Samuel u Hiihii 28:1-25
-
Saulu za hen kwase ugen u lamen a ujijingi mba mbakpenev hen En-dor (1-25)
28 Sha ayange la, Mbafiliti kohol akumautya a ve u nôngon ityav a Iserael.+ Nahan Akishi pine Davidi ér: “U fa er i gbe u we man ior ou ne due ne za ityav vea mo kpa?”+
2 Davidi maa kaa a Akishi ér: “U lan kwagh u wanye wou una er ga.” Nahan Akishi kaa a Davidi ér: “Ka nahan me ver u, u lu orkuran mo gbem ye.”+
3 Hen shighe ne Samuel kpe, nahan Iserael cii vaa un shi za ii un ken gar na ken Rama.+ Saulu vande been a mbalamen a ujijingi mba mbakpenev man mbatsenganpasenakaa ken tar la kera.+
4 Mbafiliti kohol imôngo yem za haa afo ken Shunem,+ maa Saulu kpa kohol Iserael cii ve za haa afo ken Gilboa.+
5 Saulu nengen a afo a Mbafiliti yô, cier un iyol shi ishima ta un kwe tsung.+
6 Er Saulu a pine Yehova kwagh nahan kpa,+ mayange Yehova a lam a na ga, ken mnya shin sha Urim+ shin sha ikyev i uprofeti kpaa ga.
7 Ken masejime yô, Saulu kaa a mbatomov nav ér: “Kerem nen kwase u nan lamen a ujijingi mba mbakpenev yô,+ m za m za nenge a nan.” Mbatomov nav gema kaa a na ér: “Nenge! Kwase ugen ngu ken En-dor+ u a lamen a ujijingi mba mbakpenev yô.”
8 Tsô Saulu yer iyol shi haa akondo agen iyol, maa za hen kwase la tugh vea ior nav uhar. A kaa ér: “Wea lumun yô, kpehem ishor sha tahav ou mbu lamen a ujijingi mba mbakpenev la,+ nahan vam a or u me kaa a we mer vam a nan la.”
9 Nahan kpa, kwase la gema kaa a na ér: “Ka keng u fa kwagh u Saulu er yô. Yange bee a mbalamen a ujijingi mba mbakpenev man mbatsenganpasenakaa ken tar ne kera.+ Nahan er nan u lu nôngon wer u meem i za wuama?”+
10 Saulu maa bum a na ken iti i Yehova, kaa ér: “Mimi je, er Yehova a lu u uma ne, u lu a ibo sha kwagh ne ga!”
11 Kwase la maa pine ér: “M va u a ana?” A gema a kaa ér: “Vam a Samuel.”
12 Kwase la nengen a “Samuel”*+ yô, a ngor taver taver, maa a pine Saulu ér: “Er nan u bumum? U ngu Saulu!”
13 Tor maa kaa a na ér: “De cie ga, kpa ka nyi u nenge a mini?” Kwase la gema kaa a Saulu ér: “M nenge a or u lun er aôndo nahan, nan ngu duen shin inya.”
14 Fese je a pine kwase la ér: “Or shon nan ngu nena?” Kwase la gema kaa ér: “Ka orbeen iyol nan lu duen ye; nan hua ikyondo i lun a ave ga.”+ Nahan Saulu mase kaven ér ka “Samuel,” tsô a ngurum a wa ityough inya, maa a yav inya.
15 Nahan “Samuel” pine Saulu ér: “Er nan u zem iyol, u ne i dugh a mo sha?” Saulu gema kaa ér: “M nyôr ken zayol u vesen. Mbafiliti mba nôngon num a mo, man yô, Aôndo undum, shi kera lamen a mo ga, sha ikyev i uprofeti shin ken mnya kpaa ga;+ ka nahan ve m lu yilan we mer ôrom kwagh u me er ye.”+
16 Maa “Samuel” pine ér: “Er nan u lu pinen mo kwagh hegen u Yehova a undu u,+ shi a lu ihyom a we nee?
17 Yehova una er kwagh u yange tsengaôron sha ikyev yam la iyol na, ér: Yehova una ande tartor la hen a we kera, una gema u una na orgen, ka Davidi je la.+
18 Er yange u ungwa imo i Yehova ga, shi u tese ishima i i vihi un tsung la sha Mbaamaleki ga yô,+ ka nahan ve Yehova a lu eren kwagh ne a we sha iyange ne ye.
19 Yehova una na Iserael man we cii sha ikyev i Mbafiliti,+ nahan kper we+ man ônov ou mba nomso+ ne va kohol mo. Yehova shi una na ikyumutya i Iserael sha ikyev i Mbafiliti.”+
20 Fese je, Saulu sen yav inya, cier un iyol tsung sha ci u akaa a “Samuel” ôr la. Shi kera lu a agee ga, sha ci u ya kwagh ga iyange jimin kua tugh cii.
21 Kwase la ve hen Saulu va nengen er ishima i ze un iyol kpishi yô, a kaa a na ér: “Wanyekwase wou ungwa imo you er kwagh u u kaa la, shi m ver uma wam sha zongo,*+ m er kwagh u u kaam wer m er la.
22 Wea lumun yô, kegh ato a kwagh u wanyekwase wou a soo u ôron we ne. De m na u beredi ya; sha er u zua a agee u hide u yem yô.”
23 Kpa a venda, a kaa ér: “Me ya kwagh ga.” Nahan kpa, mbatomov nav man kwase la zer zamber a na ér a ya kwagh. Ken masejime yô, a ungwa imo ve, a mough hen inya sha, a tema sha gambe.
24 Kwase la lu a gumbua u kehen dindim dindim hen ya; fese je a sôngo un,* shi a tôô mwem a hôr hingir ijenmwe, a kaa beredi u i we kwa sha mi ga yô.
25 Maa a tôô a za na Saulu man mbatomov nav ve ya. Maa ve va mough tugh ve yem.+
