Samuel u Hiihii 31:1-13
-
Saulu man ônov nav mba nomso utar kpe (1-13)
31 Hen shighe ne, Mbafiliti lu nôngon ityav a Iserael.+ Nahan ior mba Iserael yevese Mbafiliti shi i wua ve kpishi sha Uwo u Gilboa.+
2 Tsô Mbafiliti gba zendan Saulu man ônov nav mba nomso ijime; ve zenda ve, ve lu a ve ikyua ikyua, maa Mbafiliti wua Yonatan+ man Abinadabi man Malki-shua, ônov mba Saulu mba nomso mbara.+
3 Mbafiliti lu hemban nôngon ityav a Saulu taver cii, maa mbakerenavaan za nenge a na. Mbakerenavaan mbara ta un ivaan vihi un iyol kehelee.+
4 Nahan Saulu kaa a or u tôôn un ikyav mbi utyaav la ér: “Tsua sanker wou kumam i kar i due keela, sha er nomso mba i tsenge ve ga mban+ vea va kumam sanker a kar a due keela, vea er a mo caveraa* ga yô.” Kpa or u tôôn un ikyav mbi utyaav la lumun ga, sha ci u cier un iyol kpishi. Nahan Saulu tim sanker gba sha mi.+
5 Or u tôôn un ikyav mbi utyaav la nengen ér Saulu kpe yô,+ un kpa a tim sanker na a gba sha mi, a kpe vea na.
6 Nahan Saulu man ônov nav mba nomso mba utar mbara, man or u tôôn un ikyav mbi utyaav, kua nomso nav cii, kpe sha iyange la imôngo.+
7 Ior mba Iserael mba ve lu hen haregh u shin pev* la, man mba ve lu hen haregh u Yordan la, mba nengen er ior mba Iserael ve yevese shi Saulu man mbayev nav mba nomso ve kpe yô, ve gba undun agar a ve yevese;+ maa Mbafiliti va nyôr tema ken agar shon.
8 Kpernan Mbafiliti mba ve u va kuran akaa a ior mba i wua ve la yô, ve kav Saulu man ônov nav mba nomso mba utar mbara kpenegh sha Uwo u Gilboa.+
9 Tsô ve gber un ityough shi ve kura ikyav nav mbi utyaav, maa ve tindi a loho ken tar u Mbafiliti cii ér i ôr loho ne+ sha uya* mba i ver akombo a ve la,+ man hen ior.
10 Maa ve za ver ikyav nav mbi utyaav mbira ken iyou i i ver ieev mbi Ashetaroti la, shi ve mande ikyom na sha kpekpe u Bete-shan.+
11 Ior i Yabeshi-gileadi+ mba ongo kwagh u Mbafiliti er a Saulu la yô,
12 mbautyaav cii mough tsa yemen tugh mbura kaka za hungwa a ikyom i Saulu man ikyom i ônov nav mba nomso mbara sha kpekpe u Bete-shan kera. Maa ve hide a ikyom ve hen Yabeshi ve va nande her.
13 Tsô ve kura akuhe a ve+ ve za ii hen itinekon u tsamia hen Yabeshi,+ maa ve hôr kwaghyan ayange ataankarahar.
