Samuel u Hiihii 15:1-35
15 Tsô Samuel kaa a Saulu ér: “Yehova yange tindim ér m va shighe u mkurem, tema tor sha ior nav Iserael;+ nahan kegh ato a kwagh u Yehova a lu a mi u ôron ne.+
2 Ka kwagh u Yehova u akum a sha a kaa je ne, ér: ‘Me ôr Mbaamaleki ijir sha kwagh u ve er a Mbaiserael la. Yange ve hendan kwagh a ve shighe u ve due ken Igipiti ve lu van sha gbenda la.+
3 Nahan za hegen za wua Mbaamaleki+ shi tim ve,+ kua hanma kwagh u ve lu a mi cii. De undun ve uma ga;* gba u u wua ve,+ nomsoor man kwase, wanye man wanikyundan, nombua man iyôngo, rakumi man jaki.’”+
4 Maa Saulu yila ior ôr iyenge ve hen Telaim; ushoja mba zenden angahar lu 200,000, nomso mba Yuda gema lu 10,000.+
5 Saulu yem zan zan za nyôr hen gar u Amaleki, maa yer shin pev.*
6 Saulu maa kaa a Mbakeni ér:+ “Mough due nen hen atô u Mbaamaleki sha, sha er me ese ne a ve imôngo ga yô.+ Gadia yange ne er a ior i Iserael cii doo doo+ shighe u ve due ken Igipiti la.” Nahan Mbakeni due hen atô u Mbaamaleki kera.
7 Mba been yô, Saulu wua Mbaamaleki+ hii hen Havila+ zan zan nyôr Shur+ u a dondo a Igipiti la.
8 A kôr Agagu,+ tor u Mbaamaleki uma, kpa ior mbagen mbara cii yô, a wua ve sha sanker.+
9 Nahan kpa, Saulu man ior de Agagu lu uma her,* kua ilev mbi hemban doon man uzendenya man annyamev mba kehen dindim dindim, man anomaiyôngo man akaa a doon cii.+ Ve tim a ga. Kpa akaa a lun a inja ga, man a kwagh a gba or a mi ga la cii yô, ve tim a kera.
10 Tsô Yehova ôr kwagh a Samuel kaa ér:
11 “M vaa afanyô* er m ne Saulu tor yô, sha ci u a de u dondon mo, shi a er akaa a m kaa la ga.”+ Tsô ishima vihi Samuel tsung, nahan a vaa a Yehova tugh mbura cii.+
12 Samuel nderen pepe pepe ér una za nenge a Saulu yô, i kaa a Samuel ér: “Saulu za ken Karmel,+ a za tim ityôgh her sha ci na.+ Moughon heela yô, a goom a sen shin Gilgal.”
13 Ken masejime yô, Samuel va zua a na, maa Saulu kaa a na ér: “Yehova a ver u. M er kwagh u Yehova a kaa la.”
14 Kpa Samuel pine ér: “Ka mliam ma ilev man mliam ma ibua m lu ungwan ga zee?”+
15 Saulu gema kaa ér: “Ka ken Mbaamaleki i ve a mbi ye, gadia ior de ilev mbi hemban doon man uzendenya uma* sha ci u nan Yehova Aôndo wou nagh a mi; kpa kwagh u mase shin la cii, se tim kera.”
16 Tsô Samuel gema kaa a Saulu ér: “Tile nahan! De m ôr u kwagh u Yehova nyen ôrom tugh yô.”+ Maa Saulu kaa a na ér: “Ôrom ase!”
17 Samuel za hemen kaa ér: “Shighe u i ver u orhemen u uipyaven mba Iserael shi Yehova shighe u mkurem ér u tema tor sha Iserael la,+ yange u nenge iyol you wer u ngu sha kwarkyaa ga+ kpa?
