Samuel u Hiihii 2:1-36
2 Tsô Hana er msen kaa ér:
“Ka mea hen sha kwagh u Yehova yô, i saan ishima yam iyol;+Yehova kende a korough agh sha,*Zwa wam bugh gbangelaa sha mbahyomov av,Sha ci u saan mo iyol a akaa a u er u yiman mo la.
2 Or môm nan ngu icighan er Yehova nahan ga,Orgen ngu ga saa we,+Shi vande môm ngu er Aôndo wase nahan ga.+
3 De ze hemen u lamen sha igbongor ga;Ihyagh i tan tsô kpa i de dugh ken zwa wou ga,Sha ci u Yehova ka Aôndo u lun a mfe,+Shi ka un tseegh ka a pase aluer aeren a ior nga shami, shin nga shami ga ye.
4 I sombo mbaada mba nomso mba ageev vindi vindi,Kpa i na mba ve lu nôngon gbeev la agee.+
5 Mba ve ye kwagh ve idi la vea er ior mbagenev tom sha er vea zua a beredi yô,Kpa mba ijen i ker ve la kera mba ijen ga.+
Ikyômkwase mar ônov utaankaruhar,+Kpa kwase u a lu a ônov mba nomso kpishi la hingir tswen.*
6 Yehova ka a wua, shi a war uma;*Ka a yem a or shin Uwar,* shi a due a nan.+
7 Yehova ka a na or nan gba ican, shi a na or nan lu a kwagh ave;+Ka a hide a or ijime, shi a kende a nan sha.+
8 Ka a dugh or u nan gbe kwagh ga la shin vuulevu kera;Ka a kôr icanor sha tihi u mtuhwe,* a mough a nan sha,+Sha u ve tema vea mbahemenev,A na ve kwaghteman u icivirigh.
Ka Yehova a lu a mtôm ma tar ye,+Nahan a ver tar sha ma.
9 Ka a kura angahar a mba ve civir un sha mimi la,+Kpa a bee a mbaaferev ken ime,+Sha ci u ka sha agee or nan hembe ga.+
10 Yehova una njighe mba ve lu nôngon num a na la;*+Una dura sha a ve, sha aôndo.+
Yehova una ôr ijir zan zan a nyôr sha akighir a tar,+Una na tor na tahav+Shi una kende a korough ku* or na u i shigh un mkurem la.”+
11 Maa Elkana yem hen ya na ken Rama, kpa wannomso la yô, hingir or u eren Yehova tom+ sha ishigh ki Pristi Eli.
12 Hen shighe ne, ônov mba nomso mba Eli mbara lu aferaior;+ ve lu a icivir cuku sha Yehova ga.
13 Ka kwagh u yange ve er a inyam i ior naan upristi je ne:+ Hanma kwa u or nan va ne nagh yô, orwasen pristi nan va a fôôku u vesen u lun anyi atar ken uwe shighe u inyam i lu toghor sha atse la,
14 nan va tume shin gbangi, shin shin tsua u jiidi kwagh a mi u lun ave ahar, shin shin jogobi, gayô shin tsua u jiidi kwagh a mi, u lun uwegh môm. Hanma kwagh u fôôku la a dugh a mi cii, pristi a yem a mi. Ka kwagh u ve eren hen Shilo a hanma Oriserael u nan ve her cii je la.
15 Shi cii man or u nan nagh nana nande ahôm mnyim ma due yô,+ orwasen pristi la a va a va kaa a nan ér: “Na pristi inyam a za mgbagh. Una ngohol inyam i jiidi hen a we ga, saa i kô tseegh.”
16 Or u nan nagh la nana kaan a nan ér: “De ve vande nanden ahôm la mnyim ma due,+ tsô u mase tôôn hanma kwagh u u soo* cii yô,” nan kaa ér: “Ei, nam hegen; gayô, me ngohol sha agee!”
17 Nahan ior mba wasen upristi tom la va hingir u eren zege isholibo sha ishigh ki Yehova,+ sha ci u nomso mbara tese icivir sha nagh ku Yehova ga.
18 Hen shighe ne, Samuel lu eren tom+ sha ishigh ki Yehova; a hua* ikyondo i efodi+ shin er lu wanye u cuku nahan kpaa.
19 Shi ngô na a kor un ikyondo i cuku i lun a ave ga, nahan hanma inyom una vaan vea nom na u va nan nagh ku u i naan hanma inyom+ la yô, a va un a mi.
20 Shi Eli ver Elkana kua kwase na doo doo, kaa ér: “Yehova a na u wan ugen hen kwase ne sha ityough ki wan u u gem u ne Yehova ne.”+ Maa ve hide ve yem ken ya.
