Levitico 8:1-36
-
Maisaad ni Aaron ken ti annakna kas papadi (1-36)
8 Intuloy a kinuna ni Jehova ken ni Moises:
2 “Ikuyogmo ni Aaron ken dagiti annakna,+ agraman dagiti opisial a badoda,+ ti nasantuan a lana,+ ti baka a maidaton gapu iti basol, ti dua a kalakian a karnero, ken ti sangabasket a tinapay nga awan lebadurana,+
3 ket ummongem amin a tattao iti ruangan ti tolda a pagkonsultaan.”
4 Inaramid ni Moises ti imbilin ni Jehova, ket inummongna dagiti Israelita iti ruangan ti tolda a pagkonsultaan.
5 Kinuna kadakuada ni Moises: “Daytoy ti imbilin ni Jehova nga aramidentayo.”
6 Pinaasideg ni Moises ni Aaron ken dagiti annakna ket binugguanna ida.+
7 Kalpasanna, kinawesanna ni Aaron iti nagayad a bado,+ binariksanna,+ sa pinasukotanna iti awan manggasna a bado.+ Inyusokna ti efod+ ken pinairutanna iti naabel a sinturon.+
8 Inkabilna ti pektoral+ sa inkapetna iti dayta ti Urim ken ti Tummim.+
9 Kalpasanna, inkabilna iti ulo ni Aaron ti espesial a turbante+ ken inkapetna iti sango dayta ti nasileng a metal a balitok, ti nasantuan a tanda ti dedikasion,*+ kas imbilin ni Jehova ken ni Moises.
10 Innala ni Moises ti nasantuan a lana ket winarsianna ti tabernakulo ken ti amin nga adda iti dayta+ sa imbilangna dagita kas nasantuan.
11 Kalpasanna, namimpito nga inwarsina ti dadduma a lana iti rabaw ti altar ket binukbokanna pay iti lana ti altar, ti amin nga alikamen a mausar iti dayta, ti palanggana, ken ti pagbatayanna tapno agbalinda a nasantuan.
12 Kamaudiananna, imbukbokna ti dadduma a nasantuan a lana iti ulo ni Aaron ket dinutokanna* tapno agbalin a nasantuan.+
13 Kalpasanna, pinaasideg ni Moises dagiti annak ni Aaron ket kinawesanna ida kadagiti nagayad a bado, binariksanna, ken inikkanna* ti uloda iti turbante.+ Inaramid dayta ni Moises kas imbilin ni Jehova.
14 Innalana ti baka a maidaton gapu iti basol ket imparabaw ni Aaron ken dagiti annakna ti imada iti ulo ti baka.+
15 Pinarti dayta ni Moises ket insawsawna ti ramayna iti dara+ sa inkabilna dayta kadagiti sara ken iti amin a sikigan ti altar. Pinagbalinna a nadalus ti altar manipud iti basol, ken imbukbokna ti natedda a dara iti baba ti altar tapno maibilang dayta a nasantuan ken nadalus.
16 Innalana ti amin a taba kadagiti bagis, dalem, ken ti dua a bato agraman dagiti tabada, ket impuor dagita ni Moises iti rabaw ti altar.+
17 Kalpasanna, ti dadduma a paset ti baka—ti kudilna, lasagna, ken takkina—ket napuoran iti ruar ti kampo.+ Inaramid dayta ni Moises kas imbilin ni Jehova.
18 Innalana ti kalakian a karnero ti daton a mapuoran, ket imparabaw ni Aaron ken dagiti annakna ti imada iti ulo ti karnero.+
19 Kalpasanna, pinarti dayta ni Moises ket inwarsina ti dara iti amin a sikigan ti altar.
20 Ginuduaguduana ti kalakian a karnero, ken pinuoranna dayta agraman ti ulo ken ti taba.*
21 Binugguanna dagiti bagis ken gurong sa pinuoranna ti intero a karnero iti rabaw ti altar, kas daton a makaay-ayo* ti banglona. Maysa dayta a daton a mapuoran para ken Jehova. Inaramid dayta ni Moises kas imbilin ni Jehova.
