Samuel u Hiihii 5:1-12
5 Mbafiliti mba ngohol Areki+ u Aôndo u mimi la hen Ebeneser yô, ve yem a mi hen Ashedodi.
2 Mbafiliti tôô Areki u Aôndo u mimi la va a mi ken iyou i* Dagon, va penda ikyua a Dagon.+
3 Kpernan Mbaashedodi mba nderen pepe yô, ve nenge Dagon gba cir ishigh inya sha ishigh ki Areki u Yehova.+ Nahan ve tôô Dagon ve hide ve ver un hen ijiir na.+
4 Shi mba nderen kpernan pepe yô, ve nenge Dagon gba cir ishigh inya sha ishigh ki Areki u Yehova. Ityough ki Dagon man ave a na cii tôndo gba hen hunda. Lu gundu na u lu er ishu nahan la* mase shin her ye.
5 Ka nahan ve zan zan nyian, upristi mba Dagon man ior mba ka ve nyôr ken iyou i Dagon cii, ve karen hen hunda u Dagon ken Ashedodi ga ye.
6 Uwegh ku Yehova lu num a Mbaashedodi tsung, nahan a ta ior mba ken Ashedodi man uharegh nav angev mbu haan ityô won.+
7 Ior mba Ashedodi mba nengen kwagh u lu zan hemen la yô, ve kaa ér: “De deen nen ner, Areki u Aôndo u Iserael a lu vea vese ga, sha ci u uwegh nagh er kwagh a vese man aôndo wase Dagon vihi je gande.”
8 Nahan ve tindi i za ôr mbahemenev mba Mbafiliti cii ve va kohol imôngo, maa ve pine ve ér: “Ka nyi se er a Areki u Aôndo u Iserael nee?” Ve gema ve kaa ér: “I yem a Areki u Aôndo u Iserael la ken Gati.”+ Tsô ve yem a Areki u Aôndo u Iserael la ker.
9 Mba yemen a mi ker yô, uwegh ku Yehova hingir num a gar la, nahan mciem gba ior mba ken gar la iyol tsung. A tsaha ior mba ken gar la, hii sha mba kiriki zan zan nyôr sha mba vesen, nahan ve haa ityô won.+
10 Tsô ve tindi i yem a Areki u Aôndo u mimi la ken Ekeron,+ kpa Areki u Aôndo u mimi la za nyer ken Ekeron yô, fese je ior i Ekeron gba vaan genger genger kaan ér: “Ve va a Areki u Aôndo u Iserael la hen a vese ér vea wua se man ior asev!”+
11 Tsô ve tindi i za ôr mbahemenev mba Mbafiliti cii ve va kohol imôngo, ve kaa ér: “Tindi i yem a Areki u Aôndo u Iserael la kera; i hide i yem a mi hen ijiir na sha er se man ior asev se kpe ga yô.” Gadia ior mba ken gar la cii, lu cian ér vea va kpe; uwegh ku Aôndo u mimi la lu num a ijiir la tsung,+
12 nahan ior mba ve kpe ga yô, ve gba angev mbu haan ityô won. Mliam ma ior mba ken gar la lu vaan genger genger ér i wase ve la kôndo nyôr sha.
