Levitico 4:1-35

  • Daton gapu iti basol (1-35)

4  Intuloy a kinuna ni Jehova ken ni Moises:  “Ibagam kadagiti Israelita, ‘No adda asinoman a makabasol gapu ta di inggagara a sinukirna+ ti aniaman nga imbilin ni Jehova, kastoy ti rumbeng a maaramid:  “‘No agbasol+ ti nadutokan* a padi+ a pakairamanan dagiti tattao, masapul a mangidatag ken Jehova iti nasalun-at nga urbon a baka kas daton gapu iti basol a naaramidna.+  Ipanna ti baka iti ruangan ti tolda a pagkonsultaan+ iti sanguanan ni Jehova ket iparabawna ti imana iti ulo ti baka sa partienna iti sanguanan ni Jehova.+  Kalpasanna, alaen ti nadutokan a padi+ ti dadduma a dara ti baka ket ipanna iti tolda a pagkonsultaan.  Isawsaw ti padi ti ramayna iti dara+ ket mamimpito+ nga iwarsina ti dadduma a dara iti sanguanan ni Jehova iti sango ti kortina ti nasantuan a disso.  Ikabil met ti padi ti dadduma a dara kadagiti sara ti altar a pagpuoran iti nabanglo nga insienso,+ nga adda iti sanguanan ni Jehova iti tolda a pagkonsultaan; ket ibukbokna ti amin a natedda a dara ti baka iti baba ti altar ti daton a mapuoran,+ nga adda iti ruangan ti tolda a pagkonsultaan.  “‘Kalpasanna, ikkatenna ti amin a taba ti baka a maidatag kas daton gapu iti basol, agraman ti taba a nangbalkut kadagiti bagis, ti amin a taba a kimpet kadagiti bagis,  ken ti dua a bato agraman ti taba a kimpet kadagita iti asideg dagiti lomo. Ikkatenna met dagiti taba iti dalem agraman dagiti bato,+ 10  kas iti maaramid iti baka a maidatag kas daton a pakikappia.+ Puoran dagita ti padi iti rabaw ti altar ti daton a mapuoran. 11  “‘Ngem ti lalat ti baka ken ti amin a lasag agraman ti ulo, dagiti gurong, bagis, ken takkina+ 12  ti intero a baka—ket ipanna iti ruar ti kampo iti nadalus a lugar a pakaibellengan dagiti dapo,* ken ipuorna+ iti rabaw ti sumsumged a kayo. Masapul a mapuoran dayta iti pakaibellengan dagiti dapo. 13  “‘No makabasol ti intero nga Israel ngem dida inggagara+ ken saanda nga ammo nga adda naaramidda nga iparit ni Jehova,+ 14  ket maammuan ti basol, mangipaayda iti urbon a baka kas daton gapu iti basol ken ipanda iti sanguanan ti tolda a pagkonsultaan. 15  Iparabaw dagiti panglakayen ti imada iti ulo ti baka iti sanguanan ni Jehova, ket maparti ti baka iti sanguanan ni Jehova. 16  “‘Kalpasanna, ipan ti nadutokan a padi ti dadduma a dara ti baka iti tolda a pagkonsultaan. 17  Isawsaw ti padi ti ramayna iti dara ket mamimpito nga iwarsina ti dadduma a dara iti sanguanan ni Jehova iti sango ti kortina.+ 18  Kalpasanna, ikabilna ti dadduma a dara kadagiti sara ti altar+ nga adda iti sanguanan ni Jehova, iti tolda a pagkonsultaan; sa ibukbokna ti amin a natedda a dara iti baba ti altar ti daton a mapuoran, nga adda iti ruangan ti tolda a pagkonsultaan.+ 19  Ikkatenna ti amin a taba ti animal ket puoranna iti altar.+ 20  Aramidenna iti daytoy a baka ti kas iti inaramidna iti baka a maidatag kas daton gapu iti basol. Kalpasanna, idatag dayta ti padi kas daton a pangabbong iti basolda,+ ket mapakawanda. 21  Ipanna ti baka iti ruar ti kampo ket puoranna kas iti inaramidna iti umuna a baka.+ Dayta ket daton gapu iti basol ti intero nga Israel.+ 22  “‘No makabasol ti maysa a panguluen+ gapu ta di inggagara a sinukirna ti maysa kadagiti imbilin ni Jehova a Diosna, 23  wenno mabigbigna ti basol a naaramidna, masapul a mangyeg iti nasalun-at a kalakian nga urbon a kalding kas datonna. 24  Iparabawna ti imana iti ulo ti urbon a kalding ket partienna iti sanguanan ni Jehova,+ iti disso a pagpartian iti daton a mapuoran. Dayta ket daton gapu iti basol. 25  Isawsaw ti padi ti ramayna iti dara ti daton gapu iti basol ket ikabilna dayta kadagiti sara+ ti altar ti daton a mapuoran, sa ibukbokna ti natedda a dara iti baba ti altar ti daton a mapuoran.+ 26  Puoranna ti amin a taba ti animal iti rabaw ti altar kas daton a pakikappia.+ Idaton dayta ti padi kas pangabbong iti basol ti panguluen, ket mapakawanto. 27  “‘No adda asinoman nga umili nga agbasol gapu ta di inggagara a sinukirna ti maysa kadagiti imbilin ni Jehova,+ 28  wenno mabigbigna ti basol a naaramidna, masapul a mangyeg iti nasalun-at a kabaian nga urbon a kalding kas datonna. 29  Iparabawna ti imana iti ulo ti animal kas daton gapu iti basol sa partienna iti disso a pagpartian iti daton a mapuoran.+ 30  Isawsaw ti padi ti ramayna iti dara ti animal ket ikabilna kadagiti sara ti altar ti daton a mapuoran, ken ibukbokna ti amin a natedda a dara iti baba ti altar.+ 31  Ikkatenna ti amin a taba+ ti animal kas iti panangikkatna iti taba ti naidatag kas daton a pakikappia.+ Ipuor dayta ti padi iti rabaw ti altar tapno mangpataud iti makaay-ayo* a banglo ken Jehova. Idatonna dayta kas pangabbong iti basol daydiay a tao, ket mapakawanto. 32  “‘Ngem no mangipaay iti urbon a karnero kas daton gapu iti basolna, masapul a nasalun-at a kabaian. 33  Iparabawna ti imana iti ulo ti daton gapu iti basol ket partienna dayta iti disso a pagpartian iti daton a mapuoran.+ 34  Isawsaw ti padi ti ramayna iti dara ti daton gapu iti basol ket ikabilna dayta kadagiti sara ti altar ti daton a mapuoran,+ sa ibukbokna ti natedda a dara iti baba ti altar. 35  Ikkatenna ti amin a taba ti animal kas iti panangikkatna iti taba ti urbon a kalakian a karnero kas daton a pakikappia. Ipuor dagita ti padi iti rabaw ti altar agraman dagiti daton a mapuoran para ken Jehova+ sa idatagna kas daton a pangabbong iti basol daydiay a tao, ket mapakawanto.+

Footnotes

Wenno “napulotan.”
Wenno “nataba a dapo,” kayatna a sawen, dapo a nabasa iti taba dagiti daton.
Wenno “makapabang-ar.” Lit., “makapakalma.”