nahan Eli hen ér ngu hunden msôrom.
14 Tsô Eli kaa a na ér: “U hunde msôrom a kuma shighe nan je? De u man wain wou la.”
15 Ôron nahan yô, Hana kaa ér: “Ei, terem! M ngu kwase u ishima i zem iyol kpishi yô; m ngu hunden wain shin ma kwaghman u i we kwa sha mi ga, kpa m ngu pasen sha ishigh ki Yehova er i lum ken ishima yô.+
16 De nengen wanyekwase wou wer ngu gbilinkwase ga, sha ci u ka ishima i i vihim kpishi man ican i m ye ken ishima tsung la i ne ve, m lam zan zan hegen ye.”
17 Maa Eli kaa ér: “Za bem bem, shi Aôndo u Iserael a na u kwagh u ú sen un la.”+
18 Nahan Hana kaa ér: “I doo u a wanyekwase wou.” Maa kwase la kar yem za ya kwagh, nahan a kera vihi ishigh sha ga.
19 Tsô ve mough pepe pepe, ve za gure sha ishigh ki Yehova. Mba been yô, ve cin ve hide hen ya ve ken Rama.+ Elkana tsa a kwase na Hana, nahan Yehova umbur Hana.+
20 Ken atô u inyom i môm nahan,* Hana wa iyav mar wan u nomso, ii un iti+ ér Samuel,* sha ci u a kaa ér, “ka Yehova m sen un wan ne ye.”
21 Shighe kar yô, Elkana vea ya na cii ve kôndo ve za sha u vea za na Yehova nagh, er ve eren hanma inyom nahan,+ man sha u una na nagh ku tsegha zwa u nan la yô.
22 Kpa Hana yô, kôndo za vea ve ga,+ sha ci u a kaa a nom na ér: “Wannomso ne una deen a de atumba nahan maa, me za a na. Me zaan a na sha ishigh ki Yehova je maa, una lu her zan zan.”+
23 Tsô nom na Elkana kaa a na ér: “Er kwagh u u nenge wer a hemba doon yô.* Lu hen ya zan zan u kar den un atumba. Yô, Yehova a er kwagh u ú kaa la.” Nahan kwase la lu hen ya, nenge sha wan na u nomso la zan zan kar den un atumba.
24 Den a de wan la atumba nahan maa, a tôô un a kôndo a yem a na hen Shilo, shi a za a nombua u lun anyom atar, man mwem efa môm,* kua ityegh ki wain ki vesen,+ a za hen iyou i Yehova hen Shilo,+ a wan na u nomso u cuku la.
25 Tsô ve sôngo nombua la, maa ve za a wannomso la hen Eli.
26 Nahan a kaa ér: “De vihin ishima a mo ga, terem! Mimi je, er u lu uma ne terem, ka mo m lu kwase u yange m tile vea we hen ijiir ne, m er msen hen Yehova la ye.+
27 Yange lu sha ci u wannomso ne, m er msen ye, nahan Yehova nam kwagh u yange m sôn un la.+
28 Hegen ne, mo kpa m ngu geman un nan Yehova. Sha ayange a uma na cii, m na Yehova un.”
Maa a* gure her sha ishigh ki Yehova.
Ngeren mba shin kpe
^ Shin “or u ken Rama, Orsofim.”
^ Shin “guren un inya.”
^ Zwa Heberu, “cir un sagh.”
^ Shin “er nan ishima i vihi u kere?”
^ Ka tabernakel je la.
^ Shin a fatyô u kaan ér, “Shighe kar yô.”
^ Inja na yô ér, “Iti i Aôndo.”
^ Zwa Heberu, “er kwagh u a doo sha ashe a ou la.”
^ Efa môm yange a nôngo u kuman ulita 22. Nenge Ngeren u Seer u B14 la.
^ Ikyav tese ér ka Elkana.