22 Kalpasanna, innalana ti maikadua a kalakian a karnero, ti karnero a maidaton iti pannakaisaad dagiti papadi,+ ket imparabaw ni Aaron ken dagiti annakna ti imada iti ulo ti karnero.+
23 Pinarti dayta ni Moises ket innalana ti dadduma a dara sa impulagidna iti kannawan a piditpidit ni Aaron ken iti tangan ti kannawan nga ima ken sakana.
24 Sumaganad, pinaasideg ni Moises dagiti annak ni Aaron ket inikkanna iti dara ti kannawan a piditpiditda ken ti tangan ti kannawan nga ima ken sakada; ngem inwarsi ni Moises ti natedda a dara iti amin a sikigan ti altar.+
25 Kalpasanna, innalana ti taba, nataba nga ipus, amin a taba kadagiti bagis, dalem, ti dua a bato ken ti tabada, ken ti kannawan a luppo.+
26 Manipud iti basket ti tinapay nga awan lebadurana nga adda iti sanguanan ni Jehova, nangala iti maysa a sinansingsing a tinapay nga awan lebadurana,+ maysa a sinansingsing a tinapay nga adda lanana,+ ken maysa a naingpis a tinapay. Imparabawna dagitoy kadagiti taba agraman ti kannawan a luppo.
27 Kalpasanna, inkabilna amin dagita kadagiti dakulap ni Aaron ken dagiti annakna ket inlilida dagita kas daton a mailili para ken Jehova.
28 Innala dagita ni Moises kadagiti dakulapda ket pinuoranna iti altar agraman ti daton a mapuoran. Maidaton dagita kas daton a makaay-ayo* ti banglona para iti pannakaisaadda kas papadi. Daytoy ket daton a mapuoran para ken Jehova.
29 Innala ni Moises ti barukong ket inngatona nga inlili iti sanguanan ni Jehova.+ Dayta ti bingay ni Moises iti kalakian a karnero a naidaton para iti pannakaisaad dagiti papadi. Inaramid dayta ni Moises kas imbilin ni Jehova.+
30 Kalpasanna, innala ni Moises ti dadduma a nasantuan a lana+ ken dara nga adda iti altar ket winarsianna ni Aaron ken dagiti badona kasta met dagiti annakna ken dagiti badoda. Iti kasta, pinagbalinna a nasantuan ni Aaron, dagiti badona, dagiti annakna,+ ken dagiti badoda.+
31 Kinuna ni Moises ken ni Aaron ken iti annakna: “Lutuenyo+ ti karne iti ruangan ti tolda a pagkonsultaan, ket kanenyo dayta sadiay agraman ti tinapay iti basket a nausar iti pannakaisaad dagiti papadi, kas naibilin kaniak, ‘Kanento dayta ni Aaron ken ti annakna.’+
32 Mapuoran ti aniaman a matedda a karne ken tinapay.+
33 Saankayo a rummuar iti ruangan ti tolda a pagkonsultaan iti pito nga aldaw, agingga a makompleto dagiti aldaw a pannakaisaadyo, ta pito nga aldaw ti pannakaisaadyo kas papadi.*+
34 Imbilin ni Jehova nga aramidentayo ti inaramidtayo ita nga aldaw tapno maabbongan ti basolyo.+
35 Aldaw ken rabii nga agyankayto iti ruangan ti tolda a pagkonsultaan iti pito nga aldaw,+ ket itungpalyo ti obligasionyo ken Jehova,+ tapno saankayo a matay; ta kasta ti naibilin kaniak.”
36 Inaramid ni Aaron ken dagiti annakna ti amin nga imbilin ni Jehova babaen ken Moises.
