Maysa nga Apocalipsis ken Juan 14:1-20
14 Kalpasanna, nakitak ket adtoy! ti Kordero+ a nakatakder iti Bantay Sion,+ ket kaduana ti 144,000+ a nasuratan ti mugingda iti naganna ken iti nagan ni Amana.+
2 Adda uni a nangngegko idiay langit a kasla uni ti adu a danum ken kasla uni ti napigsa a gurruod. Ti uni a nangngegko ket kas iti timek dagiti agkankanta bayat a toktokarenda dagiti arpada.
3 Kankantaenda ti kasla baro a kanta+ iti sango ti trono ken ti uppat a sibibiag a parsua+ ken dagiti panglakayen.+ Awan ti makabael a mangsursuro iti dayta a kanta no di laeng ti 144,000,+ a nagatang iti daga.
4 Dagitoy ti saan a nakikamalala kadagiti babbai, ta kinapudnona, nadalusda.+ Isuda dagiti sumursurot iti Kordero iti sadinoman a papananna.+ Dagitoy ti nagatang+ iti sangatauan kas umuna a bungbunga+ para iti Dios ken iti Kordero,
5 ket saan a pulos a mangal-allilaw ti ngiwatda; awan pakapilawanda.+
6 Nakakitaak iti sabali pay nga anghel nga agtaytayab iti tangatang,* ket adda agnanayon a naimbag a damag nga ipakaammona kadagiti agnanaed iti daga, iti tunggal nasion ken tribu ken lengguahe ken ili.+
7 Ipukpukkawna: “Agbutengkayo iti Dios ket idaydayawyo, ta dimtengen ti oras ti panangukomna.+ Agdaydayawkayo ngarud iti Daydiay nangaramid iti langit, daga, baybay,+ ken kadagiti ubbog* ti danum.”
8 Simmaruno ti maikadua nga anghel, ket imbagana: “Naabaken! Naabaken+ ti Babilonia a Dakkel,+ a nangpainum iti amin a nasion iti arak ti derrep* ti seksual nga immoralidadna!”*+
9 Simmaruno kadakuada ti maikatlo nga anghel, ket impukkawna: “Ti asinoman nga agdaydayaw iti narungsot nga animal+ ken iti estatuana ken umawat iti marka iti muging wenno imana+
10 inumennanto met ti puro nga arak ti pungtot ti Dios a maibukbok iti kopa ti pungtotna,+ ket matutuokto iti apuy ken asupre+ iti imatang dagiti nasantuan nga anghel ken iti Kordero.
11 Agpangato iti agnanayon nga awan inggana+ ti asuk ti pannakatutuokda.* Aldaw ken rabii a saan nga aginana dagidiay agdaydayaw iti narungsot nga animal ken iti estatuana, ken ti asinoman nga umawat iti marka ti naganna.+
12 Kasapulan nga agibtur dagiti nasantuan,+ dagiti agtungtungpal kadagiti bilin ti Dios ken mangtultulad iti pammati+ ni Jesus.”
13 Nakangngegak iti timek idiay langit a nangibaga: “Isuratmo daytoy: Manipud ita ken agpatpatuloy, naragsak dagiti natay a matay a maikaykaysa iti Apo.+ Wen, kuna ti espiritu, bay-am ida nga aginana iti panagbannogda, ta kumuyog* kadakuada ti bambanag nga inaramidda.”
14 Kalpasanna, adda nakitak, ket adtoy! maysa a puraw nga ulep, ket nakatugaw iti dayta ti maysa a kasla anak ti tao,+ a nakakorona iti balitok ken nakaiggem iti natadem a kumpay.
15 Adda sabali pay nga anghel a rimmuar iti santuario ti templo, ket impukkawna iti daydiay nakatugaw iti ulep: “Usarem ti kumpaymo ket aggapaska, ta dimtengen ti oras ti panaggapas, ta natangkenanen ti maapit iti daga.”+
16 Daydiay nakatugaw iti ulep inusarna ti kumpayna iti daga, ket nagapas ti maapit iti daga.
17 Adda manen sabali nga anghel a rimmuar iti santuario ti templo idiay langit, a nakaiggem met iti natadem a kumpay.
18 Adda pay sabali nga anghel a rimmuar iti altar, ket adda autoridadna iti apuy. Impukkawna iti daydiay nakaiggem iti natadem a kumpay: “Usarem ti natadem a kumpaymo ket burasem dagiti raay ti ubas ti daga, ta naluomdan.”+
19 Inusar ti anghel ti kumpayna iti daga ket inummongna ti ubas ti daga, sa impuruakna dayta iti dakkel a pagpespesan iti ubas a mangirepresentar iti pungtot ti Dios.+
20 Naipayatpayat dagiti ubas iti ruar ti siudad, ket manipud iti pagpespesan iti ubas, nagayus ti dara iti agarup 296 a kilometro* ken dimmanon ti kaadalemna kadagiti rienda ti kabalio.
