Samuel u Hiihii 13:1-23
13 Saulu yange lu anyom . . .* shighe u hingir tor la,+ nahan a hemen Iserael anyom ahar.
2 Saulu maa tsua nomso mba ken Iserael 3,000; iorov 2,000 ken a ve lu vea Saulu hen Mikemashi man hen haregh u iwoogh u Betel la; iorov 1,000 gema lu vea Yonatan+ hen Gibea+ u Benyamin. Maa a kaa a ior mba ve mase shin la ér hanma or nana hide nana yem hen tenti u nan.
3 Tsô Yonatan wua ikyumutya i Mbafiliti+ i i lu hen Geba la,+ nahan Mbafiliti za ungwa kwagh ne. Maa Saulu tôngo korough+ ken tar la cii, kaa ér: “Mbaheberu ve ungwa!”
4 Mbaiserael cii ungwa kwagh ne, ér: “Saulu wua ikyumutya i Mbafiliti, nahan Mbafiliti kôr Mbaiserael ihyom.” Tsô i yila ior ér ve za hen Gilgal+ ve za dondo Saulu ijime.
5 Mbafiliti kpa kohol imôngo u nôngon ityav a Iserael, ve lu a akekeautya 30,000 man mbahendananyinya 6,000, man mbautyaav ngee er waarawa u hen kpezegemnger nahan;+ maa ve kôndo ve za haa afo hen Mikemashi, Bete-aven+ gema lu vegher u sha ityoughkitaregh.
6 Nahan nomso mba Iserael nenge ér mba ken zayol sha ci u ve nyôr ken mlu u hagher kpishi; nahan ior za yer ken ubar+ man ken ijô man ken avande, man shin ahungwa, kua shin azôr.
7 Mbaheberu mbagen je yô, per Yordan yem ken tar u Gadi man Gileadi.+ Kpa Saulu yô, lu hen Gilgal her, shi ior mba ve lu dondon un ijime la cii lu gbidyen akarkase iyol.
8 Saulu za hemen u keghen zan zan ayange ataankarahar a Samuel ver la, kpa Samuel va hen Gilgal ga, shi ior lu samben undun un.
9 Ken masejime yô, Saulu kaa ér: “Vam nen a nagh ku nanden man iniav mbi bem mbira.” Maa a na nagh ku nanden kura.+
10 Kpa Saulu ne nagh ku nanden kura been a bee nahan maa, Samuel va nyôr. Saulu maa mough za kegh un gbenda shi ver un doo doo.
11 Tsô Samuel pine ér: “Ka nyi kwagh u er nee?” Saulu gema kaa ér: “M nenge ior lu undun mo,+ shi we kpa u va sha shighe u yange u ver la ga, shi Mbafiliti lu kohol imôngo hen Mikemashi.+
12 Nahan m kaa ken ishima yam mer, ‘Hegen Mbafiliti vea sen vea va ta ityav sha a mo hen Gilgal, man yô, m ngu a sôn iveren i Yehova kpaa ga.’* Nahan ashen m nenge mer gba hange hange u me na nagh ku nanden.”
13 Tsô Samuel kaa a Saulu ér: “U er ibumekwagh. U kura tindi u Yehova Aôndo wou a we u ga.+ Wea kor tindi u Yehova yô, ma a ne tartor wou ma u taver, ma u lu gbem ken Iserael.
14 Kpa hegen yô, tartor wou ua lu gbem ga.+ Yehova una ker orgen u nan lu sha ishima na vough yô;+ Yehova una ver nan, nana lu orhemen u ior nav+ sha ci u u er kwagh u Yehova yange kaa ér we u er la ga.”+
15 Nahan Samuel mough hen Gilgal kôndo yem hen Gibea u Benyamin, maa Saulu ôr iyengeior; nomso mba ve lu vea na her la kuma er iorov 600 nahan.+
16 Saulu man wan na Yonatan, kua ior mba ve lu vea ve her la, lu ken Geba+ u Benyamin, Mbafiliti di gema haa afo hen Mikemashi.+
17 Maa ikweshojaa itiar i yan ishar, i due ken afo a Mbafiliti. Kwe u hiihii u kar sha gbenda u zan Ofera la u yem ken tar u Shual;
18 Kwe u sha uhar u yem sha gbenda u Bete-horon;+ kwe u sha utar di u yem sha gbenda u zan hen ikighir i i lu shin pev u Seboim, vegher u ken taaikyôngo la.
19 Yange orvareniwa môm nan lu ken tar u Iserael ga, sha ci u Mbafiliti kaa ér: “Sha er Mbaheberu ve de fetyô u varen sanker shin iwange ga yô.”
20 Nahan i gba u Mbaiserael cii vea sen shin Mbafiliti ve, vea za tsaase indihar shin udiga shin azembe, gayô vea wua uloji vev ye.
21 Yange i kimbi pim* môm u tsaase shin wuan indihar shin udiga shin ikyav mbi tomov mbi lun anyi atar shin azembe, shin sôron iyôgh ki huren ibua a mi.
22 Nahan sha iyange la, or môm ken ior mba ve lu vea Saulu man Yonatan la, lu a sanker shin iwange ken uwegh ku nan ga;+ lu Saulu man wan na Yonatan tseegh ve lu a ikyav mbi tswamev ye.
23 Hen shighe ne, ikyumutya i Mbafiliti due yem hen ijiir i peren, shin pev u Mikemashi la.+
