Samuel u Hiihii 10:1-27
10 Samuel maa tôô mkurem ken ishegh gema haa Saulu sha ityo.+ A suse un hengegh, maa a kaa ér: “Yehova shighe u mkurem, u hingir orhemen+ u dyako na.+
2 U undun mo nyian u yemen yô, u za zua a nomso uhar ikyua a uwar u Rahel+ hen haregh u Benyamin hen Selsa, nahan vea kaa a we ér, ‘I zua a ujaki mba u yem u za keren la, kpa teru hungur a kwagh u ujaki mbara,+ hegen ka kwagh wen ishima i lu nyian un sha mi ye. Ngu kaan ér: “Ka nyi jim me er sha kwagh u wan wama?”’
3 Maa mough her yem zan zan za nyôr hen zegekon u Tabor. Hen ijiir la, u zua a nomso utar mba ve lu kôndon zan hen Aôndo u mimi hen Betel yô;+ nomsoor u môm nana kôr agumaivo atar, ugen la nana tôô ikpenberedi itiar, ugen la di nana tôô ityegh ki wain ki vesen.
4 Vea pine u er u lu yô, shi vea na u ikpenberedi ihiar, nahan ngohol ikpenberedi shon hen a ve, de vende i ga.
5 U been yô, yem sha igyungu i Aôndo u mimi, ape ikyumutya i Mbafiliti i lu la. U za nyôron hen gar la yô, u zua a uprofeti kpishi, vea lu hungwan sha ijiir i taven la, vea lu ôron kwaghôron u profeti, a gema a lu kuhwan kwaghkuhwan u lun a ikyar man angenga, shi tôngon imar shi kuhwan adiguve ken hemen ve.
6 Jijingi u Yehova una na u agee,+ nahan u ôr kwaghôron u profeti vea ve, shi a gema u u hingir orgen kposo.+
7 Akaa ne aa eren yô, er hanma kwagh u uwegh ough ku fetyô u eren cii, sha ci u Aôndo u mimi ngu a we.
8 U been yô, kar vande yemen a mo shin Gilgal,+ shi mo kpa me sen shimi me za na iniav mbi nanden man iniav mbi bem. Kegh ayange ataankarahar zan zan me kar van. Me vaan yô, me ôr u kwagh u u er yô.”
9 Saulu goom ér una undu Samuel a yem nahan maa, Aôndo hii u geman un ishima ér i lu er i orgen nahan. Nahan akaa ne cii kure sha mi sha iyange la.
10 Tsô ve mough her ve yem sha igyungu la, maa uprofeti kpishi zua a na. Fese je, jijingi u Aôndo na un agee,+ maa a gba ôron kwaghôron u profeti+ hen atô ve.
11 Er ior mba ve vande fan un cii ve nenge a na, lu ôron kwaghôron u profeti vea uprofeti mbara yô, ve pine ayol a ve ér: “Ka nyi i er wan u Kishi nee? Saulu kpa hingir môm ken uprofetii?”
12 Tsô orgen her pine ér: “Kpa ka an nan lu ter ve?” Nahan kwagh ne hingir injakwagh i ior ôron yô, ér: “Saulu kpa hingir môm ken uprofetii?”+
13 Ôron kwaghôron u profeti been yô, a kôndo sha ijiir i taven la.
14 Shighe kar yô, anmgbian u ter u Saulu va pine un vea ortom na ér: “Ka han ne ze?” Maa Saulu kaa ér: “Se za u za keren ujaki mbara,+ kpa se nenge a ve ga, nahan se kar se yem hen Samuel.”
15 Tsô anmgbian u ter u Saulu pine ér: “Wea lumun yô ôrom, ka nyi Samuel a ôr u we?”
16 Saulu gema kaa a anmgbian u ter na la ér: “A kaa a vese ér i zua a ujaki mbara.” Kpa Saulu ôr un kwagh u Samuel kaa ér un Saulu una hingir tor la ga.
17 Nahan Samuel yila ior za kohol imôngo sha ishigh ki Yehova hen Misepa,+
18 maa a kaa a Mbaiserael ér: “Ka kwagh u Yehova Aôndo u Iserael a kaa je ne, ér: ‘Ka mo yange m due a Iserael ken Igipiti kera, shi m yima ne sha ikyev i Igipiti,+ man sha ikyev i ityartor i i lu nan ne ican la cii ye.
19 Kpa nyian ne venda Aôndo wen+ u yange yima ne ken mbamzeyol man atsan a en cii la, ne kaa ner: “Ei, na se tor nana hemen se.” Hegen yô, tile nen sha ishigh ki Yehova sha uipyaven enev man sha icombor yen.’”*
20 Tsô Samuel kaa a uipyaven mba Iserael cii ér ve kporom ikyua,+ maa i tsua ipyaven u Benyamin.+
21 Nahan Samuel kaa a icombor i ipyaven u Benyamin ér i kporom ikyua, maa i tsua tsombor u Materi. Mba been yô, i tsua Saulu wan u Kishi.+ Kpa mba ze mba za keren un yô, ve zua a na ga.
22 Tsô ve pine Yehova ér:+ “Or shon va heen je kpa?” Yehova gema kaa ér: “Ngula a yer ken uikya la.”
23 Tsô ve yevese ve za kôr un her ve va a na. Za til hen atô u ior yô, a tav je yô ior mbagen mbara cii gba un sha akende.+
24 Maa Samuel kaa a ior cii ér: “Ne nenge or u Yehova a tsough ne kpa?+ Ken ior cii or môm ngu er un nahan ga.” Maa ior cii gba kaan genger genger ér: “Tor a lu uma gbem!”
25 Tsô Samuel pase ior akaa a i gbe u vea eren tor yô,+ maa a nger a ken takeda a za ver sha ishigh ki Yehova. Samuel maa kaa a ior cii ér, hanma or nana hide nana yem hen ya u nan.
26 Saulu kpa hide yem hen ya na ken Gibea, mbautyaav mba Yehova bende a asema a ve yô, lu vea na.
27 Kpa agbilinaior agen kaa ér: “Or ngun nahan una yima se nena?”+ Nahan ve laha un, shi ve na un iyua i môm kpaa ga.+ Kpa a bugh zwa sha mi ga.*
