Samuel u Hiihii 14:1-52
14 Iyange igen yô, Yonatan+ wan u Saulu, kaa a wanye u tôôn un ikyav mbi utyaav ér: “Va se per yande la se za ape ikyumutya i Mbafiliti i haa afo la.” Kpa Yonatan ôr ter na ga.
2 Saulu gema haa afo ikyua a Gibea+ hen itinekon u pomegraneti hen Migeron, nomso mba kuman er 600 nahan, lu vea na her.+
3 (Shi hen shighe la, Ahiya huan efodi,+ un lu wan u Ahitubi,+ anmgbian u Ikabodi,+ wan u Pinehashi,+ wan u Eli,+ pristi u Yehova u lu ken Shilo+ la.) Nahan kpa ior fa er Yonatan lu her ga ze.
4 Yange vande u lun er inyigh nahan lu vegher ne, shi ugen u lun er inyigh nahan lu vegher la, maa Yonatan lu nôngon ér una per hen ian i i lu hen atô la, una yem ape ikyumutya i Mbafiliti haa afo la; i yilan vande u môm la ér Boseshi, ugen la di i yilan u ér Sene.
5 Vande u môm lu ityôgh ki ki na ishigh sha Mikemashi vegher u ken imbusutarimese la, ugen la di na ishigh sha Geba vegher u ken imbusutariyan la.+
6 Tsô Yonatan kaa a wanye na u tôôn un ikyav mbi utyaav la ér: “Va se per se za ape ior mba ipyusuu* mban ve haa afo la.+ Alaghga tsô Yehova una nôngo kwagh sha ci wase, sha ci u kwagh môm una fatyô u yangen Yehova u nan mhembe ga, sea lu kpishi shin sea lu kpuaa kpaa.”+
7 Maa or u tôôn un ikyav mbi utyaav la kaa a na ér: “Er hanma kwagh u ishima i mgbegha u u eren cii. Goom za ape u soo cii, nahan me za a we ape ishima i mgbegha u u zan la cii.”
8 Yonatan gema kaa ér: “Se per yande la se za hen nomso mbara ve za nenge a vese.
9 Aluer ve kaa a vese ér, ‘Tile nen ape ne lu la zan zan se kar van hen aven!’ yô, se tile her, se kôndo se za hen a ve ga.
10 Kpa aluer ve kaa ér, ‘Kôndo va nôngo nen ityav a vese!’ yô, se kôndo se za sha ci u kwagh ne una lu ikyav+ i tesen ér Yehova una na ve sha ikyev yase.”
11 Tsô ve uhar cii ve za due hen afo a Mbafiliti ve nenge a ve. Maa Mbafiliti kaa ér: “Nenge! Mbaheberu mba duen shin ijô ape ve yer la.”+
12 Nahan nomso mba ken afo shon kaa a Yonatan man wanye u tôôn un ikyav mbi utyaav la ér: “Kôndo va nen hen a vese se tese ne kwagh u ne hungur a mi ga yô!”+ Maa fese je, Yonatan kaa a wanye u tôôn un ikyav mbi utyaav la ér: “Dondo sha a mo sha ci u Yehova una na ve sha ikyev i Iserael.”+
13 Tsô Yonatan gba unden vande la sha ave man sha angahar kôndon, wanye na u tôôn un ikyav mbi utyaav la gema lu van un ken ijime; maa Yonatan gba wuan Mbafiliti haan inya, wanye u tôôn un ikyav mbi utyaav la di gema lu wuan mba ve mase shin la.
14 Ken ityav mbi hiihii mbi Yonatan man wanye u tôôn un ikyav mbi utyaav nôngo la, ve lu a za ica ga je maa,* ve wua ior mba kuman er 20 nahan.
15 Nahan mciem gba ushoja mba ve lu ken afo la iyol, kua ushoja mba i ver ve sha vande, man ushoja mba i tindi ve ér ve za ta ityav sha Iserael+ la cii. Maa tar gba tenger, shi Aôndo na mciem gba Mbafiliti iyol.
16 Ior mba Saulu mba ve lu kuran ken Gibea+ u Benyamin la, nenge er anzughul lu hanma vegher cii yô.+
17 Tsô Saulu kaa a ior mba ve lu vea na la ér: “Nea lumun yô ôr nen iyengeior, nahan fa nen or u nan undu se yô.” Mba ôron iyengeior yô, ve mase kaven ér, Yonatan man wanye na u tôôn un ikyav mbi utyaav la mba her ga.
