1. Ania ti masapul nga itultuloy nga aramiden dagiti bautisado a Kristiano?

NABAUTISARANKA kadin? No wen, impakitamon iti publiko a mamatika ken Jehova ken kayatmo ti agserbi kenkuana a kadua ti organisasionna. * Siempre, masapul nga agtultuloy a bumileg ti pammatim ken Jehova. Masapul met nga itultuloymo a pabilgen ti panagtalekmo nga us-usaren ni Jehova ti organisasionna ita.

2-3. Kasano nga iwanwanwan ni Jehova ti organisasionna ita? Mangted kadagiti pagarigan.

² Ita, iwanwanwan ni Jehova ti organisasionna iti pamay-an a mangipakita iti personalidad, panggep, ken pagalagadanna. Usigentayo ti tallo a kualidad ni Jehova a makitatayo iti organisasionna.

³ Umuna, “saan a mangidumduma ti Dios.” (Ara. 10:34) Gapu iti ayat, inted ni Jehova ti Anakna kas “subbot para iti amin.” (1 Tim. 2:6; Juan 3:16) Us-usaren ni Jehova ti ilina a mangikasaba iti naimbag a damag iti amin a dumngeg tapno matulonganna ti adu a magunggonaan iti subbot. Maikadua, ni Jehova ket Dios ti urnos ken talna. (1 Cor. 14:33, 40) No kasta, mainanamatayo a dagiti agdaydayaw kenkuana ket naurnos ken natalna a grupo. Maikatlo, ni Jehova ti ‘Naindaklan nga Instruktor.’ (Isa. 30:20, 21) Dayta ti rason nga ikagkagumaan ti organisasionna nga isuro ti Saona, ti Biblia, iti man kongregasion wenno iti publiko. Kasano a dagita a tallo nga aspeto ti personalidad ni Jehova ket nalawag a makita iti nagkauna a kongregasion Kristiano?  Kasano a maipakpakita dagita iti panawentayo? Ken kasano a matulongannaka ti nasantuan nga espiritu bayat nga agserserbika a kadua ti organisasion ni Jehova ita?

4. Sigun iti Aramid 1:8, ania ti imbilin ni Jesus nga aramiden dagiti pasurotna, ken ania a tulong ti maawatda?

⁴ Idi umuna a siglo. Ti mensahe nga inkasaba ni Jesus ket nangyeg iti namnama iti sangatauan. (Luc. 4:43) Imbilinna kadagiti pasurotna nga itultuloyda ti trabaho a rinugianna, ti panangsaksi “agingga iti kaadaywan a paset ti daga.” (Basaen ti Aramid 1:8.) Siempre, dida maaramid dayta a bukbukodda. Kasapulanda ti nasantuan nga espiritu—ti “katulongan” nga inkari kadakuada ni Jesus.—Juan 14:26; Zac. 4:6.

5-6. Ania dagiti pamay-an a tinulongan ti nasantuan nga espiritu dagiti pasurot ni Jesus?

⁵ Immawat dagiti pasurot ni Jesus iti nasantuan nga espiritu idi Pentecostes 33 C.E. Iti tulong dayta nga espiritu, dagus a rinugianda ti nangasaba, ket iti ababa laeng a tiempo, rinibu ti nangawat iti naimbag a damag. (Ara. 2:41; 4:4) Idi dimteng ti ibubusor, saan a nagbuteng dagiti adalan no di ket nagpatulongda iti Dios. Inkararagda: “Paturedem dagiti adipenmo tapno maitultuloyda nga ibaga ti saom.” Napnoda iti nasantuan nga espiritu ket intultuloyda a ‘situtured nga ibaga ti sao ti Dios.’—Ara. 4:18-20, 29, 31.

⁶ Naipasango dagiti adalan ni Jesus iti dadduma pay a pakarigatan. Kas pagarigan, manmano idi dagiti kopia ti Kasuratan. Awan idi dagiti katulonganda iti panagadal a kas kadagiti adda kadatayo ita. Nagduduma met ti lengguahe dagiti tattao a kasabaanda. Uray no adda dagita a pakarigatan, naaramid dagidiay a nareregta nga adalan ti kasla imposible—iti sumagmamano laeng a dekada, naikasabadan ti naimbag a damag “iti amin a parsua iti baba ti langit.”—Col. 1:6, 23.

