Samuel u Hiihii 27:1-12
-
Mbafiliti na Davidi Shikelagi (1-12)
27 Nahan kpa, Davidi kaa ken ishima na ér: “Iyange igen me kpe sha ikyev i Saulu. Kwagh u a hembe doon u me er yô, me yevese+ me yem ken tar u Mbafiliti; maa Saulu una de u keren mo hen haregh u Iserael cii,+ nahan me war sha ikyev na.”
2 Tsô Davidi mough vea ior 600+ mba ve lu vea na la yem hen Akishi+ wan u Maoki, tor u Gati.
3 Davidi lu vea Akishi hen Gati, un man ior nav, hanma or a ya u nan. Davidi lu vea kasev nav uhar; lu Ahinoam,+ kwase u ken Yesereel, man Abigail+ Kwasekarmel, kwasecôghol u Nabal la.
4 Mba za kaan a Saulu ér Davidi yevese yem ken Gati yô, a de u keren un.+
5 Tsô Davidi kaa a Akishi ér: “Aluer doo u a mo yô, ôr ve ve nam ijiir i môm ken agar a ken toho la sha er me za lu her yô. Doo u wanye wou una lu vea we ken gar u tor ga.”
6 Nahan Akishi na un Shikelagi+ sha iyange la. Ka nahan ve Shikelagi a lu gar u ator a Yuda zan zan nyian ye.
7 Shighe u* Davidi lu ken tar u Mbafiliti la yô, lu inyom i môm man iwer inyiin.+
8 Davidi yange a mough a kôndo vea ior nav ve za ta ityav sha Mbageshur+ man Mbagirshi kua Mbaamaleki,+ gadia tar u ve tema her la hii hen Telam yem zan zan nyôr Shur+ kar sen za nyôr ken tar u Igipiti.
9 Yange Davidi una za ta num sha tar la yô, a de nomsoor shin kwase môm nan lu uma ga;+ kpa a gema a kura iyôngo man ibua man ujaki man urakumi kua akondo, una been yô, a hide hen Akishi.
10 Nahan Akishi a pine ér: “Ka han u za nôngo ityav nyiana?” Davidi a gema a kaa ér: “Ka ken imbusutariyan i* Yuda”+ shin “Ka ken imbusutariyan i Mbayerameel”+ gayô “Ka ken imbusutariyan i Mbakeni.”+
11 Davidi a de ér i hide a nomsoor shin kwase ken Gati uma ga, a kaa ér: “Sha er vea za ôr ve kwagh wase vea kaa ér, ‘Ka kwagh u Davidi a er ne ga yô.’” (Lu kwagh u eren shighe u lu ken tar u Mbafiliti je la.)
12 Tsô Akishi na Davidi jighjigh, a kaa ken ishima na ér: ‘Kwagh na vihi ior nav Iserael je ka ashe tugh ga, nahan una za hemen u lun wanye wam.’
