Levitico 16:1-34

  • Aldaw ti Panangabbong (1-34)

16  Nakisao ni Jehova ken ni Moises kalpasan ti ipapatay ti dua nga annak ni Aaron gapu iti iyaasidegda ken Jehova.+  Kinuna ni Jehova ken ni Moises: “Ibagam ken Aaron a kabsatmo a saan a basta sumrek iti nasantuan a disso+ iti uneg ti kortina,+ iti sango ti kalub ti Lakasa, tapno saan a matay,+ ta agparangakto iti ulep+ iti rabaw ti kalub.+  “Dagitoy ti masapul nga itugot ni Aaron no sumrek iti nasantuan a disso: maysa nga urbon a kalakian a baka kas daton gapu iti basol+ ken maysa a kalakian a karnero kas daton a mapuoran.+  Masapul nga isuotna ti nasantuan a lienso a bado+ ken ti lienso a sapinna+ ti mangabbong iti bagina,* ket agbarikes iti lienso+ ken ikabilna iti ulona ti espesial a lienso a turbante.+ Nasantuan dagita a bado.+ Masapul nga agdigus+ sa isuotna dagita.  “Masapul a mangala kadagiti Israelita+ iti dua a kalakian nga urbon a kalding kas daton gapu iti basol ken maysa a kalakian a karnero kas daton a mapuoran.  “Idatag ni Aaron ti kalakian a baka kas daton gapu iti basol, a para kenkuana, tapno maabbongan ti basolna+ ken ti pamiliana.  “Kalpasanna, alaenna ti dua a kalding ket patakderenna dagita iti sanguanan ni Jehova iti ruangan ti tolda a pagkonsultaan.  Pilien ni Aaron babaen ti panagbunot no ania kadagiti dua a kalding ti para ken Jehova ken ti agbalin kas Azazel.*  Idatag ni Aaron ti kalding a napili+ para ken Jehova ket pagbalinenna kas daton gapu iti basol. 10  Ngem ti kalding a napili nga agbalin kas Azazel pagtakderenna a sibibiag iti sanguanan ni Jehova ken aramidenna iti dayta ti seremonia ti panangabbong, sa ibulosna ti kalding iti let-ang.+ 11  “Idatag ni Aaron ti kalakian a baka, a para kenkuana,+ kas daton gapu iti basol tapno maabbongan ti basolna ken ti pamiliana, sa partienna ti baka. 12  “Kalpasanna, alaenna ti pagikkan iti insienso+ a napno iti beggang manipud iti altar+ iti sanguanan ni Jehova ken ti dua a rakem a napino ken nabanglo nga insienso,+ ket ipanna dagita iti uneg ti kortina.+ 13  Ikabilna met ti insienso iti beggang iti sanguanan ni Jehova,+ ket ti asuk* ti insienso abbonganna ti kalub+ ti Lakasa ti Testimonia,+ tapno saan a matay. 14  “Isawsawna ti ramayna iti dadduma a dara ti baka+ ket ipatedtedna dayta iti sanguanan ti makindaya a sikigan ti kalub, ket mamimpito nga ipatedtedna ti dadduma a dara iti sanguanan ti kalub.+ 15  “Kalpasanna, partienna ti kalding kas daton gapu iti basol para kadagiti Israelita,+ ket ipanna ti dara+ iti uneg ti kortina+ ken aramidenna met laeng ti inaramidna iti dara ti baka. Ipatedtedna dayta iti kalub ken iti sangona. 16  “Masapul nga aramiden ni Aaron daytoy a panangdalus iti Kasasantuan gapu kadagiti narugit nga aramid dagiti Israelita ken kadagiti kamali ken basolda.+ Kasta met ti aramidenna iti tolda a pagkonsultaan, nga adda iti tengnga dagitoy nga agar-aramid iti kinarugit. 17  “Masapul nga awan ti sabali a tao iti tolda a pagkonsultaan no sumrek iti nasantuan a disso tapno mangaramid iti seremonia ti panangabbong agingga a rummuar. Aramidenna dayta para iti bagina, iti pamiliana,+ ken iti intero nga Israel.