Zacarias 4:1-14

  • Maikalima a sirmata: Ti kandelero ken dua a kayo nga olibo (1-14)

    • ‘Saan a babaen ti bileg no di ket babaen ti espirituk’ (6)

    • Diyo umsien ti aldaw dagiti babassit a nangrugian (10)

4  Nagsubli ti anghel a nakisarsarita kaniak ket riniingnak a kas iti panangriingna iti matmaturog.  Insaludsodna: “Ania ti makitam?” Insungbatko: “Makitkitak ti maysa a balitok a kandelero+ nga adda malukong iti rabawna. Adda met pito a lamparana,+ wen pito, ket adda pito a tubo a naikonektar kadagiti lampara ti kandelero.  Adda dua a kayo nga olibo+ iti abay ti kandelero, maysa iti makannawan ti malukong ken maysa iti makannigid.”  Dinamagko iti anghel a makisarsarita kaniak: “Apo, ania ti kaipapanan dagita?”  Kinuna ti anghel: “Dimo kadi ammo ti kaipapanan dagitoy a banag?” Insungbatko: “Saan, apo.”  Kinunana kaniak: “Daytoy ti imbaga ni Jehova ken ni Zerubabel, ‘“Mapasamak amin dagitoy a banag babaen ti espirituk,+ saan a babaen ti puersa militar wenno bileg,”+ kuna ni Jehova a panguluen dagiti armada.  Asinoka, O dakkel a bantay? Iti imatang ni Zerubabel+ agbalinkanto a kapatagan.+ Inton ikabilna ti makinngato a bato a pangleppas iti templo, ipukkawto dagiti tattao: “Nakapimpintas! Nakapimpintas!”’”  Imbaga pay ni Jehova kaniak:  “Inkabil ni Zerubabel ti pundasion daytoy a balay,+ ken isu a mismo ti mangileppas iti dayta.+ Ket maammuanyonto a ni Jehova a panguluen dagiti armada ti nangibaon kaniak kadakayo. 10  Ta asino ti nangumsi iti aldaw dagiti babassit a nangrugian?*+ Ta sigurado nga agragsakto dagiti tattao ken makitada ti tinnag* iti ima ni Zerubabel. Agrag-onto met ti pito a mata ni Jehova a kumitkita iti intero a daga.”+ 11  Dinamagko kenkuana: “Ania ti kaipapanan dagitoy dua a kayo nga olibo iti makannawan ken makannigid ti kandelero?”+ 12  Insaludsodko iti maikadua a daras: “Ania ti kaipapanan dagiti sanga* ti dua a kayo nga olibo a paggapgapuan ti nabalitokan a lana nga agay-ayus iti dua a balitok a tubo a tayaen ti malukong?” 13  Insaludsodna kaniak: “Dimo kadi ammo ti kaipapanan dagitoy a banag?” Insungbatko: “Saan, apo.” 14  Kinunana: “Isuda ti dua a dinutokan ti Apo ti intero a daga, ket agtaktakderda iti abayna.”+

Footnotes

Wenno “babassit a bambanag?”
Lit., “ti bato.”
Kayatna a sawen, dagiti adu ti bungana a sanga.