Samuel u Hiihii 23:1-29
23 Shighe kar yô, i va ôr Davidi ér: “Mbafiliti mba nôngon num a Keila+ shi mba yan ishar sha avande a gbidyen iyiav.”
2 Tsô Davidi pine Yehova ér:+ “M za m za wua Mbafiliti mbanaa?” Yehova gema kaa a Davidi ér: “Za za wua Mbafiliti mbara yima Keila.”
3 Kpa nomso mba Davidi gema kaa a na ér: “Nenge! Se mba ken Yuda heen je kpa cier se iyol;+ aluer se za ken Keila ér se za nôngo ityav a ikyumutya i Mbafiliti je yô a lu nena?”+
4 Tsô Davidi shi pine Yehova kwagh u una er yô.+ Nahan Yehova kaa a na ér: “Mough sha, sen za shin Keila sha ci u me na Mbafiliti sha ikyev you.”+
5 Nahan Davidi za vea ior nav ken Keila za nôngo ityav a Mbafiliti; a kôr uzendenya vev shi a wua ve je falegh gba, maa Davidi yima ior i Keila.+
6 Shighe u Abiatar+ wan u Ahimeleki yevese za kohol Davidi ken Keila la, lu a ikyondo i efodi.
7 Nahan i za kaa a Saulu ér: “Davidi ngu ken Keila.” Maa Saulu kaa ér: “Aôndo na un sha ikyev yam+ sha ci u a yisa iyol na er a nyer ken gar u lun a ihinda man uishindan yô.”
8 Tsô Saulu yila ior nav cii ér ve kohol iyol i utya vea sen shin Keila vea za kase Davidi vea ior nav.
9 Davidi va fe ér Saulu wa ishima u eren un kwaghbo yô, a kaa a pristi Abiatar ér: “Va a ikyondo i efodi la heen.”+
10 Davidi maa kaa ér: “Yehova Aôndo u Iserael, ortom wou ungwa ér Saulu wa ishima u van ken Keila va timin gar ne sha ci u m ngu ker yum.+
11 Mbahemenev* mba Keila vea nam sha ikyev naa? Saulu una sen a va er ortom wou a ongo nahanaa? Yehova Aôndo u Iserael, wea lumun yô ôr ortom wou.” Yehova gema kaa ér: “Una sen a va.”
12 Davidi maa pine ér: “Mbahemenev mba Keila vea na ior av man mo sha ikyev i Saulu?” Yehova gema kaa ér: “Vea na ne sha ikyev na.”
13 Maa fese je Davidi mough vea ior nav mba kuman er 600 nahan;+ ve undu Keila ve yem hanma ijiir i ve fatyô cii. Mba ôron Saulu ér Davidi yevese undu Keila yô, a kera zenda un ijime ga.
14 Davidi lu ken taaikyôngo hen ajiir a a lu ican u zan, hen haregh u iwoogh u taaikyôngo u Shiv+ yô. Saulu ker un gba uwer ga,+ kpa Yehova na Davidi sha ikyev na ga.
15 Davidi fa er* Saulu due lu za keren u wuan un yô. Shighe ne, Davidi lu ken taaikyôngo u Shiv hen Horeshi.
16 Yonatan wan u Saulu maa due za hen Davidi hen Horeshi, a za wase un a zua a agee* hen Yehova.+
17 A kaa a na ér: “De cie ga, sha ci u terem Saulu una zua a we ga; u tema tor sha Iserael,+ mo me gema me cir ken a we; terem Saulu kpa fa nahan.”+
18 Maa ve uhar cii ve ya ikyur+ sha ishigh ki Yehova, nahan Davidi lu hen Horeshi, Yonatan di hide yem ken ya na.
19 Shighe kar yô, ior i Shiv kôndo za hen Saulu hen Gibea+ za kaa ér: “Davidi yer ikyua a vese+ hen ajiir a a taver u zan her yô, ken Horeshi+ sha igyungu i Hakila+ u a lu Yeshimon* vegher u ken imbusutariyan la.*+
20 Tor, shighe u i doo u cii sen va, nahan se na un sha ikyev i tor.”+
21 Saulu gema kaa ér: “Yehova a ver ne doo doo er ne zungwem mhôônom yô.
22 Nea lumun yô, za nôngo fa nen ijiir i a lu her la jighilii man or u nan nenge a na her la, sha ci u i kaa a mo ér a wa ayom kpishi.
23 Za tôv nen zulee fa nen ajiir a yeren a na la cii, maa hide nen a ikyav va tesem nen. Nahan me za vea ven, man aluer ngu ken tar la yô, me ker un ken atô u icombor i Yuda cii me zua a na.”
24 Nahan ve mough ve vande yemen hen Shiv+ a Saulu. Shighe ne, Davidi lu ken taaikyôngo u Maon+ hen Araba+ u a lu Yeshimon vegher u ken imbusutariyan la.
25 Tsô Saulu za vea ior nav u za keren un.+ Mba ôron Davidi kwagh ne yô, fese je a sen a yem hen vande+ ugen, a za lu ken taaikyôngo u Maon. Saulu ongo kwagh ne yô, a zenda Davidi ijime, a za nyôr ken taaikyôngo u Maon.
26 Saulu va nyer hen uwo la vegher ugen yô, Davidi vea ior nav di gema lu uwo shon vegher ugen la. Davidi lu eren fele fele ér una yevese+ Saulu, kpa Saulu vea ior nav lu hemban kporom ikyua a Davidi man ior nav cii sha u vea kôr ve yô.+
27 Kpa orôron-loho ugen va kaa a Saulu ér: “Va fese, sha ci u Mbafiliti va ta num sha tar la.”
28 Saulu maa de u zendan Davidi,+ hide yem u za nôngon ityav a Mbafiliti. Ka nahan ve i yer ijiir la ér Vande u Mbampav ye.
29 Nahan Davidi mough her kôndo yem za lu hen ajiir a a taver u zan her yô, hen En-gedi.+
