Samuel u Hiihii 18:1-30
18 Davidi lamen a Saulu been je maa, Yonatan+ man Davidi hingir u yan ijende kangenaa, maa a hingir u doon Yonatan ishima er iyol na nahan.+
2 Hii sha iyange la je Saulu kaa a Davidi ér a lu vea na, kera de un ér a hide a yem hen ya u ter na ga.+
3 Maa Yonatan man Davidi ya ikyur+ sha ci u a doo un ishima er iyol na nahan.+
4 Tsô Yonatan er riga u lun a ave ga u hua la gema na Davidi, kua riga na u utya man sanker man ada man kwange na.
5 Davidi maa hii u duen zan ityav, shi hanma ijiir i Saulu una tindi un cii, a za a hide doo doo.*+ Nahan Saulu ver un lu hemen nomso mba nôngon ityav.+ Kwagh ne doo ior cii, kua mbatomov mba Saulu kpaa.
6 Davidi man ior mbagenev vea za wua Mbafiliti vea hide yô, kasev ve due ken agar a Iserael cii ve waan icam,+ ve kuhwan angengav+ man mbaadiguve, ve vinen amar, ve ember u za keghen tor Saulu gbenda.
7 Kasev mban vea ember yô, ve waan icam, ve kaan ér:
“Saulu wua ior dubu,Davidi di gema wua ior dubu pue.”+
8 Ken masejime yô, ishima vihi Saulu kpishi+ sha ci u icam la doo un ga, nahan a kaa ér: “Davidi yô, ve kaa ér a wua ior dubu pue, kpa mo yô, ve kaa ér m wua ior dubu. Ka tor tseegh i mase shin u a na un ye!”+
9 Hii sha iyange la je, kwagh u Davidi kera wanger Saulu ga.
10 Kpernan jijingi u bo due hen Aôndo va nyôr ken Saulu,+ maa a gba eren ken iyou er ngu hunden nahan.* Hen shighe ne, Davidi lu kuhwan adiguve+ er vanden eren ashighe agen nahan. Saulu gema kôr iwange ken uwegh nagh,+
11 maa a ker iwange la,+ lu kaan ken ishima ér: ‘Me tume Davidi, i kar i za kôr ken kpekpe!’ Kpa Davidi war sha ikyev na kwa har.
12 Nahan kwagh u Davidi cier Saulu iyol sha ci u Yehova lu a Davidi,+ kpa gema undu Saulu.+
13 Tsô Saulu kaa ér a de u eren tom sha ishigh nagh, gema tsua un ér a lu orhemen u iorov dubu, nahan Davidi a hemen ikyumutya u za nôngon ityav.*+
14 Hanma kwagh u Davidi una er cii a za i doo,*+ shi Yehova lu a na.+
15 Nahan Saulu nengen er kwagh lu hemban zan a Davidi doon yô, kwagh u Davidi cier un iyol.
16 Kpa kwagh u Davidi doo Iserael man Yuda cii sha ci u a hemen ve ken utya.
17 Shighe kar yô, Saulu kaa a Davidi ér: “Nenge, wan wam u kwase u vesen Merabi+ ngun. Me na u un a hingir kwase wou.+ Nahan kpa, gba u u za hemen u taver ishima nôngon ityav mbi Yehova sha ci wam.”+ Gadia Saulu ôr ken ishima na ér: ‘Me wua un sha uwegh agh ga. Me de uwegh ku Mbafiliti ku wua un.’+
18 Davidi gema kaa a Saulu ér: “Mo man anmgbianev av man ya u terem, se mba di nyi ken Iserael ve, me hingir wankem u toro?”+
19 Nahan kpa, shighe va kom u a na Davidi wan u Saulu u kwase, Merabi yô; i vande tôôn un nan Aderiel+ Ormehola hingir kwase na.
20 Hen shighe ne, Davidi doo wan u Saulu u kwase, Mikal+ ishima, maa i za ôr Saulu kwagh ne, nahan doo un kpishi.
21 Tsô Saulu kaa ér: “Me na Davidi Mikal, a hingir kwaghhônon hen a na, sha er Mbafiliti vea wua Davidi yô.”+ Maa Saulu ôr a Davidi sha kwa har ér: “Hingir wan wam kem nyian.”
22 Shi Saulu kaa a mbatomov nav ér: “Za lam nen a Davidi ken iuv, kaa nen ner, ‘Nenge! Doo tor a we, shi mbatomov nav cii soo kwagh wou. Nahan hingir wankem u tor.’”
23 Mbatomov mba Saulu mba za ôron Davidi akaa ne yô, Davidi kaa ér: “Ne hen ner ka kwagh u cuku u mo u m lu icanor shi m lu a icivir kpishi ga ne, m hingir wankem u toro?”+
24 Maa mbatomov mba Saulu za kaa a na ér: “Ka akaa a Davidi a ôr je ne.”
25 Nahan Saulu kaa ér: “Ka kwagh u ne za ôr a Davidi je ne, ner: ‘Tor soo ér we u na kem ga,+ kpa ér we u za wua Mbafiliti 100, we u va a ikyav*+ i tesen ér u wua ve, sha er a or iyev sha mbahyomov mba tor yô.’” Gadia Saulu lu keren ér Mbafiliti ve wua Davidi.
26 Tsô mbatomov nav za ôr Davidi akaa ne, nahan doo Davidi u lun wankem u tor.+ Kpa cii man shighe u i ver la a kuma yô,
27 Davidi za vea ior nav za wua nomso mba Mbafiliti 200, maa a va a ikyav a va tese Saulu ér un wua Mbafiliti, sha er una hingir wankem u tor yô. Sha nahan yô, Saulu na un wan na u kwase Mikal hingir kwase na.+
28 Nahan Saulu kav ér Yehova lu a Davidi,+ shi Davidi doo wan na u kwase Mikal ishima.+
29 Kwagh ne na yô, kwagh u Davidi hemba cier Saulu iyol cii, nahan Saulu hingir u kôron Davidi ihyom sha ayange a uma na cii.+
30 Mbahemenev mba Mbafiliti ve due ve za ityav, kpa vea za ityav je, kwagh a hemba zan a Davidi doon* a mbatomov mba Saulu cii;+ nahan iti na za gwa kpishi.+
