Sɩngr sebre 2:1-25
2 Yɩɩ woto la a naan saasã ne tẽngã la bũmb nins fãa sẽn be b pʋsẽ wã* n sa.+
2 La rasem a yopoe-n-soabã sẽn wa n na n ta tɩ Wẽnnaam baasa tʋʋm nins a sẽn da tʋmdã. Rasem a yopoe-n-soabã daare, a sɩngame n na n vʋʋs ne a tʋʋmã fãa a sẽn da tʋmdã.+
3 Dẽ, Wẽnnaam ninga rasem a yopoe-n-soabã barka, la a yeel t’a yaa sõngo, bala baraare, Wẽnnaam sɩnga vʋʋsgo, a sẽn naan bũmba fãa wa sẽn zems ne a raabã poore.
4 Ad saasã la tẽngã naaneg sẽn yɩ to-to b naanegã wakate, daar ning Wẽnnaam a Zeova* sẽn naan tẽngã la saagã.+
5 Tuug baa a ye ra nan pa be tẽngã zugu, tɩ moodã me ra nan pa sɩng yiib tẽngã zug ye. Bala Wẽnnaam a Zeova ra nan pa kɩt tɩ saagã ni tẽngã zug ye. Ninsaal me ra pa be n na n ko tẽngã ye.
6 La wulg n da zẽkd tẽngã zugu, n madgd tẽn-gãongã gilli.
7 Wẽnnaam a Zeova maana ninsaal ne tẽngã tom,+ n fʋʋs vɩɩm vʋʋsem+ a yõ-bogdẽ wã, tɩ ninsaal lebg nin-vɩɩga.*+
8 Sẽn paase, Wẽnnaam a Zeova sela zẽed Edɛn+ sẽn be yaang sẽnesã, n ning ninsaal a sẽn naanã be.+
9 Wẽnnaam a Zeova kɩtame tɩ tɩɩs buud fãa gesg sẽn be yamleoogo, la biis sẽn noom yi tẽngã zugu. A kɩtame me tɩ vɩɩm tɩɩgã+ yi zẽedã tẽn-sʋka, ne sõma la wẽng bãngr tɩɩgã.+
10 Kʋɩlg n da zoet n yit Edɛn n zãgsd zẽedã, la be tɛka, a ra welgdame n lebg kʋɩls a naase.*
11 Pipi soabã yʋʋr la Pisonne. Yaa yẽ la sẽn gũbg Havila soolmã fãa, zĩig ning sãnem sẽn be wã.
12 Soolem-kãng sãnemã yaa sõma. Bedeliyʋm* ne onigs kugr me bee be.
13 Kʋɩlg a yiib-n-soabã boondame tɩ Gihonne. Yaa yẽ la sẽn gũbg Kuus soolmã fãa wã.
14 Kʋɩlg a tãab-n-soabã yʋʋr la Hidekɛlle.*+ Yaa yẽ la sẽn zoet n teesd Asiiri yaangã.+ La kʋɩlg a naas-n-soabã yaa Efrate.+
15 Wẽnnaam a Zeova talla ninsaal n tɩ zĩnig Edɛn zẽedẽ wã sẽn na yɩl t’a ko-a, la a ges a yelle.+
16 Sẽn paase, Wẽnnaam a Zeova kõo ninsaal noore, n yeele: “Fo tõe n dɩɩ tɩɩs nins fãa sẽn be zẽedẽ wã biis wa f sẽn date.+
17 La sã n yaa ne sõma la wẽng bãngr tɩɩgã, fo pa segd n dɩ a biisã ye. Bala daar ning fo sẽn na n dɩ a bila, hakɩɩka, fo na n kiime.”+
18 Rẽ poore, Wẽnnaam a Zeova yeelame: “Pa sõma tɩ raoã kell n zĩnd a yembr ye. Mam na n maana sõangd sẽn zems ne-a, n kõ-a.”+
19 La Wẽnnaam a Zeova ra yãkda tẽngã tom n maand we-rũmsã fãa, la bõn-yɩgdɩ wã sẽn yɩgd yĩngrã fãa, n talld-b n wat ninsaal nengẽ, n na n ges a sẽn na n bool-b to-to. La ninsaal sẽn bool bõn-vɩɩg* fãa to-to, rẽ n lebgd a yʋʋre.+
20 Dẽ, ninsaal pʋda yir dũmsã fãa yʋya, la a pʋd bõn-yɩgdɩ nins sẽn yɩgd yĩngrã, ne we-rũmsã fãa yʋya. La sõangd ra pa be sẽn zems ne ninsaal ye.
21 Rẽ n so tɩ Wẽnnaam a Zeova kɩt tɩ ninsaal gũs tamm. La a sẽn wa n gõe wã, a yãka a sĩifã kõbr a yembre, la a lebs nemdã a zĩigẽ wã.
22 La Wẽnnaam a Zeova rɩka sĩifã kõbr a sẽn yãk raoã yĩngẽ wã n maan paga, n tall-a n wa raoã nengẽ.+
23 Dẽ, raoã yeelame yaa:
“Masã, ada yaa mam kõabã kõbre,la mam yĩngã neongo.
B na n boola yẽ tɩ Paga,bala, b yãk-a-la rao yĩngẽ.”+
24 Yaa rẽ yĩng la rao sẽn na n bas a ba ne a ma n tɩ zĩnd ne a paga,* tɩ b lebg yĩng a yembrã.+
25 La raoã ne a pagã fãa ra yaa b zaala,+ la yãnd da pa tar-b ye.
Vẽnegr toor-toore
^ Ebre, “la b tãb-biisã fãa.”
^ Pipi la woto d sẽn yãt Wẽnnaam yʋ-peellã sẽn welgd yẽ ne wẽnnaam-dãmb a taabã Biiblã pʋgẽ. Ne Ebre wã, yʋʋrã gʋlsda ne gʋls-biis a naase: יהוה (YHWH). Ges-y vẽnegr ning sẽn yaa A4.
^ Bɩ, “sɩ-vɩɩga.” Ne Ebre wã, yaa nefɛs sẽn dat n yeel tɩ “bõn-naandg sẽn vʋʋsde.” Ges-y gom-biis võor bilgrã zĩigẽ.
^ Ebre, “n lebg zut a naase.”
^ Bedeliyʋm yaa tɩɩs kẽer sũm sẽn tar yũ-noogo.
^ Bɩ, “Tɩɩgre.”
^ Bɩ, “sɩ-vɩɩg.”
^ Ebre, “tabend a paga.”