18 Maa Saulu kaa a Ahiya ér:+ “Va a Areki u Aôndo u mimi la ikyua!” (Sha ci u Areki u Aôndo u mimi la, lu vea Mbaiserael hen shighe la.*)
19 Er Saulu lu lamen a pristi la, anzughul a a lu ken afo a Mbafiliti la lu seer a seer. Maa Saulu kaa a pristi la ér: “De kwagh u u lu eren la.”*
20 Tsô Saulu man ior mba ve lu a na la cii kohol imôngo nyôr ken utya, maa ve nenge Mbafiliti lu nôngon ker ayol a ve sha sanker, shi anzughul lu kpishi.
21 Shi Mbaheberu mba ve za kohol Mbafiliti, ve za vea ve ken afo la lu hiden za kohol Mbaiserael mba Saulu man Yonatan lu hemen ve la.
22 Nomso mba Iserael mba ve za yer+ hen haregh u iwoogh u Eferaim la cii mba ongo ér Mbafiliti mba yevese yô, ve kpa ve kohol Mbaiserael mbagen mbara, ve gba zendan Mbafiliti ken utya.
23 Nahan Yehova yima Mbaiserael sha iyange la.+ Tsô ve nôngo ityav mbira zan zan ve za kar Bete-aven.+
24 Kpa nomso mba Iserael nyôr ken mlu u hagher kpishi sha iyange la, sha ci u Saulu na ior bum ér: “Aluer or ya kwaghyan* cii man aikighe, shi cii man me or iyev sha mbahyomov av yô, ifyan i kôr nan!” Nahan or môm ken ior mbara nan ya kwagh ga.+
25 Tsô ior mbara* cii za nyôr ken ikyô, iyough gema lu hen inya.
26 Shighe u ior mbara nyôr ken ikyô la, ve nenge iyough lu nôndon, kpa or môm lumun u felegh i zan a mi sha zwa ga, sha ci u ve lu cian ibumun la.
27 Kpa Yonatan ungwa er ter na, na ior bum ga,+ nahan a gema zwa u gbough ku lu a mi ken uwe la, a kuma sha ikpayough. Benden iyough la ken zwa cuku je maa, a zua a agee.*
28 Maa orgen ken ior mbara kaa ér: “Teru na ior bum gbang gbang kaa ér: ‘Or u nana ya kwaghyan nyian yô, ifyan i kôr nan!’+ Ka nahan ve ior ve vôr kpishi nahan ye.”
29 Nahan kpa, Yonatan kaa ér: “Terem va a zege zayol* sha tar ne. Nenge er m bende iyough ne ken zwa cuku tseegh kpa, m zough a agee sha wono!
30 Luun er ior vea ye kwaghyan u ve zough a mi ken ishar i ve ye mbahyomov vev nyian la gbar gbar yô,+ ma i hembe doon cii! Gadia ma i hembe wuan Mbafiliti cii.”
31 Mbaiserael wua Mbafiliti sha iyange la, hii hen Mikemashi zan zan nyôr Aiyalon,+ nahan ior vôr gbeda gbeda.
32 Tsô ior yevese gba za sasen ishar i i ya la, ve kôr iyôngo man ibua man ônov mba ibuav, ve za sôngo hen inya, maa ve gba yan inyam a awambe cii.+
33 Nahan i za ôr Saulu ér: “Nenge! Ior mba eren Yehova isholibo sha u yan inyam a awambe.”+ A gema a kaa ér: “Ne er kwagh u a tese ér ne mba a jighjigh u nan ga yô. Menger nen zegeiwen va nen a mi hen a mo fese.”
34 Saulu shi kaa ér: “Zende ôr nen ior ner, ‘Hanmô wen nana va a nombua u nan, kua iyôngo i nan, nana va sôngo heen nana ya. De eren nen Yehova isholibo sha u yan inyam a awambe ga.’”+ Maa hanma ve nan va a nombua u nan tugh mbura nan va sôngo her.
