Samuel u Hiihii 8:1-22
8 Samuel va been iyol yô, a ver ônov nav mba nomso ér ve ôron Iserael ijir.
2 Iti i wan na u hiihii lu Yoel, iti i wan na u sha uhar di lu Abiya;+ ve lu ôron ajir ken Bersheba.
3 Kpa ônov nav mban zende sha igbenda na ga; ve ver ishima u keren mtsera u sha anyighe,+ shi ve ngohol ingyatu+ ve ôr ijir sha mimi ga.+
4 Shighe kar yô, mbatamen mba Iserael cii kohol imôngo mough va hen Samuel ken Rama.
5 Ve kaa a na ér: “Nenge! U bee iyol, kpa ônov ou mba nomso mba zenden sha igbenda you ga. Nahan na se tor nana ôron se ijir, er akuraior agen cii a eren nahan.”+
6 Kpa kwagh u ve ôr ér: “Na se tor u nana ôron se ijir” la doo Samuel ga.* Tsô Samuel er msen hen Yehova,
7 maa Yehova kaa a Samuel ér: “Er hanma kwagh u ior mbara ve ôr a we cii; sha ci u ka we ve vende ga, kpa ka Mo ve vende ér m de lu tor ve ga ye.+
8 Mba eren kwagh vough er yange ve er, shighe u m due a ve ken Igipiti la nahan zan zan nyian; ka ve undum ve yem+ ve za civir mbaaôndo mbagen,+ man ka kwagh u ve lu eren a we je la.
9 Nahan er kwagh u ve soo la. Kpa gema ta ve icin gbang gbang; ôr ve kwagh u tor u nana hemen ve la nana lu a tahav mbu kaan a ve ér ve er yô.”
10 Tsô Samuel ôr ior mba ve lu kaan ér i na ve tor la hanma kwagh u Yehova ôr cii.
11 A kaa ér: “Ka kwagh u tor u nana hemen ne la nana lu a tahav mbu kaan a ven ér ne er je ne:+ Nana tôô ônov enev mba nomso+ nana ver vea nengen sha akekeautya+ a nan, shi nana gema ve vea hingir mba hendan nan anyinya,+ shi ve mbagenev vea yevese vea yemen sha hemen u akekeautya a nan.
12 Shi nana ver mbahemenev sha ior dubu dubu,+ man mbahemenev sha ior akunduahargber akunduahargber+ sha ci u nan, shi mbagenev vea kahan nan sule,+ shi vea sundan nan iyiav,+ shi vea varen nan ikyav mbi uityaav man ikyav mbi sha akekeautya a nan.+
13 Shi nana tôô ônov enev mba kasev vea hingir mba nungwan mkurem* man mba yôron iwer man mba kaan kwagh.+
14 Shi nana ngohol ishule yen i hemban doon man ishule i ikyon i wain yen i hemban doon, kua ishule i ikyon i olev yen i hemban doon la,+ nana gema a na mbatomov mba nan.
15 Nana dugh môm-ken-pue u ishule i samuyia yen, man ishule i ikyon i wain yen, nana gema a na mbaeren tor tom man mbatomov mba nan.
16 Shi nana tôô mbatomov enev mba nomso man mba kasev, man uzendenya enev mba hemban doon, kua ujaki enev mba hemban doon la ér, ve er nan tom.+
17 Shi nana ngohol môm-ken-pue, u ikyumuile yen,+ shi ne hingir mbatomov mba nan.
18 Iyange ngi van i ne vaa sha ci u tor u ne tsough sha ci wen la,+ kpa Yehova una ungwa ne sha iyange la ga.”
19 Nahan kpa, ior venda u keghen ato a kwagh u Samuel ôr ve la, ve kaa ér: “Ei, se kange ishima ser se lu a tor u nana hemen se yô.
20 Nahan se lu er akuraior agen la cii nahan; tor wase nana ôron se ijir shi nana hemen se shi nana nôngon se ityav.”
21 Samuel ongo akaa a ior ôr la cii yô, a hide a ôr Yehova.
22 Maa Yehova kaa a Samuel ér: “Er kwagh u ve kaa la; ver tor nana hemen ve.”+ Tsô Samuel kaa a nomso mba Iserael ér: “Hanma wen nana hide nana yem hen gar u nan.”
