Samuel u Hiihii 7:1-17
7 Tsô nomso mba Kiriati-yearim va, va tôô Areki u Yehova kôndo yem a mi hen ya u Abinadabi+ u lu sha igyungu la, maa ve tsegha wan na u nomso Eleasar ér a kuran Areki u Yehova la.
2 Hii sha iyange i i va a Areki ken Kiriati-yearim la, kohol cii yô anyom kar 20. Hen shighe la, ya u Iserael cii hii u keren* Yehova.+
3 Tsô Samuel kaa a ya u Iserael cii ér: “Aluer ne mba hiden hen Yehova a ishima yen cii yô,+ bee nen a mbaaôndo mbagen+ man ieev mbi Ashetaroti+ hen atô wen kera, gema ishima yen cii ver nen sha Yehova; civir nen un tseegh,+ nahan una yima ne sha ikyev i Mbafiliti.”+
4 Tsô Mbaiserael haa ieev mbi Baal man ieev mbi Ashetaroti kera, hide lu civir Yehova tseegh.+
5 Maa Samuel kaa ér: “Kohol Mbaiserael cii hen Misepa,+ nahan me er msen hen Yehova sha ci wen.”+
6 Tsô ve kohol imôngo hen Misepa, maa ve kese mngerem ve haa hen inya sha ishigh ki Yehova, shi ve hôr kwaghyan sha iyange la.+ Ve kaa her ér: “Se er Yehova isholibo.”+ Maa Samuel gba ôron Mbaiserael ijir+ hen Misepa.
7 Mbafiliti mba ongo ér Mbaiserael kohol imôngo hen Misepa yô, mbahemenev mba Mbafiliti+ mough kôndo u za tan ityav sha Iserael. Mbaiserael mba ongo kwagh ne yô, cier ve iyol sha ci u ve lu cian Mbafiliti.
8 Tsô Mbaiserael kaa a Samuel ér: “De deen u yilan Yehova Aôndo wase wer a wase se+ shi a yima se sha ikyev i Mbafiliti ga.”
9 Maa Samuel kôr waniyôngo u man atumba na Yehova nagh ku nanden a mi jimin+ cii; shi Samuel yila Yehova sha ci u Mbaiserael ér a wase ve, nahan Yehova ungwa un.+
10 Er Samuel lu nan nagh ku nanden la, Mbafiliti mough lu van u va tan ityav sha Iserael. Tsô Yehova dura+ sha Mbafiliti taver taver sha iyange la, nahan a na anzughul gba hen atô ve,+ maa ityav hemba ve sha ishigh ki Iserael.+
11 Nahan nomso mba Iserael mough ken Misepa gba zendan Mbafiliti wuan ve, ve wua ve zan zan nyôr hen Bete-kar, vegher u ken imbusutariyan la.
12 Tsô Samuel tôô iwen+ za penda hen atô u Misepa man Yeshana, maa a ii i iti ér Ebeneser* sha ci u a kaa ér: “Yehova wase se zan zan hegen.”+
13 Sha nahan yô, ityav hemba Mbafiliti, nahan ve kera shi hide ve va nyôr hen haregh u Iserael ga;+ shi uwegh ku Yehova za hemen u lun num a Mbafiliti sha ayange a Samuel la cii.+
14 Shi agar a Mbafiliti yange ve ngohol hen Iserael la, i hide a mi i na Iserael, hii hen Ekeron yem hen Gati, shi Iserael ngohol haregh na u lu sha ikyev i Mbafiliti la.
Shi bem gba hen atô u Iserael man Mbaamor.+
15 Samuel za hemen u ôron Iserael ijir sha ayange a uma na cii.+
16 Hanma inyom yô, a zende a sôr ningir u Betel+ man Gilgal+ kua Misepa,+ a ôron Iserael ijir sha ajiir ne cii.
17 Kpa a hide a yem ken Rama+ sha ci u ya na lu ker, shi her kpa a ôr Iserael ijir. Yange maa Yehova atse a nan nagh her.+