7. Nasurok a 100 a tawenen ti napalabas, kasano a naammuan ti ili ni Jehova ti kayatna nga aramidenda, ken ania ti reaksionda?

⁷ Iti moderno a tiempo. Itultuloy ni Jehova nga iwanwan ken pabilgen ti ilina. Siempre, ti kangrunaan a pagtataudan ti panangiwanwan ket ti Sao ti Dios, a naisurat iti tulong ti nasantuan nga espiritu. Naisurat iti dayta ti ministerio ni Jesus ken ti bilinna nga itultuloy dagiti pasurotna ti trabaho a rinugianna. (Mat. 28:19, 20) Idi pay Hulio 1881, imbagan daytoy a magasin: “Saantay a naayaban, wenno napulotan nga umawat iti dayaw ken agurnong iti kinabaknang, no di ket ipaaytayo ti amin a tiempo ken pigsatayo, ken ikasaba ti naimbag a damag.” Kuna ti bokleta a To Whom the Work Is Entrusted a naipablaak idi 1919: “No ar-arigen, nagdakkel ti trabaho, ngem trabaho dayta ti Apo, ket pabilgennatayo a mangitungpal iti dayta.” Wen, kas kadagiti nagkauna a Kristiano, situtured nga inaramid dagitoy a kakabsat ti amin a kabaelanda ta nagtalekda a tulongan ida ti nasantuan nga espiritu a mangasaba iti amin a kita ti tattao. Kasta met laeng ti panagtalektayo ita.

8-9. Ania dagiti pamay-an nga us-usaren ti organisasion ni Jehova tapno maisaknap ti naimbag a damag?

⁸ Idi pay laeng, us-usarenen ti organisasion ni Jehova dagiti kasayaatan nga alikamen tapno maisaknap ti naimbag a damag. Karaman kadagitoy nga alikamen dagiti nayimprenta a publikasion, ti “Photo-Drama of Creation,” phonograph, sound car, programa iti radio, ken ti kabaruan, ti kompiuter ken Internet. Ipatpatarus met ti organisasion ti Dios ti naimbag a damag iti kaaduan pay laeng a lengguahe! Apay? Tapno maammuan ti amin a kita ti tattao ti naimbag a damag iti mismo a lengguaheda. Saan a mangidumduma ni Jehova. Impadtona a maipakaammo ti naimbag a damag iti “tunggal nasion ken tribu ken lengguahe  ken ili.” (Apoc. 14:6, 7) Kayatna a maammuan ti amin ti mensahe ti Pagarian.

⁹ Kasano ngay dagidiay narigat a danonen, nalabit gapu ta agnanaedda kadagiti guardiado nga apartment? Tapno makasabaan ti ad-adu kadagitoy a tattao, tinulongan ni Jehova ti organisasionna a mangusar iti nadumaduma a kita ti panangasaba iti publiko. Kas pagarigan, idi 2001, inaprobaran ti Bagi a Manarawidwid ti panagusar kadagiti cart ken dadduma pay a pagidispleyan iti publikasion idiay France ken idi agangay, uray iti dadduman a lugar. Nagsayaat dagiti resultana. Idi 2011, nairugi ti baro a programa idiay United States iti maysa kadagiti paset ti New York City a kaaduan iti tao. Iti dayta nga umuna a tawen, 102,129 a libro ken 68,911 a magasin ti naipaima. Adda met 4,701 a tattao a nagkiddaw a mayadalan iti Biblia! Nalawag a supsuportaran ti nasantuan nga espiritu daytoy a trabaho. Isu nga inaprobaran ti Bagi a Manarawidwid ti panagusar kadagiti pagidispleyan iti publikasion iti intero a lubong.

10. Ania ti aramidentayo tapno mapasayaattayo ti ministeriotayo?

¹⁰ Ti mabalinmo nga aramiden. Kadagiti gimong ti kongregasion, sansanayennatayo ni Jehova a mangasaba. Iyaplikarmo dagiti maad-adalmo sadiay. Regular a mangasabaka a kadua ti nakaitimpuyogam a grupo ti panangasaba. Matulongandaka dagiti kagrupom a lumaing iti panangasaba ken panangisuro ken maparegtaka kadagiti nasayaat nga ulidanda. Itultuloymo ti mangasaba iti laksid dagiti pakarigatan. Kas ipalagip ti pannakatema a teksto, maitungpaltayo ti pagayatan ti Dios, saan nga iti bukodtayo a bileg no di ket iti tulong ti nasantuan nga espiritu. (Zac. 4:6) Ngamin, trabaho ti Dios ti ar-aramidentayo.

