Samuel u Hiihii 3:1-21
-
I yila Samuel ér a lu profeti (1-21)
3 Samuel wanyenomso la, lu eren Yehova tom+ sha ishigh ki Eli. Kpa sha ayange la, Yehova kera faan lamen a ior ga; shi ior faan nengen mbampase mba sha mnenge+ kpaa ga.
2 Iyange igen yô, Eli yav ape vanden yaven la, shi ashe a na lu mir mir; kera faantyô u nengen ga.+
3 Imenger* i ken iyou i Aôndo+ lu a pir ga, shi Samuel yav ken tempel*+ u Yehova ape areki u Aôndo lu la.
4 Yehova maa yila Samuel. Samuel lumun kaa ér: “Mo ne.”
5 Nahan a yevese a za hen Eli, a za kaa ér: “M va ve, gadia u yilam.” Kpa Eli kaa ér: “M yila u ga. Hide za yav inya.” Maa a yem a za yav inya.
6 Shi Yehova yila ér: “Samuel!” Nahan Samuel mough za hen Eli za kaa ér: “M va ve, gadia u yilam.” Kpa Eli kaa ér: “M yila u ga, wan wam. Hide za yav inya.”
7 (Hen shighe ne, Samuel lu a fa Yehova ga, shi Yehova lu a vande ôron un loho ga.)+
8 Tsô shi Yehova yila sha kwa tar, ér: “Samuel!” Maa Samuel mough za hen Eli za kaa ér: “M va ve, gadia u yilam.”
Maa Eli mase kaven er lu Yehova lu yilan wanyenomso la yô.
9 Tsô Eli kaa a Samuel ér: “Yem za yav inya, nahan aluer a yila u yô, kaa wer, ‘Lam, Yehova, gadia wanye wou ngu ungwan.’” Maa Samuel hide za yav hen ijiir na.
10 Yehova shi va tile her, yila er ashighe agen la nahan, ér: “Samuel, Samuel!” Samuel gema kaa ér: “Lam, gadia wanye wou ngu ungwan.”
11 Yehova kaa a Samuel ér: “Nenge! M ngu eren kwagh ugen ken Iserael u hanma or u nan ongo cii, a kpiligh nan iyol+ yô.*
12 Sha iyange la, me er hanma kwagh u yange m ôr sha Eli man ya na la cii, ken mhii zan zan mkur.+
13 Ôr un kpee je wer m ngu van a ijir i tsôron sha ya na sha ci u isholibo i a ongo kwagh sha mi la;+ gadia ônov nav mba nomso mba tuhwan Aôndo,*+ kpa a venda a ve ga.+
14 Ka nahan ve m bum a ya u Eli mer mayange a wam isholibo i ya u Eli la sha u nan iniav shin uiyua+ ga ye.”
15 Samuel yav zan zan sev mbu aven yô, a mough a za bugh ihinda i iyou i Yehova. Cier Samuel iyol u za ôron Eli mpase u sha mnenge la.
16 Kpa Eli yila Samuel kaa ér: “Samuel, wan wam!” Maa Samuel lumun kaa ér: “Mo ne.”
17 Eli pine ér: “Ka loho u nyi a ôr u we? Wea lumun yô, de yeren mo u ga. Aôndo a tsaha u tsung, aluer u yerem kwagh môm ken akaa a a ôr u la cii yô.”
18 Tsô Samuel ôr un hanma kwagh, a yer un kwagh môm ga. Maa Eli kaa ér: “Ka Yehova. A er kwagh u a nenge i doo un yô.”
19 Samuel za hemen u vesen, shi Yehova lu a na,+ shi Aôndo na akaa a Samuel ôr la cii kure sha mi.*
20 Mbaiserael cii, hii hen Dan zan zan nyôr Bersheba, hingir u fan ér Yehova tsua Samuel hingir profeti na.
21 Shi Yehova za hemen u anden hen Shilo, sha ci u Yehova pase iyol na hen Samuel hen Shilo sha kwaghôron u Yehova.+
