Samuel u Hiihii 19:1-24
19 Shighe kar yô, Saulu ôr wan na Yonatan man mbatomov nav cii ér un soo u wuan Davidi.+
2 Er kwagh u Davidi doo Yonatan wan u Saulu ishima tsung yô,+ Yonatan za kaa a Davidi ér: “Terem Saulu soo u wuan we. Wea lumun yô, kper pepe wa ikyo, yem za yer ape or a nenge a we ga yô, lu her.
3 Me due me za tile vea terem ken toho ape u lu la. Me lam a terem sha kwagh wou, nahan aluer a ôrom ma kwagh yô, me ôr u kpee a bunde ga.”+
4 Tsô Yonatan ôr ter na Saulu akaa a dedoo sha kwagh u Davidi.+ A kaa a na ér: “Tor a de eren wanye na Davidi kwaghbo ga, sha ci u a er u kwaghbo ga, a er ka kwagh u a wase u yô.
5 A ver uma na sha zongo,* a za wua Orfiliti la,+ nahan Yehova na Iserael cii mhembe* u vesen. Yange u nenge kwagh ne, shi doo u kpishi. Nahan er nan u soo u eren isholibo sha u wuan Davidi, haan awambe a orishôôgh la inya a ityôkyaa shio?”+
6 Nahan Saulu ungwa kwagh u Yonatan ôr la, maa Saulu bum kaa ér: “Mimi je, er Yehova a lu u uma ne, a wua un ga.”
7 Mba been yô, Yonatan yila Davidi ôr un akaa ne cii. Maa Yonatan va a Davidi hen Saulu, nahan a za hemen u eren un tom er vanden eren nahan.+
8 Shighe kar yô, ityav shi gba, maa Davidi due za nôngo ityav a Mbafiliti wua ve je falegh gba, nahan ve yevese sha ishigh nagh kera.
9 Shi jijingi u bo u due hen Yehova la sen sha Saulu+ shighe u tema ken iyou na, kôr iwange ken uwegh nagh yô. Hen shighe ne, Davidi di lu kuhwan adiguve.+
10 Saulu nôngo ér una tume Davidi iwange, i kar i kôr ken kpekpe, kpa a palegh, maa iwange i Saulu la kar za tume ken kpekpe. Nahan Davidi yevese war tugh mbura.
11 Maa Saulu tindi mbaôron-loho hen ya u Davidi ér ve za kura ya na, nahan sev mbua aven yô, ve wua un.+ Kpa Mikal, kwase u Davidi kaa a na ér: “Aluer u yevese tugh mbun ga yô, kper a wua u.”
12 Fese je, Mikal wase Davidi hungwa sha windou, nahan a yevese a war.
13 Tsô Mikal tôô eev mbu terafim* za penda sha gambe, shi a tôô kper u i er un sha aive a ivo yô a ver sha ityough nagh, maa a cir ikyondo sha mi.
14 Shi Saulu tindi mbaôron-loho ér ve za va a Davidi, kpa Mikal kaa ér: “A gba angev.”
15 Nahan Saulu tindi mbaôron-loho mbara ér ve za nenge a Davidi, shi kaa a ve ér: “Za kôr un nen sha gambe na la va nen a na hen a mo, m wua un.”+
16 Mbaôron-loho mbara mba za nyer yô, ve nenge a eev mbu terafim* sha gambe, kua kper u i er sha aive a ivo ape yaven veren ityough la.
17 Saulu pine Mikal ér: “Er nan u bumem, u de orhyom wam+ a yevese mo a yem kwagh naa?” Mikal gema kaa a Saulu ér: “A kaa a mo ér, ‘U dem me yem ga yô, me wua u!’”
18 Hen shighe ne, Davidi yevese yem za kohol Samuel hen Rama.+ A ôr Samuel hanma kwagh u Saulu er a na cii. Maa un vea Samuel ve yem ve za lu hen Nayoti.+
19 Shighe kar yô, i va kaa a Saulu ér: “Nenge! Davidi ngu ken Nayoti u Rama.”
20 Fese je, Saulu tindi mbaôron-loho ér ve za kôr Davidi. Mba za nyer yô, ve nenge uprofeti mba been iyol lu ôron kwaghôron u profeti, Samuel gema tile lu hemen ve, maa jijingi u Aôndo sen sha mbaôron-loho mba Saulu mbara, nahan ve kpa, ve gba eren er mba uprofeti nahan.
21 Mba za ôron Saulu kwagh ne yô, fese je a tindi mbaôron-loho mbagen; ve kpa ve lu za eren er mba uprofeti nahan. Tsô shi Saulu tindi mbaôron-loho mbagen sha kwa tar; ve kpa ve lu za eren er mba uprofeti nahan.
22 Ken masejime yô, un kpa a za ken Rama. Za nyer hen zegeijôr i i lu hen Seku la yô, a pine ér: “Samuel man Davidi mba hana?” Ve gema ve kaa ér: “Mba ken Nayoti+ ken Rama.”
23 Saulu moughon heela ngur yemen ken Nayoti u Rama yô, un kpa jijingi u Aôndo sen sha a na, maa a gba zenden yemen eren er ka profeti nahan zan zan a za nyôr ken Nayoti u Rama.
24 Saulu shi er akondo a na, maa un kpa gba eren er ngu profeti nahan sha ishigh ki Samuel, shi a yav her idyelegh;* iyange la cii man tugh mbura cii. Kwagh ne na yô, ior ka ve pine ér: “Saulu kpa ngu môm ken uprofeti?”+
