Samuel u Hiihii 24:1-22
24 Saulu yange za zende Mbafiliti, hidi a hide nahan maa ve kaa a na ér: “Nenge! Davidi ngu ken taaikyôngo u En-gedi.”+
2 Tsô Saulu mough vea nomso 3,000, mba i tsua ken Iserael cii yô, yem u za keren Davidi man ior nav sha ijiir i avandegh ape ivo i sha uwo lu la.
3 Er Saulu lu yemen sha gbenda la, a za nyôr hen atôrayôngo a sha awen hen ape bar ugen lu yô, maa a nyôr ker ér una wanger iyol.* Hen shighe ne, Davidi vea ior nav di tema ken ijime i bar la ken atô.+
4 Ior i Davidi kaa a na ér: “Ka kwagh u Yehova a lu kaan a we nyian je ne, ér: ‘Nenge! M ngu nan orhyom wou sha ikyev you,+ nahan er a na er u nenge i doo u la cii.’” Maa Davidi mough ving za tôndo tsumbur u ikyondo i Saulu i lun a ave ga la.
5 Kpa Davidi been yô, ishima* na gba nan un ibo+ er un tende tsumbur u ikyondo i Saulu i lun a ave ga la yô.
6 A ôr a ior nav ér: “Doo u me er kwagh ne a orvesen wam ga, sha ci u ngu or u Yehova a shigh un mkurem yô. Aluer m bula un u Yehova a shigh un mkurem la yô,+ mayange a doo Yehova ga.”
7 Maa Davidi ôr mkaanem mara u vendan kwagh a ior nav,* nahan a lumun ér ve bende Saulu ave ga. Saulu gema due ken bar la yem kwagh na.
8 Tsô Davidi mough due ken bar la za yila Saulu genger genger, kaa ér: “Terem tor!”+ Saulu gem ashe ken ijime yô, Davidi ngurum wa ityough inya, maa a sen a yav inya.
9 Davidi maa pine Saulu ér: “Er nan u lu keghen ato a kwagh u ior ve lu ôron ér, ‘Nenge! Davidi ngu keren u bulan we’ laa?+
10 U nenge sha ashe a ou nyian, er Yehova a ne u sha ikyev yam ken bar yô. Kpa shighe u orgen kaa ér mo m wua u yô,+ m zungwe u mhôônom, m kaa mer, ‘Me bula terem ga, sha ci u ngu or u Yehova a shigh un mkurem yô.’+
11 Shi nenge terem, een, nenge tsumbur u ikyondo you i lun a ave ga ngin m ker ken uwe ne; sha ci u shighe u m tôndo tsumbur u ikyondo you i lun a ave ga la m wua u ga. Nahan hegen u nenge shi u kav er m we ishima u bulan we shin hemban we ato ga yô, shi m er u kwaghbo ga,+ kpa we yô, u ngu keren wer u wuam.+
12 Yehova a ôr ijir hen atô wou a mo,+ shi Yehova a or iyev sha a we sha ci wam,+ kpa mo yô, me bende u ave ga.+
13 Er injakwagh i tsuaa igen i kaa nahan, ‘Iferkwagh ka i due hen iferor,’ kpa mo yô, me bende u ave ga.
14 Ka an tor u Iserael a dugh a lu kerene? Ka an u lu zendana? Ka iwa i kpene? Ka an-paregh mômôô?+
15 Yehova a lu se orjir, a ôr ijir hen atô wou a mo, shi a nenge, nahan a paam iyol;+ shi a ôr ijir yam, a yimam sha ikyev you.”
16 Davidi ôron akaa ne been nahan maa, Saulu kaa ér: “Davidi wan wam, ka ikyenge you nee?”+ Maa Saulu gba vaan genger genger.
17 A kaa a Davidi ér: “Perapera wou hemba u wam sha ci u u er a mo doo doo, kpa m gema m er u ifer.+
18 Een, u ôrom nyian ne er u er kwagh u dedoo a mo, u wuam ga, shin er Yehova a nem sha ikyev you nahan kpaa.+
19 Ka an or je nana zua a orhyom u nan ve, nana de nan ér nana yem a u bulan nan shio? Yehova a na u injar i dedoo+ sha kwagh u u er a mo nyian ne.
20 Nahan nenge! M fa u tema tor keng a bunde ga,+ shi tartor u Iserael ua lu sha ikyev you shighe gôgônan.
21 Nahan bum a mo ken iti i Yehova+ wer u ese ônov* av kera shighe u me kera lu ga la ze, shi u bee a iti yam hen ya u terem kera kpaa ga.”+
22 Tsô Davidi bum a Saulu, mba been yô, Saulu hide yem ken ya.+ Kpa Davidi man ior nav yô, ve kôndo ve yem ape ve yer la.+
