Samuel u Hiihii 29:1-11
-
Mbafiliti na Davidi jighjigh ga (1-11)
29 Mbafiliti+ ve kohol akumautya a ve cii hen Afeki. Hen shighe ne, Mbaiserael di lu haan afo hen uwagh ugen hen Yesereel.+
2 Nahan mbahemenev mba Mbafiliti lu yemen vea ushoja vev uderi uderi man udubu udubu; Davidi vea ior nav di ve lu van ken ijime vea Akishi.+
3 Kpa mbahemenev mba Mbafiliti pine ér: “Er nan Mbaheberu mban ve lu heenee?” Akishi gema kaa a mbahemenev mba Mbafiliti ér: “Ka Davidi ortom u Saulu Tor u Iserael je ne; ngu vea mo hemba inyom i môm hegen.+ Hii iyange i yevese va kohol mo la je zan zan nyian, m ngu a zua un a kwaghbo môm ga.”
4 Kpa ishima vihi mbahemenev mba Mbafiliti a na kpishi, maa ve kaa a na ér: “Kaa or la a hide a yem;+ a hide a yem hen ijiir i u ne un la. A de senen zan ityav vea vese ga, sha er una za gema a hingir num a vese ken utya ga yô.+ A hemba doon un u gberen mtom ma nomso asev za nan orvesen na sha u i doo un a na ga zee?
5 Ka Davidi u yange ve wa icam sha kwagh na shighe u ve lu vinen amar, kaan ér:
‘Saulu wua ior dubu,Davidi di gema wua ior dubu pue’ ne gaa?”+
6 Tsô Akishi+ yila Davidi kaa a na ér: “Mimi je, er Yehova a lu u uma ne, u ngu or u mimi shi doom er u lu zan ityav vea ikyumutya yam yô,+ sha ci u hii iyange i u va hen a mo la je zan zan nyian, m ngu a zua u a kwaghbo môm ga.+ Kpa mbahemenev mban na u jighjigh ga.+
7 Nahan hide yem bem bem shi de eren kwagh môm u una na ishima a vihi mbahemenev mba Mbafiliti ga.”
8 Nahan kpa, Davidi pine Akishi ér: “M hide m yem sha ci u nyi? Ka nyi m ere? Hii sha iyange i m va hen a we la je zan zan nyian, ka nyi kwaghbo u zough wanye wou a mini? Gba u me za vea we me za nôngo ityav a mbahyomov mba terem tor ga sha ci u nyi?”
9 Akishi gema kaa a Davidi ér: “Mo tseegh yô, m nenge mer u ngu or u dedoo er ortyom u Aôndo nahan.+ Kpa mbahemenev mba Mbafiliti kaa ér, ‘De lumun wer a kôndo a za ityav vea vese ga.’
10 Nahan kper mough pepe vea ior mba ve ve vea we la; kper a hiin u wanger a wanger nahan maa mough yem nen.”
11 Tsô Davidi man nomso nav mough pepe pepe hide gba yemen ken tar u Mbafiliti, Mbafiliti di gema kôndo yem hen Yesereel.+
