Maysa nga Apocalipsis ken Juan 8:1-13

  • Nalukatan ti maikapito a selio (1-6)

  • Panangpuyot iti umuna nga uppat a trumpeta (7-12)

  • Naipakaammo ti tallo a kaasi pay (13)

8  Idi linuktanna+ ti maikapito a selio,+ nagari ti ulimek idiay langit iti dandani kagudua nga oras.  Nakitak ti pito nga anghel+ a nakatakder iti sango ti Dios, ken naited kadakuada ti pito a trumpeta.  Simmangpet ti sabali pay nga anghel a nakaiggem iti balitok a pagkargaan* iti insienso ket napan nagtakder iti altar.+ Naikkan iti adu nga insienso+ nga idatonna iti balitok nga altar+ nga adda iti sango ti trono bayat a mangmangngeg dagiti kararag ti amin a nasantuan.  Ti asuk ti insienso nga adda iti ima ti anghel ket nagpangato iti sango ti Dios agraman ti karkararag+ dagiti nasantuan.  Ngem innala a dagus ti anghel ti pagkargaan iti insienso ket kinargaanna iti apuy manipud iti altar sana impuruak iti daga. Namin-adu a naggurruod ken nagkimat,+ sa nagginggined. Adda met dagiti timek a nangngegko.  Nagsagana ti pito nga anghel a mangpuyot iti pito a trumpetada.+  Pinuyotan ti umuna nga anghel ti trumpetana, ket adda uraro ken apuy a nalaokan iti dara, ket naipuruak iti daga.+ Napuoran ti apagkatlo ti daga, apagkatlo dagiti kayo, ken amin a berde a mula.+  Pinuyot ti maikadua nga anghel ti trumpetana. Naipuruak iti baybay+ ti kasla dakkel a bantay nga umap-apuy. Nagbalin a dara ti apagkatlo ti baybay;+  ken natay ti apagkatlo dagiti sibibiag a parsua iti baybay,+ ken narba ti apagkatlo dagiti barko. 10  Pinuyot ti maikatlo nga anghel ti trumpetana. Natnag manipud langit ti maysa a dakkel a bituen a sumsumged a kas iti pagsilawan, ket nagdisso iti apagkatlo dagiti karayan ken ubbog* ti dandanum.+ 11  Ajenjo* ti nagan ti bituen. Pimmait ti apagkatlo ti dandanum ket natay ti adu a tattao ta pimmait ti danum.+ 12  Pinuyot ti maikapat nga anghel ti trumpetana. Simmipnget+ ti apagkatlo ti init,+ apagkatlo ti bulan, ken ti apagkatlo dagiti bituen, ket awan ti lawag iti apagkatlo ti aldaw ken uray ti rabii. 13  Nakitak, ken nangngegko ti maysa nga agila nga agtaytayab iti tangatang nga ipukpukkawna: “Kaasi pay, kaasi pay, kaasi pay+ dagidiay agnanaed iti daga gapu kadagiti sumarunonto pay nga uni ti trumpeta ti tallo nga anghel a dandanin mangpuyot kadagiti trumpetada!”+

Footnotes

Wenno “pagpuoran.”
Wenno “burayok.”
Mula nga addaan iti napait ken makasabidong a substansia.