Samuel u Hiihii 4:1-22
4 Tsô kwaghôron u Samuel nyôr a Iserael cii.
Nahan Mbaiserael due za kohol Mbafiliti u nôngon ityav a ve; ve haa afo ikyua a Ebeneser, Mbafiliti di haa afo hen Afeki.
2 Maa Mbafiliti mough kase u nôngon ityav a Mbaiserael, kpa ityav za a Mbaiserael doo ga; Mbafiliti hemba ve, wua nomso vev nôngo u kuman iorov 4,000 ken utya.
3 Mbautyaav mba Iserael mba hidi ken afo yô, mbatamen mba Iserael kaa ér: “Er nan Yehova a de ér Mbafiliti ve hemba se ityav* nyiana?+ De se za tôô nen areki u ikyuryan u Yehova hen Shilo+ se va a mi, sha er a lu vea vese shi a yima se sha ikyev i mbahyomov asev yô.”
4 Tsô ior tindi nomso hen Shilo ve za her, ve za tôô areki u ikyuryan u Yehova u akum a sha, un u a tem sha ikyônough nagh ki torough sha* ucerubi la.+ Ônov mba Eli mba nomso mba uhar, Hofeni man Pinehashi+ kpa lu her vea areki u ikyuryan u Aôndo u mimi la.
5 Mba va nyôron a areki u ikyuryan u Yehova la ken afo yô, fese je Mbaiserael ger amo genger genger, je yô, inya tenger.
6 Mbafiliti mba ongo er ior lu ngoron yô, ve pine ér: “Er nan i lu ngoron genger genger ken afo a Mbaheberu nahana?” Ken masejime yô, ve kav ér i va a Areki u Yehova la ken afo.
7 Nahan cier Mbafiliti iyol, ve kaa ér: “Aôndo va ken afo la!”+ Tsô ve kaa ér: “Kwagh tser se ve, sha ci u i gbe je, imbakwagh ne ngi a vande eren ga!
8 Kwagh tser se ve! Ka an nana yima se sha ikyev i Aôndo u ageegh nee? Ka Aôndo u yange wua Mbaigipiti ken taaikyôngo sha hanma gbenda u wuan or je ne.+
9 Ne Mbafiliti, taver nen ishima, shi er nen kwagh er nomso nahan, sha er ne er Mbaheberu tom er ve er ne tom nahan ga yô.+ Er nen kwagh er nomso nahan, nôngo nen ityav!”
10 Tsô Mbafiliti nôngo ityav a Iserael hemba un,+ hanma ve yevese yem hen tenti u nan. I wua ior kpishi; ken vegher u Iserael yô, i wua ushoja mba zenden angahar 30,000.
11 Heela tseegh ga, i ngohol Areki u Aôndo la, shi ônov mba Eli mba uhar mbara kpe, ka Hofeni man Pinehashi je la.+
12 Orbenyamin ugen yevese ken utya va nyôr hen Shilo sha iyange la; akondo a na ande shi lu a inya sha ityo.+
13 Shighe u or ne va nyôr la, Eli tema hen kpegbenda lu keghen sha ci u ishima lu tan un kwe sha kwagh u Areki u Aôndo u mimi la.+ Or la kar nyôr ken gar za ôr kwagh u za hemen la, maa ior mba ken gar la cii gba vaan genger genger.
14 Eli ongo mliam ma ior yô, a pine ér: “Er nan ve ior ve vaan nahana?” Or shon maa kar fese za ôr Eli kwagh u za hemen la.
15 (Hen shighe ne, Eli lu anyom 98, shi ashe a na lu nôôr, kera faantyô u nengen ga.)+
16 Nahan or la kaa a Eli ér: “Ka mo m hide ken utya ye! Ka nyian je m yevese ken utya m hidi ye.” Maa Eli pine ér: “Wan wam, ka nyi i ere?”
17 Orôron-loho la gema kaa ér: “Iserael yevese Mbafiliti, i hemba ior ityav gburu gburu;+ shi Hofeni man Pinehashi, ônov ou mba nomso mba uhar mbara kpa kpe,+ shi i ngohol Areki u Aôndo u mimi la.”+
18 Or la va teren kwagh u Areki u Aôndo u mimi la yô, Eli yem yieer sha kwaghteman na la gba tiôr hen kpehunda, mon na sombo, maa a kpe sha ci u bee iyol shi kehe kpishi. Yange ôr Iserael ijir anyom 40.
19 Kwase u wan na Pinehashi lu iyav, lu zurum u una mar. Ongo ér i ngohol Areki u Aôndo u mimi la, shi ter u nom na man nom na kpe yô, a ngurum a mar sha ci u martoghor kôr un kpoo.
20 Er lu nôngon ku la, kasev mba ve tile ikyua a na la kaa ér: “De cie ga, sha ci u u mar wannomso.” Kpa a bugh zwa ga, shi a ver ishima her kpaa ga.*
21 Kpa a ii wannomso la iti ér Ikabodi,*+ maa a kaa ér: “I yem a icivir i Iserael uikyangen.”+ Lu ôron lu kwagh u Areki u Aôndo u mimi u i ngohol la, kua kwagh u er ter u nom na man nom na la.+
22 A kaa ér: “I yem a icivir i Iserael uikyangen sha ci u i ngohol Areki u Aôndo u mimi la.”+