21 Tsô Yehova umbur Hana, nahan shi a wa iyav+ a mar ônov mba nomso mbagen utar man mba kasev uhar. Shi Samuel wannomso u cuku la za hemen u vesen sha ishigh ki Yehova.+
22 Hen shighe ne, Eli bee iyol kpishi, kpa gema ungwa hanma kwagh u ônov nav mba nomso lu eren+ a Mbaiserael cii la, kua er ve yav a kasev mba ve eren tom hen hunda u nyôron ken tenti u kohol ker la kpaa.+
23 A kaa a ve ér: “Ne mba eren ambaakaa ne nahan ér nyi? Gadia akaa a m ongo ior cii ve lu ôron sha a ven la ka a bo.
24 De nen kwagh la ônov av. Ibaver i m ongo i lu samber hen atô u ior mba Yehova la ka i dedoo ga.
25 Aluer or er orgen isholibo yô, orgen nana fatyô u zamber a Yehova sha ci u nan;* kpa aluer or er Yehova isholibo yô,+ ka an nana er msen sha ci u nana?” Kpa ve venda u keghen ato a ter ve sha ci u Yehova kange ishima u wuan ve.+
26 Hen shighe ne, Samuel wanyenomso la lu vesen, shi Yehova man ior cii soo kwagh na.+
27 Tsô or u Aôndo ugen va hen Eli va kaa a na ér: “Ka kwagh u Yehova a kaa je ne, ér: ‘Yange m pase iyol yam wang hen ya u teru shighe u ve lu ikpan ken Igipiti, ken ya u Farou+ la gaa?
28 Yange i tsua un ken uipyaven mba Iserael cii+ sha u a lu pristi wam shi a unden sha atse a am+ u za nan iniav shi nanden insensi* shi huan ikyondo i efodi sha ishigh yagh; shi m na ya u teru u tamen iniav mbi Mbaiserael* nanden sha usu la cii.+
29 Er nan ve ne lu tesen icivir sha* nagh agh man sha iyua yam i m kaa mer i naan hen ijiir i m lu ne ga?+ Er nan ve ne lu hemban nan ônov enev mba nomso icivir a mo, sha u yan aci a inyam a hemban doon a hanma nagh ku ior av Iserael ve lu nan la kehene?+
30 “‘Ka nahan ve Yehova Aôndo u Iserael a ôr kwagh ne ye, ér: “Mimi je yange m ôr mer, ya wou man ya u teru u tamen vea zenden sha ishigh yagh hanma shighe.”+ Kpa hegen yô, Yehova ngu kaan nahan ér: “Mayange me de mer kwagh ne a za hemen ga, sha ci u ka mba ve nem icivir la mo kpa me na ve icivir ye,+ kpa mba ve lahan mo yô, a laha ve.”
31 Nenge! Ayange nga van a me bee a agee* a ou man agee a ya u teru, sha er or môm hen ya wou nana tsa zan zan nana bee iyol ga yô.+
32 Er akaa a doon aa lu eren Iserael nahan kpa, we yô, u lu kenger sha orhyom ken iyou yam,+ shi mayange orbeenyol nana kera lu hen ya wou ga.
33 Or wou u me de nana lu eren tom hen atse a am a nan nagh la, nana na ashe a ou aa kera nenge tsembelee ga, shi nana va u a ijungwen,* kpa ior mba hemban iyenge hen ya wou, vea kpe sha sanker u nomsombaiorov.+
34 Shi kwagh u una er ônov ou mba nomso mba uhar, Hofeni man Pinehashi la una lu u ikyav: Ve uhar cii vea kpe sha iyange i môm.+
35 Maa me va a pristi u mimi sha ci wam. Shi nana er kwagh u a lu u sha ishima yam yô;*+ shi me maa iyou i tsôron sha ci u nan, nahan nana zenden sha ishigh ki orwam u i shigh un mkurem la hanma shighe cii.
36 Hanma or u nan shi hen ya wou cii, nana va gure pristi la inya, sha ci u i kimbi nan inyaregh shi i na nan kpenberedi, nana kaa ér: “Wea lumun yô, verem sha ma iantom i pristi, sha er me ya ivurugh ki beredi yô.”’”+
Ngeren mba shin kpe
^ Shin “nam agee.” Nenge Ngeren u Pasen Asember.
^ Zwa Heberu, “uma kera.”
^ Shin “shi a hide a na or uma.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin a fatyô u kaan ér, “uhyôugh.”
^ Shin a fatyô u kaan ér, “A cier mba ve lu hendan kwagh a Yehova la iyol.”
^ Shin “agee a.” Nenge Ngeren u Pasen Asember.
^ Shin “kwagh u a sar u.”
^ Zwa Heberu, “a haa.”
^ Shin a fatyô u kaan ér, “Aôndo una ôr ijir sha ci u nan.”
^ Zwa Heberu, “ônov mba Iserael.”
^ Shin a fatyô u kaan ér, “nanden nagh, mnyim duen kôndon sha.”
^ Zwa Heberu, “tumen nguhar sha.”
^ Zwa Heberu, “uwegh.”
^ Shin “nana na uma a due u ishima.”
^ Shin “u a lum ken ishima yô.”
