Samuel u Hiihii 11:1-15
11 Tsô Nahashi, Oramon,+ kôndo za haa afo hen Gileadi sha u tan ityav sha Yabeshi.+ Nahan ior i Yabeshi cii kaa a Nahashi ér: “Ya ikyur* a vese, nahan se eren we tom.”
2 Maa Nahashi, Oramon la kaa a ve ér: “Me ya ikyur a ven aluer ne er kwagh ne yô: hanma wen yô, a ongor nan ishe i ken iyan. Me er kwagh ne sha u heen Iserael cii.”
3 Mbatamen mba Yabeshi gema kaa a na ér: “Na se ayange ataankarahar sha er se tindi mbaôron-loho hen haregh u Iserael cii yô. Nahan aluer or ngu u yiman se ga yô, se hingir sha ikyev yen.”
4 Shighe kar yô, mbaôron-loho mbara va nyôr hen Gibea,+ gar u Saulu la, maa ve ôr mkaanem man ior ungwa, nahan ior cii vaa genger genger.
5 Kpa Saulu lu kurun ken ityev, kumban ikyumuile van ken ijime, maa Saulu pine ér: “Ka nyi i ze ior iyolo? Er nan ve vaana?” Tsô ve ôr un mkaanem ma ior i Yabeshi mara.
6 Saulu ongo mkaanem man yô, jijingi u Aôndo na un agee,+ nahan ishima vihi un pev.
7 Tsô a kôr anomabua ahar, a bur a ker aci aci, a tindi mbaôron-loho, za a mi hen haregh u Iserael cii, ve kaa ér: “Hanma or u nana dondo Saulu man Samuel ga cii, nana fa ér ka kwagh u a er a ibua i nan je ne!” Nahan mciem ma Yehova gba sha ior cii, maa ve er kwagh gungur môm.*
8 Tsô a ôr iyenge ve hen Beseki; Mbaiserael lu nomso 300,000, Mbayuda di lu nomso 30,000.
9 Maa ve kaa a mbaôron-loho mba ve va la ér: “Ka kwagh u u ôr a ior i Yabeshi i ken Gileadi je ne, ‘Kper iyange ia taan gyaang yô, a yima ne.’” Maa mbaôron-loho mbara yem za ôr ior i Yabeshi kwagh ne, nahan saan ve iyol kpishi.
10 Ior i Yabeshi gema kaa ér: “Kper se hingir sha ikyev yen, nahan er nen kwagh u ne nenge i doo ne u eren a vese la cii.”+
11 Kpernan yô, Saulu pav ior ker ikwe itiar, maa ve kar ve yem hen atô u afo la, sha shighe u kura u sha use* la, ve za wua Mbaamon+ zan zan iyange sha tembe. Ior mba ve war mbara sambe, je yô, iorov uhar kera fatyô u lun imôngo ga.
12 Maa ior kaa a Samuel ér: “Ka unô yange ve lu kaan ér, ‘Saulu kuma u teman tor sha a vese ga?’+ Va a ior mbara se wua ve kera.”
13 Nahan kpa, Saulu kaa ér: “I de woo or môm sha iyange ne ga,+ sha ci u Yehova yima Iserael nyian.”
14 Shighe kar yô, Samuel kaa a ior ér: “Va se za nen hen Gilgal,+ se za kimbir veren nen Saulu tor.”+
15 Tsô ior cii yem hen Gilgal, ve za ver Saulu tor sha ishigh ki Yehova, hen Gilgal. Maa ve na iniav mbi bem her sha ishigh ki Yehova,+ nahan Saulu man Mbaiserael cii ember kpishi.+
