Samuel u Hiihii 26:1-25
26 Shighe kar yô, nomso mba Shiv+ va hen Saulu hen Gibea+ va kaa ér: “Davidi yer sha igyungu i Hakila i i ne ishigh ken Yeshimon* la.”+
2 Saulu maa mough sen shin taaikyôngo u Shiv a nomso 3,000 mba tsua ken Iserael yô, u za keren Davidi ken taaikyôngo u Shiv.+
3 Saulu haa afo sha igyungu i Hakila i i ne ishigh ken Yeshimon sha kpegbenda la. Hen shighe ne, Davidi lu ken taaikyôngo, nahan ungwa ér Saulu va ken taaikyôngo u va keren un.
4 Tsô Davidi tindi mbagbanmker ér ve za nenge aluer mimi je Saulu va yô.
5 Davidi maa za hen ijiir i Saulu haa afo la, nahan Davidi nenge ape Saulu man Abiner+ wan u Ner kurutya u ikyumutya na ve yav ve gba mnyam la; Saulu yav hen atô u afo la gba mnyam, mbautyaav mbara cii gema kase un ningir tser.
6 Davidi maa pine Ahimeleki Orhiti+ la, man Abishai+ wan u Seruya+ anmgbian u Yoabi ér: “Ka an nana sen vea mo se za hen Saulu ken afoo?” Abishai gema kaa ér: “Mo me sen me za vea we.”
7 Tsô Davidi man Abishai za hen mbautyaav mbara tugh, maa ve nenge Saulu yav gba mnyam hen atô u afo la, i gema i tume iwange na hen inya ikyua a ityough nagh; Abiner man mbautyaav mbara cii yav kase un ningir tser.
8 Abishai maa kaa a Davidi ér: “Aôndo na orhyom wou sha ikyev you nyian.+ Wea lumun yô, de m kuma un iwange ne, kwa môm tseegh i kar i kôr shin inya, me kuma kwa har ga.”
9 Nahan kpa, Davidi kaa a Abishai ér: “De bulan un ga, sha ci u ka an nana bula or u Yehova a shigh nan mkurem+ ve nana lu a ishô sha wono?”+
10 Davidi shi kaa ér: “Mimi je er Yehova a lu u uma ne, Yehova iyol na una wua un+ shin iyange na ia va,+ nahan una kpe, shin una sen a za ityav, maa una za kpe ker.+
11 Aluer m bula or u Yehova a shigh nan mkurem yô, mayange a doo Yehova a mo ga!+ Wea lumun yô, tsua iwange i i lu ikyua a ityough nagh la, shi tôô isheghmnger la kar se yem.”
12 Nahan Davidi tsua iwange shon, shi tôô isheghmnger i i lu ikyua a ityough ki Saulu la, maa ve yem. Or môm nenge a ve ga,+ shin nan fa er ve ve shin nan nder kpaa ga, sha ci u ve cii ve gba mnyam, gadia Yehova haa ve mnyam ve yav mem mem.
13 Maa Davidi per za tile yande la ica sha ityough ki woogh, a undu ian hen atô ve gbangelaa.
14 Tsô Davidi yila mbautyaav mbara, man Abiner+ wan u Ner genger genger, kaa ér: “Abiner, u ngu ungwan mo kpa?” Abiner gema kaa ér: “Ka we an u yilan toro?”
15 Maa Davidi pine Abiner ér: “U ngu nomsoor gaa? Man ka an nan lu er we nahan ken Iserael? Er nan u kor teru tor ga? Gadia orshoja ugen a ve u va wuan teru tor.+
16 Kwagh u u er ne doo ga. Mimi je, er Yehova a lu u uma ne, u kuma ku sha ci u u kura teru, un u Yehova a shigh un mkurem la ga.+ Gema kenger ase! Iwange i tor man isheghmnger+ na mba ashen ve lu ikyua a ityough nagh la mba hana?”
17 Nahan Saulu kav er lu ikyenge i Davidi yô, maa a pine ér: “Davidi wan wam, ka ikyenge you nee?”+ Davidi gema kaa ér: “Ka ikyenge yam terem tor.”
18 Davidi shi kaa ér: “Er nan terem a zendan wanye naa?+ Ka nyi m ere, man ibo yam ka nyi?+
19 Terem tor, wea lumun yô, kegh ato a mkaanem ma wanye wou: Aluer ka Yehova a mgbegha u ér we u va ta num sha a mo yô, a lumun nagh agh ku* samuyia. Kpa aluer ka ior ve mgbegha u ér u ta num sha a mo yô,+ ifyan i kôr ve sha ishigh ki Yehova, sha ci u ve zendam nyian ér m de kera lu vea ior* mba Yehova imôngo ga,+ ve kaa ér, ‘Yem, za civir mbaaôndo mbagen!’
20 Nahan hegen, de deen wer awambe a am a haa hen inya ica a ishigh ki Yehova ga, sha ci u tor u Iserael due ngu keren an-paregh môm.+ Ka inja er ngu zendan ikyuna sha iwo nahan.”
21 Saulu gema kaa ér: “M er isholibo.+ Davidi wan wam hide, sha ci u me kera bula u ga, gadia u nenge wer uma wam gba kwagh+ sha iyange ne. Sha mimi yô, m er kwagh sha ibume, shi m er kwagh sha lan je gande.”
22 Davidi maa kaa ér: “Nenge, iwange i tor i ngin. Or môm ken agumaior la nana va ngohol i.
23 Ka Yehova una kimbi hanma or sha perapera u nan,+ man sha jighjigh u nan ye, sha ci u Yehova na u sha ikyev yam nyian, kpa m venda u bulan un u Yehova a shigh un mkurem la.+
24 Nenge! Er ashen uma wou a gbem kwagh nyian nahan, kape uma wam kpa una gba kwagh sha ishigh ki Yehova je la, shi a yimam ken hanma ican cii.”+
25 Saulu gema kaa a Davidi ér: “Aôndo a ver u Davidi wan wam. U er uzegembaakaav kpee a bunde ga, shi u hemba kpee a bunde ga.”+ Maa Davidi kar yem kwagh na, Saulu di hide yem hen ijiir na.+
