Levitico 10:1-20
10 Kalpasanna, innala dagiti annak ni Aaron a da Nadab ken Abihu+ ti pagikkanda iti insienso ket inikkanda iti beggang ken insienso.+ Nagidatagda ken Jehova iti maiparit a daton,*+ a saanna nga imbilin nga aramidenda.
2 Gapuna, adda apuy manipud ken Jehova a nanguram kadakuada,+ isu a natayda iti sanguanan ni Jehova.+
3 Kalpasanna, kinuna ni Moises ken ni Aaron: “Daytoy ti imbaga ni Jehova, ‘Masapul a tratuendak a nasantuan dagidiay umasideg kaniak,+ ket masapul nga idaydayawdak ti amin a tattao.’” Saan a nagun-uni ni Aaron.
4 Gapuna, inayaban ni Moises da Misael ken Elzafan nga annak ni Uziel+ nga angkel ni Aaron, ket kinunana: “Bagkatenyo dagiti kaanakanyo* iti nasantuan a disso ket iruaryo ida iti kampo.”
5 Immasidegda ket binagkatda dagiti bangkay a nakasuot iti opisial a bado sa impanda iti ruar ti kampo, kas imbilin ni Moises.
6 Kalpasanna, kinuna ni Moises ken ni Aaron ken kadagiti annakna a da Eleazar ken Itamar: “Diyo baybay-an a kusokuso ti buokyo wenno diyo pisangen dagiti badoyo,+ tapno saankayo a matay ken saan a makapungtot ti Dios iti intero nga Israel. Dagiti kabagianyo nga Israelita ti mangsangit kadagiti pinapatay ni Jehova iti apuy.
7 Dikay rummuar iti ruangan ti tolda a pagkonsultaan tapno saankay a matay, ta nabukbokankayo iti nasantuan a lana ni Jehova.”+ Gapuna, inaramidda ti imbaga ni Moises.
8 Kinuna ni Jehova ken ni Aaron:
9 “No sumrekka ken dagiti annakmo iti tolda a pagkonsultaan, dikay uminum iti arak wenno aniaman a naingel nga inumen+ tapno saankayo a matay. Daytoy a paglintegan ti masurot iti agnanayon,
10 tapno mapagduma ti nasantuan ken saan a nasantuan kasta met ti narugit ken nadalus.+
11 Rumbeng nga isuroyo kadagiti Israelita ti amin nga imbilin ni Jehova babaen ken Moises.”+
12 Kalpasanna, kinuna ni Moises ken ni Aaron ken kadagiti nabati nga annakna a da Eleazar ken Itamar: “Alaenyo ti natedda a daton a bukbukel a maidatag ken Jehova kas daton a mapuoran ket kanenyo iti asideg ti altar+ kas tinapay nga awan lebadurana, ta nasantuan unay+ dayta.
13 Masapul a kanenyo iti nasantuan a disso,+ ta dayta ti bingaymo agraman dagiti annakmo manipud iti daton a mapuoran para ken Jehova. Daytoy ti naibilin kaniak.
14 Sika ken dagiti annakmo a lallaki ken babbai+ kanenyonto ti barukong ti daton a mailili ken ti luppo ti sagrado a bingay+ iti nadalus a disso. Naited daytoy kenka ken kadagiti annakmo a lallaki kas bingayyo manipud kadagiti daton a pakikappia nga ipaay dagiti Israelita.
15 Iyegdanto ti luppo ti sagrado a bingay ken ti barukong ti daton a mailili agraman ti taba dagiti daton a mapuoran, tapno mailili iti sanguanan ni Jehova. Daytanto ti agnanayon a bingaymo ken dagiti annakmo,+ kas imbilin ni Jehova.”
16 Binirbirok ni Moises ti kalding ti daton gapu iti basol,+ ket nakitana a napuoranen dayta. Nakapungtot kada Eleazar ken Itamar a nabati nga annak ni Aaron, ket kinunana:
17 “Apay a diyo kinnan ti daton gapu iti basol iti nasantuan a disso,+ ta nasantuan unay dayta ken inted ti Dios kadakayo tapno maikkatyo ti basol dagiti Israelita ket maabbongan dayta iti sanguanan ni Jehova?
18 Gapu ta saan pay a naipan ti darana iti uneg ti nasantuan a disso,+ kinnanyo koma dayta sadiay, kas naibilin kaniak.”
19 Insungbat ni Aaron ken ni Moises: “Inted dagiti tattao ti datonda gapu iti basol ken ti datonda a mapuoran iti sanguanan ni Jehova,+ ngem diak makapangan kadagitoy a daton. Ammom ti napasamak kaniak ita nga aldaw. Maragsakan ngata ni Jehova no kinnanko ti daton gapu iti basol?”
20 Napnek ni Moises iti imbaga ni Aaron.