18 Shighe kar yô, Yehova tindi u ityom kaa ér, ‘Za, za tim Mbaamaleki, ior mba eren asorabo mbara kera.+ Nôngo ityav a ve zan zan kar timin ve kera cii.’+
19 Nahan er nan u ongo imo i Yehova ga, kpa u gem u ze fese u za ye ishar sha hua,+ u er kwaghbo sha ishigh ki Yehova?”
20 Nahan kpa Saulu kaa a Samuel ér: “Kpa m ungwa imo i Yehova! M za ityom i Yehova tindim la, shi m hide a Agagu, tor u Mbaamaleki la, shi m tim Mbaamaleki kera.+
21 Kpa ior kôr iyôngo man ibua ken ishar la, lu akaa a hemban doon a lu u a tim kera la, sha u nan Yehova Aôndo wou nagh a mi hen Gilgal.”+
22 Samuel gema kaa ér: “Iniav mbi nanden man iniav mbigen+ hemba doon Yehova a u ungwan imo i Yehova zee? Nenge! U ungwan kwagh hemba nagh ku nan,+ man u veren ishima la hemba ahôm+ a anomaiyôngo;
23 gadia ihyembeato+ ngi kwagh môm a isholibo i ishor i kpehen,+ man u eren kwagh sha igbongor, hiden ijime ga la ngu kwagh môm a ahir a eren man akombo a civir.* Er u vende kwaghôron u Yehova yô,+ un kpa a venda ú u lun tor.”+
24 Maa Saulu kaa a Samuel ér: “M er isholibo, gadia m per tindi u Yehova, shi m er akaa a u kaa la ga, sha ci u m cia ior shi m ungwa imo ve.
25 Nahan wea lumun yô, dem a isholibo yam, shi hide vea mo sha er me za gure Yehova inya yô.”+
26 Kpa Samuel gema kaa a Saulu ér: “Me hide vea we ga, sha ci u u venda kwaghôron u Yehova, nahan Yehova venda u ér u de ze hemen u lun tor u Iserael ga.”+
27 Samuel gem ér una yem yô, Saulu za gba uwer sha tsumbur u riga na u lun a ave ga la, kpa a ande kera.
28 Maa Samuel kaa a na ér: “Yehova ande hementor u Iserael hen a we kera nyian, una gema u una na orgen u nan hembe doon inja a we yô.+
29 Heela tseegh ga, Un u A Lu Icivir i Iserael+ la una er aie ga,+ shin una gema ishima* kpaa ga, sha ci u Un ngu orumace ve una gema ishima ga.”*+
30 Tsô Saulu gema kaa ér: “M er isholibo. Kpa wea lumun yô, nam icivir sha ishigh ki mbatamen mba ior av man sha ishigh ki Iserael. Hide vea mo, nahan me za gure Yehova Aôndo wou inya.”+
31 Tsô Samuel cir sha Saulu gba hiden, maa Saulu za gure Yehova inya.
32 Nahan Samuel kaa ér: “Va a Agagu, tor u Mbaamaleki la hen a mo heen.” Maa Agagu kar zunguluu* za hen a na, sha ci u Agagu lu kaan ken ishima na ér: ‘M war ku je ka ashe tugh ga.’
33 Nahan kpa, Samuel kaa ér: “Er sanker wou a ne kasev ve kera lu a ônov ga nahan, kape ngôu kpa una kera lu a ônov ga, er kasev mbagen je la.” Maa Samuel paa Agagu avur avur, sha ishigh ki Yehova hen Gilgal.+
34 Samuel maa yem ken Rama, Saulu di kôndo hide hen ya na hen Gibea u Saulu.
35 Samuel kera tsa nenge a Saulu ga zan zan Samuel kar kpen, sha ci u Samuel yem u zungwen kwagh u Saulu.+ Shi Yehova vaa afanyô er un ver Saulu tor sha Iserael yô.+
Ngeren mba shin kpe
^ Shin “de zungwen ve mhôônom ga.”
^ Shin “uwagh.”
^ Shin “zungwe Agagu mhôônom.”
^ Shin “vihim kpishi.”
^ Shin “zungwe ilev mbi hemban doon man uzendenya mhôônom.”
^ Zwa Heberu, “ieev mbi terafim,” ka mbaaôndo mba hen ya je la; ieev.
^ Shin “una vaa afanyô.”
^ Shin “una vaa afanyô ga.”
^ Shin a fatyô u kaan ér, “gbar gbar.”