11. Kasano a nagkaykaysa ti bagi a manarawidwid idi umuna a siglo tapno agtalinaed ti urnos iti ili ti Dios?

¹¹ Idi umuna a siglo. Nagkaykaysa ti bagi a manarawidwid idiay Jerusalem tapno agtalinaed ti urnos ken talna iti ili ti Dios. (Ara. 2:42) Kas pagarigan, idi timmaud ti isyu maipapan iti panagkugit idi agarup 49 C.E., inwanwan ti nasantuan nga espiritu ti bagi a manarawidwid tapno masolbar dayta. No saan a nagkaykaysa ti kongregasion maipapan iti daytoy  nga isyu, saan koma a nagbalin nga epektibo ti panangasabada. Uray no Judio dagiti apostol ken panglakayen, saanda a nagpaimpluensia iti tradision dagiti Judio wenno dagiti mangipappapilit iti dayta. Imbes ketdi, nagpaiwanwanda iti Sao ti Dios ken iti espirituna. (Ara. 15:1, 2, 5-20, 28) Ania ti resultana? Binendisionan ni Jehova ti desisionda, nagari ti talna ken panagkaykaysa, ket naitultuloy ti trabaho a panangasaba.—Ara. 15:30, 31; 16:4, 5.

12. Ania ti mangipakita a nalawag nga adda urnos ken talna iti organisasion ni Jehova ita?

¹² Iti moderno a tiempo. Pagtaltalinaeden ti organisasion ni Jehova ti urnos ken talna iti ili ti Dios. Idi pay 1895, addan artikulo iti Nobiembre 15 a Zion’s Watch Tower and Herald of Christ’s Presence a napauluan, “Sidadayaw ken Siuurnos,” a naibatay iti 1 Corinto 14:40. Kuna ti artikulo: “Nagadut’ naibalakad dagiti apostol iti daydi nagkauna nga Iglesia maipapan iti urnos . . . Masapul nga itultuloytayo a suroten dagiti ‘nasaksakbay a naisurat a pakasursuruantayo.’” (Roma 15:4) Wen, ti kasta met laeng nga urnos ken talna a pakailasinan dagiti nagkauna a Kristiano ket nalawag a makita iti organisasion ni Jehova ita. Kas panangyilustrar: No umatenderka iti Panagadal iti Pagwanawanan iti sabali a kongregasion—uray iti sabali a pagilian—ammom no kasano ti pannakaikondukta ti panagadal ken no ania nga artikulo ti maad-adal. Dagus nga agbalin a komportable ti riknam! Posible laeng ti kasta a panagkaykaysa gapu iti espiritu ti Dios!—Sof. 3:9, ftn.

13. Maitunos iti Santiago 3:17, ania dagiti masapul nga isaludsodtayo iti bagitayo?

¹³ Ti mabalinmo nga aramiden. Kayat ni Jehova a ‘taginayonen [ti ilina] ti panagkaykaysa a nagun-odanda babaen ti nasantuan nga espiritu.’ (Efe. 4:1-3) Isu nga isaludsodmo iti bagim: ‘Itantandudok kadi ti talna ken panagkaykaysa iti kongregasion? Natulnogak kadi kadagiti mangidadaulo? Mapagpannurayandak kadi ti sabsabali, nangruna no adda pribilehiok iti kongregasion? Managsapsapaak kadi, manangtulong, ken magagaran nga agserbi?’ (Basaen ti Santiago 3:17.) No makitam nga adda pay dagiti masapul a pasayaatem, ikararagmo ti nasantuan nga espiritu. No  ad-adda nga ipalubosmo a dayta ti mangmolde iti personalidadmo ken mangimpluensia iti tigtignaymo, ad-adda nga ayaten ken ipategdakanto dagiti kakabsat.

