Maysa nga Apocalipsis ken Juan 11:1-19

  • Ti dua a saksi (1-13)

    • Panagipadto a nakabado iti nakersang a lupot iti 1,260 nga aldaw (3)

    • Napapatay ken saan a naitanem (7-10)

    • Napagbiag kalpasan ti tallo ket kagudua nga aldaw (11, 12)

  • Nalpas ti maikadua a kaasi pay, um-umay ti maikatlo (14)

  • Ti maikapito a trumpeta (15-19)

    • Pagarian ti Apotayo ken ti Kristona (15)

    • Madadaelto dagidiay mangdaddadael iti daga (18)

11  Naited kaniak ti maysa a runo a kasla sarukod*+ bayat nga ibagbagana: “Tumakderka ket rukodem ti santuario ti templo ti Dios ken ti altar ken dagidiay agdaydayaw sadiay.  Ngem baybay-am ken saanmo a rukoden ti paraangan iti ruar ti santuario ti templo, ta naited dayta kadagiti nasion, ket ipayatpayatdanto ti nasantuan a siudad+ iti 42 a bulan.+  Tignayekto nga agipadto ti dua a saksik iti 1,260 nga aldaw a nakabadoda iti nakersang a lupot.”  Isimbolo dagitoy ti dua a kayo nga olibo+ ken ti dua a kandelero+ ket agtaktakderda iti sango ti Apo ti daga.+  No adda mayat a mangdangran kadakuada, rummuar ti apuy iti ngiwatda ket lamutenna dagiti kabusorda. No adda mayat a mangdangran kadakuada, kasta ti pannakapapatayna.  Addaan dagitoy iti autoridad a mangirikep iti tangatang*+ tapno saan nga agtudo+ bayat dagiti aldaw nga agipadtoda. Adda met autoridadda a mamagbalin a dara+ kadagiti danum ken mangyeg iti amin a kita ti didigra iti aniaman a tiempo a kayatda.  Inton malpasdan nga agipadto, makigubatto kadakuada ti narungsot nga animal a rimmuar iti nakaun-uneg nga abut ket parmeken ken papatayenna ida.+  Maiwaranto dagiti bangkayda iti kangrunaan a kalsada ti dakkel a siudad a maawagan iti Sodoma ken Egipto iti simboliko a kaipapananna, a sadiay met a nailansa ti Apoda iti kayo.  Tallo ket kagudua nga aldaw+ a buybuyaento ida dagiti tattao ken tribu ken lengguahe ken nasion, ket saanda nga ipalubos a maitanem ti bangkayda. 10  Agragragsak ken agselebrarto dagiti agnanaed iti daga gapu kadakuada, ket agpipinnatuloddanto iti regalo, ta tinutuok ida dagitoy a dua a propeta. 11  Kalpasan ti tallo ket kagudua nga aldaw, ti espiritu ti biag manipud iti Dios ket simrek kadakuada,+ ket timmakderda. Kasta unay ti buteng dagiti nakakita kadakuada. 12  Nakangngegda iti napigsa a timek manipud langit a nangibaga: “Umulikayo ditoy.” Immulida idiay langit babaen ti ulep, ket nakita* ida dagiti kabusorda. 13  Iti dayta nga oras, nagginggined iti napigsa, ket nadadael ti apagkapullo ti siudad. Gapu iti ginggined, natay ti 7,000 a tattao, ket nagbuteng dagiti natedda ken indaydayawda ti Dios ti langit. 14  Nalpas ti maikadua a kaasi pay.+ Kitaem! Agdardaras nga umay ti maikatlo a kaasi pay. 15  Pinuyot ti maikapito nga anghel ti trumpetana.+ Adda napipigsa a timek idiay langit a nangibaga: “Ti pagarian ti lubong ket nagbalinen a Pagarian ti Apotayo+ ken ti Kristona.+ Isu ket agturayto kas ari iti agnanayon nga awan inggana.”+ 16  Nagruknoy ti 24 a panglakayen+ a nakatugaw iti tronoda iti sango ti Dios ket nagdaydayawda iti Dios, 17  nga ibagbagada: “Agyamankami kenka, Jehova* a Dios, a Mannakabalin-amin, nga adda ita+ ken adda idi, ta inusarmo ti dakkel a pannakabalinmo ket nangrugikan nga agturay kas ari.+ 18  Ngem nakapungtot dagiti nasion, ket dimteng ti pungtotmo ken ti naikeddeng a tiempo a maukom dagiti natay ken magunggonaan+ dagiti adipenmo a propeta+ ken dagiti nasantuan ken dagidiay agbuteng iti naganmo, dagiti nanumo ken natan-ok, ken tapno dadaelem dagidiay mangdaddadael* iti daga.”+ 19  Naluktan ti santuario ti templo ti Dios idiay langit, ket nakitak ti lakasa ti tulagna iti santuario ti templona.+ Namin-adu a nagkimat ken naggurruod, sa nagginggined, ken nagtudo iti uraro.* Adda pay dagiti timek a nangngegko.

Footnotes

Wenno “pagrukod a sarukod.”
Wenno “langit.”
Wenno “kitkitaen.”
Kitaem ti App. A5.
Wenno “mangperperdi.”
Wenno “dadakkel a yelo.”