+ 18  “Kalpasanna, rummuar a mapan iti altar,+ nga adda iti sanguanan ni Jehova, ket mangaramid iti seremonia ti panangabbong para iti dayta. Alaenna ti dadduma a dara ti baka ken kalding ket ikabilna kadagiti sara iti amin a sikigan ti altar. 19  Isawsawna met ti ramayna iti dadduma a dara sa mamimpito a patedtedanna ti altar ket dalusanna dagiti narugit nga aramid dagiti Israelita. 20  “No malpasen ti seremonia ti panangabbong+ para iti nasantuan a disso, iti tolda a pagkonsultaan, ken iti altar,+ idatonna met ti sibibiag a kalding.+ 21  Iparabaw ni Aaron ti dua nga imana iti ulo ti sibibiag a kalding ken ipudnona ti amin a salungasing ken basol dagiti Israelita, ket ikabilna dagita iti ulo ti kalding.+ Kalpasanna, itedna ti kalding iti lalaki a napili* a mangipan iti let-ang. 22  Awiten ti kalding ti amin a basolda+ ket ipanna dagita iti maysa a desierto,+ sa maibulos ti kalding iti let-ang.+ 23  “Kalpasanna, sumrek ni Aaron iti tolda a pagkonsultaan ket uksobenna dagiti lienso a badona nga insuotna idi simrek iti nasantuan a disso, sa idissona dagita sadiay. 24  Masapul nga agdigus*+ iti nasantuan a disso sa isuotna dagiti badona.+ Rummuar ken idatagna ti datonna a mapuoran+ ken ti daton dagiti umili ket aramidenna ti seremonia ti panangabbong para kenkuana ken kadagiti umili.+ 25  Puoranna iti rabaw ti altar ti taba ti daton gapu iti basol. 26  “Ti lalaki a nangibulos iti kalding nga agbalin kas Azazel+ masapul a labaanna dagiti badona ken agdigus sakbay a sumrek iti kampo. 27  “Ti baka ken kalding a naidatag kas daton gapu iti basol, a naipan ti darada iti nasantuan a disso tapno maaramid ti seremonia ti panangabbong, ket maipan iti ruar ti kampo sa mapuoran ti kudil, lasag, ken takkida.+ 28  Daydiay mangpuor kadagita masapul a labaanna dagiti badona ken agdigus sakbay a sumrek iti kampo. 29  “Daytoy ti agnanayon a paglintegan a masapul a tungpalenyo: Iti maika-10 nga aldaw ti maikapito a bulan, masapul a parigatenyo ti bagiyo,* ken dikay agtrabaho iti aniaman,+ dakayo ken dagiti ganggannaet a residente. 30  Iti daytoy nga aldaw, maaramidto ti seremonia ti panangabbong+ tapno maipakaammo a nadaluskayo. Madalusankayto iti amin a basolyo iti sanguanan ni Jehova.+ 31  Aldaw dayta ti sabbath ket naan-anay nga aginanakayo ken masapul nga agladingitkayo.+ Agnanayon daytoy a paglintegan. 32  “Ti padi a nadutokan+ ken naisaad* nga agserbi kas padi+ a mangsukat ken amana+ ket mangaramid iti seremonia ti panangabbong ken isuotna dagiti nasantuan a lienso a bado.+ 33  Aramidenna ti seremonia ti panangabbong para iti nasantuan a disso,+ iti tolda a pagkonsultaan,+ ken iti altar;+ kasta met kadagiti papadi ken iti intero nga Israel.+ 34  Daytoy ti agnanayon a paglintegan a masapul a tungpalenyo,+ ket maminsan iti makatawen+ a maaramid ti seremonia ti panangabbong para iti amin a basol dagiti Israelita.” Inaramid dayta ni Aaron kas imbilin ni Jehova ken ni Moises.

Footnotes

Wenno “makitkita a lasagna.”
Mabalin a kaipapananna, “Kalding nga Agpukaw.”
Lit., “ulep.”
Wenno “nakatakder a nakasagana.”
Lit., “digusenna ti lasagna.”
Mabalin a kaipapananna ti nadumaduma a kita ti panangpaidam iti bagi, a pakairamanan ti panagayunar.
Lit., “mapnonto ti imana.”