Samuel u Hiihii 30:1-31
30 Davidi man ior nav mba hidi mba va nyer hen Shikelagi+ sha iyange i sha utar la yô, Mbaamaleki+ va ta ityav sha Negebi* man Shikelagi; ve ta ityav sha Shikelagi ve nande un sha usu.
2 Ve kôr kasev+ man mba ve lu ker cii hii sha mbayev zan zan nyôr sha mbaganden. Ve wua or môm ga, kpa ve gema ve kura ve ve lu yemen a mi.
3 Davidi man ior nav mba va nyer ken gar yô, ve nenge i nande un shi i kura kasev vev man ônov vev mba nomso kua ônov vev mba kasev i yem a mi uikyangen.
4 Tsô Davidi man ior mba ve lu vea na la gba vaan genger genger; ve vaa zan zan je yô ve kera lu a agee a vaan ga.
5 Kasev mba Davidi mba uhar mbara kpa i yem a ve uikyangen; lu Ahinoam kwase u ken Yesereel man Abigail kwasecôghol u Nabal Orkarmel la.+
6 Ishima za Davidi iyol kpishi sha ci u ior mbara lu kaan ér vea ta un awen, gadia ishima vihi ior mbara cii ker kpishi er ônov vev mba nomso man ônov vev mba kasev ve saa yô. Kpa Davidi zua a agee hen Yehova Aôndo na.+
7 Davidi maa kaa a pristi Abiatar+ wan u Ahimeleki ér: “Wea lumun yô, va a ikyondo i efodi la heen.”+ Nahan Abiatar va a efodi la hen Davidi.
8 Tsô Davidi pine Yehova ér:+ “M zenda ior mbayan ishar mbara ijimee? Me fatyô u zendan ve kôronôô?” Nahan a kaa a Davidi ér: “Zenda ve ijime sha ci u u zenda ve u kôr kpee a bunde ga, shi u yima ior ou.”+
9 Fese je Davidi mough a nomso 600+ mba ve lu vea na la ve gba yemen; ve yem zan zan ve za ar hen Uwagh u Besor, maa ve undu nomso mbagen hen ijiir la.
10 Davidi vea nomso 400 za hemen u zendan mbayanishar mbara ijime, kpa nomso 200 vôr gande u peren Uwagh u Besor, nahan i undu ve her.+
11 Tsô ve za zua a Origipiti ugen ken toho, maa ve tôô un ve va a na hen Davidi. Ve na un kwaghyan ér a ya, man mngerem ér a ma,
12 kua vegher u ijen i atam a tur a uman a i kam yô, man azen a atam a wain a uman ahar. Ye been yô, a hide a zua a agee* sha ci u ya kwagh môm ga, shin ma mngerem kpaa ga kuma ayange atar man aime atar.
13 Davidi maa pine un ér: “U ngu wanye u ana? Man ka han u dughu?” A gema a kaa ér: “M ngu Origipiti; m ngu kpan u Oramaleki ugen, kpa orvesen wam undum sha ci u m gba angev ayange kar atar hegen.
14 Yange se za ta ityav sha Mbakereti vegher u ken imbusutariyan* la,+ man sha haregh u Yuda man sha Kalebu vegher u ken imbusutariyan* la,+ shi se nande Shikelagi sha usu.”
15 Nahan Davidi pine un ér: “U fatyô u hemen mo gbenda zan a mo hen mbayanishar mbara jee?” A gema a kaa ér: “Aluer u bum a mo ken iti i Aôndo wer u wuam ga, shi u nam sha ikyev i orvesen wam ga yô, me hemen we gbenda me za a we hen mbayanishar mbara.”
16 Tsô a hemen un gbenda a za a na ape ve haa gbir gbir ken tar la cii la; ve lu eren iniongo yan kwagh shi man kwagh sha ci u zegeishar u ve ya ken tar u Mbafiliti man tar u Yuda la cii.
17 Maa Davidi wua ve hii sha use zan zan kpernan aikighe; nomsoor môm war ga,+ saa di nomso mba 400, mba ve yevese sha urakumi ve yem la tseegh.
18 Davidi hide ngohol akaa a Mbaamaleki kura la cii,+ shi Davidi war kasev nav mba uhar mbara.
19 Kwagh ve môm saa ga, hii sha akaa a kiriki zan zan nyôr sha akaa a vesen. Ve hide ve ngohol ônov vev mba nomso man ônov vev mba kasev man ishar i ve ya la;+ Davidi hide ngohol hanma kwagh u yange ve yem a mi la cii.
20 Tsô Davidi kura iyôngo man ibua la cii; ior mba Davidi lu kumban i yemen a mi sha hemen, ilev vev gema lu van ken ijime. Ve kaa ér: “Ka ishar i Davidi je ne.”
21 Tsô Davidi hide va hen ior mba 200 mba ve vôr gande u zan vea Davidi imôngo mba i undu ve hen Uwagh u Besor la;+ maa ve due u va kohol Davidi man ior mba ve lu vea na la. Davidi ze ikyua a nomso mbara yô, a pine ve er ve lu yô.
22 Nahan kpa, udangmbaiorov man agbilinaior ken ior mba ve za vea Davidi la cii kaa ér: “Er ve ze vea vese ga yô, se na ve kwagh môm ken ishar i se za ngohol se hide a mi la ga, kpa hanma ve nana tôô kwase u nan man ônov mba nan mba nomso nana yem kwagh u nan.”
23 Kpa Davidi kaa a ve ér: “Anmgbianev av, mayange de eren nen imbakwagh ne a kwagh u Yehova a ne se la ga. A kura se shi a na mbayanishar mba ve va te num sha a vese la sha ikyev yase.+
24 Ka an je nana lumun a ven ér ne er kwagh ne? A kar kwar a na or u nan ze ityav la, man or u nan tem nan lu nengen sha uikya la cii kwagh môm.+ Hanma or nana zua a kwar ken ishar ne.”+
25 Nahan hii sha iyange la zan zan yem hemen, a na kwagh ne hingir gbenda u eren kwagh man tindi ken Iserael zan zan nyian.
26 Davidi za hidi ken Shikelagi yô, a tindi a akaa agen ken ishar i i ya la ér i za na mbatamen mba Yuda mba ve lu azende a na la, a kaa ér: “Ka iyua* i m lu nan ne ken ishar i i ye mbahyomov mba Yehova je ne.”
27 A tindi a mi i za na ior mba ken Betel,+ man mba ken Ramoti u Negebi,* man mba ken Yatir,+
28 man mba ken Aroer, man mba ken Shifemoti, man mba ken Eshetemoa,+
29 man mba ken Rakal, man mba ken agar a Mbayerameel,+ man mba ken agar a Mbakeni,+
30 man mba ken Horma,+ man mba ken Borashan, man mba ken Ataki,
31 man mba ken Heberon,+ kua sha ajiir a Davidi man ior nav zaan her hanma shighe la cii.
