Samuel u Hiihii 6:1-21
-
Mbafiliti hide a Areki za na Iserael (1-21)
6 Areki+ u Yehova lu hen haregh u Mbafiliti iwer itiankarihiar.
2 Tsô Mbafiliti yila upristi man mbakpehenshor+ pine ve ér: “Ka nyi se er a Areki u Yehova nee? Pase nen se, se fa er se tindi un una hide a yem hen ijiir na yô.”
3 Ve gema ve kaa ér: “Aluer ne tindin areki u ikyuryan u Yehova Aôndo u Iserael la ner a yem yô, de tindin nen un ner a yem a iyua shio ga. A gba u ne na un nagh ku iboogh kpee a bunde ga.+ Saa ne er nahan ve angev a bee ne ye; nahan a pase ne er i hii ve uwegh nagh ku lu num a ven her yô.”
4 Tsô Mbafiliti pine ér: “Ka nagh ku iboogh ku nyi i gbe u se tindi un a mini?” Ve gema ve kaa ér: “Tindi nen a ieev mbi angev mbu haan ityô won mbi sha zanaria itian, man ieev mbi ihyev mbi sha zanaria itian, sha iyenge i mbahemenev mba Mbafiliti+ la, sha ci u ka angev mbu shon môm mbu ker hanma wen man mbahemenev enev ye.
5 Er nen ieev mbi angev enev mbu haan ityô won la, man ieev mbi ihyev yen+ i i lu vihin tar wen la, shi na nen Aôndo u Iserael icivir. Nahan alaghga una hide a uwegh nagh ijime sha a ven, man sha aôndo wen kua sha tar wen.+
6 Ne soo u taver ityough, er ior i Igipiti man Farou nahan ner nyi?+ Aôndo yange tsaha ve tsung,+ nahan ve kaa ér Iserael a yem, maa ve yem.+
7 Nahan er nen ikyekye i tôôn ikyav i he, shi kôr nen ungômbaibuav uhar mba ve lu a ônov shi i lu a vande kangen ve igbur ga yô. Maa zer ungômbaibuav mbara sha ikyekye i tôôn ikyav la, kpa gema yem a ônov nav mbara ken ya ica a ve.
8 Tôô Areki u Yehova la penda sha ikyekye la, shi wa ieev mbi sha zanaria mbi u lu tindin a mi hen a na wer mbi lu nagh ku iboogh la ken akwati, ver ikyua a Areki la.+ Ne pasen ibua la ia nguren yemen yô,
9 ne gema nengen nen: Aluer ibua la kôndo yem sha gbenda u Bete-shimeshi+ hen haregh u Areki la yô, ka un a er se kwagh u vihin tsung ne ye. Kpa aluer kwagh er nahan ga yô, se fa ser lu uwegh nagh tsaha se ga; kpa kwagh ne er se lu aburabur.”
10 Tsô nomso mbara er nahan vough. Ve tôô ungômbaibuav uhar mba ve lu a ônov yô, ve za zer sha ikyekye i tôôn ikyav la, kpa ve gema ve haa ônov vev mbara ken ityôr, ken ya.
11 Maa ve tôô Areki u Yehova la, man akwati u i wa ieev mbi ihyev mbi sha zanaria, man ieev mbi angev vev mbu haan ityô won mbi sha zanaria mbi ve ker la, ve penda sha ikyekye shon.
12 Nahan ibua la yem jighilii sha gbenda u yemen Bete-shimeshi la.+ I lu vaan yemen sha gbenda u vesen môm; i goom i yem ken iyan shin ken imese ga. Hen shighe ne cii, mbahemenev mba Mbafiliti lu zenden van i ken ijime zan zan ve za nyôr hen ikighirtar i Bete-Shimeshi.
13 Ior i Bete-shimeshi lu sundan alakema shin pev u lun vaanaa.* Mba kenden ashe sha yô, ve nenge a Areki la, nahan saan ve iyol er ve nenge a mi yô.
14 Ikyekye la za nyôr hen inya i Yoshua, Orbete-Shimeshi la, maa i tile her ikyua a zegeiwen ugen. Tsô ve ar ikyon i sha ikyekye shon, ve kôr ibua la+ ve na Yehova nagh ku nanden a mi.
15 Tsô Mbalevi+ kôr Areki u Yehova man akwati u lu hen kpe na, u i wa ieev mbi sha zanaria ker la hungwa a mi za penda sha zegeiwen la. Nahan nomso mba Bete-shimeshi+ na Yehova iniav mbi nanden kua iniav mbigen sha iyange la.
16 Utor mba Mbafiliti mba utaan mbara mba nengen nahan yô, ve hide sha iyange la ve yem ken Ekeron.
17 Ka ieev mbi angev mbu haan ityô won mbi sha zanaria mbi Mbafiliti tindi ér i na Yehova nagh ku iboogh+ je ne: eev môm sha ci u Ashedodi,+ eev môm sha ci u Gasa, eev môm sha ci u Ashekelon, eev môm sha ci u Gati,+ eev môm sha ci u Ekeron.+
18 Shi iyenge i ieev mbi ihyev mbi sha zanaria la zua sha iyenge i agar a Mbafiliti a mbahemenev mba utaan mbara cii—agar ne kua agar a i wa a ugir mba taver yô, man agar a kiriki a i maa a i kase ga yô.
Nahan zegeiwen u i penda Areki u Yehova sha mi hen inya i Yoshua Orbete-shimeshi la, hingir shiada zan zan nyian.
19 Kpa Aôndo wua nomso mba Bete-shimeshi sha ci u ve kenger sha Areki u Yehova. A wua ve iorov 50,070,* nahan ior mbara gba zungwen sha ci u Yehova wua ve kpishi.+
20 Tsô nomso mba Bete-shimeshi pine ér: “Ka unô vea fatyô u tilen sha ishigh ki Yehova, icighan Aôndo ne,+ shi ka unô una undu se ve una yem hen a ve?”+
21 Tsô ve tindi mbaôron-loho hen ior mba ken Kiriati-yearim,+ ve kaa ér: “Mbafiliti hide a Areki u Yehova. Sen va tôô nen un kôndo yem nen a mi.”+