35 Tsô Saulu maa Yehova atse a nan nagh.+ Lu atse a hiihii a Saulu maa sha ci u Yehova je ne.
36 Shighe kar yô, Saulu kaa ér: “Se sen nen tugh se za zenda Mbafiliti ijime, shi se ya ve ishar zan zan sev puaa. Se de or môm nana war ga.” Maa ve kaa ér: “Er hanma kwagh u u nenge i doo u cii.” Nahan pristi la kaa ér: “De se pine Aôndo u mimi la kwagh u se er yô hen ijiir ne.”+
37 Tsô Saulu pine Aôndo ér: “M sen m zenda Mbafiliti ijimee?+ U na ve sha ikyev i Iserael?” Kpa Aôndo lam a na sha iyange la ga.
38 Nahan Saulu kaa ér: “Ne mbahemenev mba ior cii, va nen heen va tôv fa nen isholibo i i er nyian yô.
39 Mimi je, er Yehova, un u a yem Iserael a lu u uma ne, or u nan er isholibo la nana kpe kpee je, aluer ka wan wam Yonatan je kpaa.” Kpa or môm ken ior mbara bugh zwa a na ga.
40 Maa a kaa a Iserael cii ér: “Tile nen vegher ne, mo vea wan wam Yonatan di se tile vegher la.” Nahan ior kaa a Saulu ér: “Er hanma kwagh u u nenge i doo u cii.”
41 Tsô Saulu kaa a Yehova ér: “Aôndo u Iserael, pase se kwagh u se er yô sha ikyev i Tumim!”+ Maa i tsua Yonatan vea Saulu, nahan ior kera lu a ibo ga.
42 Saulu gema kaa ér: “Er nen ishor+ sha er a fa or u nan er isholibo hen atô wam vea wan wam Yonatan yô.” Maa ishor kôr Yonatan.
43 Tsô Saulu pine Yonatan ér: “Ôrom, ka nyi u ere?” Yonatan gema kaa ér: “Ashen m bende iyough i i lu sha zwa u gbough agh ku m lu a mi ken uwe la sha zwa cuku tseegh tsô.+ Yô mo ne! M lumun u kpen!”
44 Tsô Saulu kaa ér: “Yonatan, aluer u kpe ga yô, Aôndo a tsaham tsung.”+
45 Kpa ior pine Saulu ér: “Yonatan u a ne Iserael mhembe* u vesen ne+ a kpee? Mayange kwagh a er nahan ga! Mimi je, er Yehova a lu u uma ne, gwarce u sha ityough nagh môm kpa una gba hen inya ga, sha ci u ka sha iwasen i Aôndo a er kwagh ne nyian ye.”+ Sha nahan yô, ior yima Yonatan, nahan a kera kpe ga.
46 Tsô Saulu de u zendan Mbafiliti, maa Mbafiliti yem hen ijiir ve.
47 Nahan Saulu tema tor sha Iserael, un lu a tahav kpishi, shi a nôngo ityav a mbahyomov nav cii, hanma vegher cii, a nôngo ityav a Mbamoabi+ man Mbaamon+ man Mbaedom+ man utor mba Soba+ kua Mbafiliti;+ shi hanma ijiir i una za cii a hemba ve.
48 Yange nôngo ityav sha ishimataver hemba Mbaamaleki+ ityav, shi yima Iserael sha ikyev i mbahyomov nav.
49 Ônov mba Saulu mba nomso lu Yonatan man Ishevi, kua Malki-shua.+ Shi lu a ônov mba kasev uhar; i yilan u vesen la ér Merabi,+ u kiriki la di i yilan un ér Mikal.+
50 I yilan kwase u Saulu ér Ahinoam, un lu wan u Ahimaashi. I yilan kurutya u ikyumutya na ér Abiner,+ un lu wan u Ner, anmgbian u ter u Saulu.
51 Kishi+ lu ter u Saulu, Ner+ u lu ter u Abiner la gema lu wan u Abiel.
52 Sha ayange a Saulu lu uma la cii, a nôngo ityav a Mbafiliti kpoghuloo.+ Yange Saulu una nenge a or u taver iyol shin taver ishima je, a wa nan ken ikyumutya na.+
Ngeren mba shin kpe
^ Shin “nomso mba i tsôngo ve ga yô.”
^ Shin “hen an-ijiir u anomabua ahar aa fatyô u kahan ken iyange i môm yô.”
^ Zwa Heberu, “sha iyange la.”
^ Zwa Heberu, “Hide a uwegh ough ijime.”
^ Zwa Heberu, “beredi.”
^ Zwa Heberu, “tar la.”
^ Zwa Heberu, “wanger un ashe.”
^ Shin “ifyan.”
^ Shin “myom.”