14. Sigun iti Colosas 1:9, 10, kasano nga insuro ni Jehova ti ilina idi umuna a siglo?

¹⁴ Idi umuna a siglo. Maragsakan unay ni Jehova a mangisuro iti ilina. (Sal. 32:8) Kayatna a maam-ammoda isuna, ayatenda, ken agbiagda nga agnanayon kas dungdungnguenna nga annak. Imposible amin dagitoy no saannatayo nga isuro. (Juan 17:3) Inusar ni Jehova ti kongregasion Kristiano idi umuna a siglo tapno isurona ti ilina. (Basaen ti Colosas 1:9, 10.) Timmulong met ti nasantuan nga espiritu—ti “katulongan” nga inkari ni Jesus. (Juan 14:16) Nakatulong dayta kadagiti adalan tapno umuneg ti pannakaawatda iti Sao ti Dios, ken impalagipna kadakuada ti adu nga imbaga ken inaramid ni Jesus. Adu kadagita a detalye ti naisurat idi agangay kadagiti Ebanghelio. Dayta a pannakaammo ti nangpabileg iti pammati dagiti nagkauna a Kristiano ken nangpauneg iti panagayatda iti Dios, iti Anakna, ken iti maysa ken maysa.

15. Ania dagiti nakitam a pamay-an a tungtungpalen ni Jehova ti karina iti Isaias 2:2, 3?

¹⁵ Iti moderno a tiempo. Impadto ni Jehova nga “iti maudi a paset dagiti aldaw,” dagiti tattao iti amin a nasion ket mapan iti piguratibo a bantayna tapno isurona ida iti daldalanna. (Basaen ti Isaias 2:2, 3.) Makitkitatayon a matungtungpal dayta a padto. Naitan-oken ti pudno a panagdaydayaw a nangatngato ngem iti amin a kita ti narugit a panagdaydayaw. Ken nagadu a naespirituan a taraon ti ipapaay ni Jehova! (Isa. 25:6) Babaen ti “matalek ken masirib nga adipen,” saan laeng nga aglaplapusanan dagiti ipapaayna no di ket nadumaduma pay, a kas kadagiti artikulo, palawag, digital animation, ken video. (Mat. 24:45) Mariknatayo  ti kas iti narikna idi ti gayyem ni Job a ni Elihu, a siuumiso a nangibaga: “Asino ti mannursuro a kas [iti Dios]?”—Job 36:22.

16. Ania ti mabalinmo nga aramiden tapno rumang-ay ti espiritualidadmo?

¹⁶ Ti mabalinmo nga aramiden. Tulongannaka ti espiritu ti Dios a mangyaplikar kadagiti mabasbasam ken maad-adalmo iti Sao ti Dios. Ikararagmo ti kas iti inkararag ti salmista: “O Jehova, isuronak maipapan iti dalanmo. Determinadoak a magna iti kinapudnom. Pagkaykaysaem ti pusok nga agbuteng iti naganmo.” (Sal. 86:11) Itultuloymo ngarud ti mangipauneg iti naespirituan a taraon nga ipapaay ni Jehova babaen ti Saona ken ti organisasionna. Siempre, ti kalatmo ket saan laeng a tapno maaddaan iti pannakaammo. Kayatmo nga imula ti kinapudno iti pusom ken iyaplikarmo dayta iti biagmo. Tulongannaka ti espiritu ni Jehova a mangaramid iti dayta. Kayatmo met a paregtaen dagiti kakabsat. (Heb. 10:24, 25) Apay? Gapu ta isuda ti naespirituan a pamiliam. Ikararagmo a tulongannaka ti espiritu ti Dios a mangted kadagiti naimpusuan a komento kadagiti gimong iti kongregasion ken aramidem ti amin a kabaelam no adda pasetmo iti programa. Kadagita a pamay-an a maipakitam ken Jehova ken iti Anakna nga ay-ayatem dagiti ipatpategda a ‘karnero.’—Juan 21:15-17.

17. Ania dagiti pamay-an a maipakitam a simamatalek a supsuportaram ti organisasion ni Jehova?

¹⁷ Din agbayag, ti kakaisuna nga organisasion a mabati ditoy daga ket daydiay iwanwanwan ti espiritu ti Dios. Isu a sireregta a makipagtrabahoka iti organisasion ni Jehova. Ipakitam kadagiti tattao ti di mangidumduma nga ayat ti Dios babaen ti panangipakaammom iti naimbag a damag iti amin. Tuladem ti panangipategna iti urnos ken talna babaen ti panangitandudom iti panagkaykaysa ti kongregasion. Ken dumngegka iti Naindaklan nga Instruktormo babaen ti panangipaunegmo iti amin a naespirituan a taraon nga ipapaayna. Ket inton agpatingga ti lubong ni Satanas, saankanto nga agbuteng. Makapagtakderkanto a situtured a karaman kadagidiay matalek nga agserserbi ken Jehova a kadua ti organisasionna.