Maysa nga Apocalipsis ken Juan 18:1-24

  • Pannakaabak ti “Babilonia a Dakkel” (1-8)

    • “Rummuarkayo kenkuana, tattaok” (4)

  • Masangitan ti pannakaabak ti Babilonia (9-19)

  • Panagragsak idiay langit gapu iti pannakaabak ti Babilonia (20)

  • Kas iti bato a maitapuakto ti Babilonia iti baybay (21-24)

18  Kalpasan daytoy, nakitak a bumabbaba manipud langit ti sabali pay nga anghel a dakkel ti autoridadna. Ti daga ket nasilnagan iti dayagna.  Impukkawna: “Naabaken! Naabaken ti Babilonia a Dakkel,+ ket daytan ti paggigianan dagiti demonio ken pagaponan ti tunggal narugit nga espiritu* agraman dagiti narugit ken makaparurod a billit!+  Ta gapu iti arak ti derrep* ti seksual nga immoralidadna,* nabiktima ti amin a nasion+ ket nangaramid dagiti ari ti daga iti seksual nga immoralidad kenkuana.+ Bimmaknang dagiti komersiante* iti daga gapu iti kasta unay ken nakababain a kinaluhona.”  Nangngegko nga ibagbaga ti sabali pay a timek manipud langit: “Rummuarkayo kenkuana, tattaok,+ no diyo kayat ti mairaman kadagiti basolna, ken no diyo kayat a lak-amen dagiti didigrana.+  Ta nakadanonen idiay langit ti kaadu ti basolna,+ ket linagip ti Dios dagiti inaramidna a kinaawan hustisia.*+  Aramidenyo met kenkuana ti inaramidna iti sabsabali,+ wen, doblienyo ti panangbalesyo kenkuana gapu kadagiti inaramidna;+ iti kopa+ a nangtimplaanna iti impainumna, mangtimplakayo iti inumenna a mamindua nga ad-adu ngem iti tinimplana.+  No kasano nga intan-okna ti bagina ken nagbiag iti nakababain a kinaluho, pakaruenyo met ti panagtuok ken panagladingitna. Ta sangkaibagana iti bagina, ‘Agtugtugawak a kas reyna, ken saanak a balo, ken diakto pulos agladingit.’+  Dayta ti rason nga iti uneg ti maysa nga aldaw, dumtengto kenkuana dagiti didigra, ipapatay ken panagladingit ken nakaro a bisin, ket interamente a mapuoranto,+ ta napigsa ni Jehova* a Dios a nangukom kenkuana.+  “Agsangitto dagiti ari iti daga a nangaramid iti seksual nga immoralidad* kenkuana ken kaduana a nagbiag iti nakababain a kinaluho ken danogendanto ti bagida gapu ta maladingitanda iti napasamak kenkuana inton makitada ti asuk ti pannakapuorna. 10  Agtakderdanto iti adayo ta mabutengda a matutuokda a kas kenkuana ket ibagada, ‘Kaasika met, kaasika met, sika a dakkel a siudad, sika a Babilonia a nabileg a siudad,+ ta iti uneg laeng ti maysa nga oras, dimteng ti pannakadusam!’ 11  “Gapu met kenkuana, agsangit ken agladingitto dagiti komersiante iti daga, ta awanen ti gumatang iti amin a tagilakoda, 12  amin a tagilakoda a balitok, pirak, nangina a bato, perlas, lienso a lupot, purpura a lupot, seda, ken nalabaga a lupot; ken amin a naaramid iti nabanglo a kayo; ken tunggal kita ti banag a marfil, ken agkakangina a kayo, gambang, landok, ken marmol; 13  ken kanela, rekado ti India, insienso, nabanglo a lana, olibano, arak, lana ti olibo, nasayaat nga arina, trigo, adu a baka, karnero, kabalio, karuahe, adipen, ken biag ti tattao.* 14  Wen, awanen dagiti naimbag a banag a kayatmo a matagikua, ken napukawen kenka ti amin a naimas a makan ken agkakapintas a bambanag. Saanmonton a mapasubli dagita. 15  “Agtakderto iti adayo dagiti komersiante a naglako kadagita ken bimmaknang manipud kenkuana ta mabutengda a matutuokda a kas kenkuana isu nga agsangit ken agladingitda, 16  ken ibagada: ‘Kaasika met, kaasika met, sika a dakkel a siudad, a nakabado idi iti lienso, purpura, ken nalabaga, ken nakaalahas iti nakaad-adu a balitok, nangina a batbato, ken perlas,+ 17  ta iti uneg laeng ti maysa nga oras, napukaw dagita a nakaad-adu a kinabaknang!’ “Nagtakder iti adayo ti amin a kapitan ti barko, tattao nga agbibiahe iti baybay, tripulante, ken dagidiay agsapsapul iti pagbiagda iti baybay 18  ken nagikkisda bayat a kitkitaenda ti asuk ti pannakapuorna sada imbaga, ‘Adda aya kapada dayta a dakkel a siudad?’ 19  Nangikabilda iti tapok kadagiti uloda sada nagikkis, nagsangsangit, ken nagladingit, ken kinunada, ‘Kaasi met, kaasi met, ti dakkel a siudad, a ti kinabaknangna ti bimmaknangan ti amin nga addaan iti barko iti baybay, ta isu ket napukawan iti uneg laeng ti maysa nga oras!’+ 20  “Agragsakkayo iti napasamak kenkuana, O langit,+ ken uray dakayo a nasantuan+ ken dakayo nga apostol ken dakayo a propeta, ta isu ket sinentensiaanen ti Dios a madusa gapu kadakayo!”+ 21  Adda napigsa nga anghel a nangbagkat iti bato a kas iti dakkel a gilingan a bato ket intapuakna iti baybay, nga ibagbagana: “Kasta ti napardas a pannakaitapuak ti Babilonia a dakkel a siudad, ket pulos a dinto masarakanen.+ 22  Pulos a dinton mangngeg manen kenka ti timek dagiti kumakanta bayat a toktokarenda dagiti arpa, ken dagiti musikero, pumaplauta, ken tumutrumpeta. Awanton ti masarakan manen kenka a nalaing a trabahador iti aniaman a pagsapulan, ket pulos a dinton mangngeg kenka ti uni ti gilingan a bato. 23  Awanton ti silaw a manglawag manen kenka, ket awanton a pulos ti mangngeg manen kenka a timek ti nobio ken nobia; ta dagiti komersiantem ket tattao a nangato idi ti saadda iti daga, ken gapu kadagiti aramidmo a konektado iti espiritismo,+ naallilawmo ti amin a nasion. 24  Wen, nasarakan kenkuana ti dara dagiti propeta ken dagiti nasantuan+ ken ti amin a napapatay ditoy daga.”+

Footnotes

Wenno mabalin nga, “anges; sang-aw.”
Wenno “pungtot.”
Iti Griego, por·neiʹa. Kitaem ti Glosario.
Wenno “agdaldaliasat a komersiante.”
Wenno “krimen.”
Kitaem ti App. A5.
Kitaem ti Glosario.
Wenno “kararua.”