Levitico 24:1-23

  • Lana para kadagiti lampara iti tabernakulo (1-4)

  • Pamarang a tinapay (5-9)

  • Maubor ti mangilunod iti nagan ti Dios (10-23)

24  Intuloy a kinuna ni Jehova ken ni Moises:  “Ibagam kadagiti Israelita a mangyegda kenka iti puro a lana ti nataltal nga olibo para kadagiti lampara, tapno saan a maiddep dagita.+  Masapul a rinabii a gangtan ni Aaron dagiti lampara ken siguraduenna a saan a maiddep dagita iti sanguanan ni Jehova agingga iti bigat, iti sango ti kortina a kaabay ti lakasa ti tulag, iti uneg ti tolda a pagkonsultaan. Daytoy ti agnanayon a paglintegan para iti amin a henerasionyo.  Kanayon nga isaganana dagiti lampara ti kandelero+ a puro a balitok iti sanguanan ni Jehova.  “Mangalaka iti napino nga arina ket manglutoka iti 12 a sinansingsing a tinapay. Dua nga apagkapullo ti maysa nga efa* ti arina ti mausar iti tunggal tinapay.  Urnosem dagita iti dua a bunton, nga innem a tinapay ti agtutuon iti tunggal bunton,+ sa iparabawmo iti lamisaan a puro a balitok iti sanguanan ni Jehova.+  Masapul a mangikabilka iti puro nga olibano iti rabaw ti tunggal katuon, ket agserbi dayta kas tinapay a simbolo ti daton*+ a mapuoran para ken Jehova.  Iti tunggal aldaw ti Sabbath, kanayon a maurnos dayta iti sanguanan ni Jehova.+ Daytoy ti agnanayon a tulag kadagiti Israelita.  Kukua daytoy ni Aaron ken dagiti annakna+ ket kanenda iti nasantuan a disso,+ gapu ta nasantuan unay daytoy para iti padi manipud iti daton a mapuoran para ken Jehova. Daytoy ti agnanayon a regulasion.” 10  Adda idi lalaki nga Israelita ti nanangna ken Egipcio ti tatangna.+ Nakiriri iti maysa nga Israelita a lalaki iti uneg ti kampo. 11  Ti lalaki nga Israelita ti nanangna pinagang-angawanna ti Nagan* ken inlunodna* dayta.+ Gapuna, impanda ken Moises.+ Ni Selomit ti nanangna, nga anak ni Dibri iti tribu ni Dan. 12  Impupokda daytoy a lalaki agingga a naammuanda ti desision ni Jehova.+ 13  Kalpasanna, kinuna ni Jehova ken ni Moises: 14  “Iruaryo iti kampo daydiay nangilunod iti naganko. Amin a nakangngeg iti imbagana iparabawda dagiti imada iti ulona ket masapul nga uboren dagiti umili a naguummong.+ 15  Ibagam kadagiti Israelita, ‘No adda mangilunod iti Dios, madusa gapu iti basolna. 16  Gapuna, amin a mangilunod iti nagan ni Jehova ket sigurado a mapapatay,+ Israelita man wenno ganggannaet a residente. Masapul nga uboren dagiti umili a naguummong. 17  “‘Sigurado a mapapatay ti asinoman a pumatay iti padana a tao.+ 18  Masapul nga agmulta ti asinoman a mangdangran ken mangpapatay iti taraken nga animal. Suktanna ti pinatayna.* 19  No dangran ti maysa a tao ti padana a tao, maibales kenkuana ti inaramidna.+ 20  Tulang iti tulang, mata iti mata, ngipen iti ngipen, maibales kenkuana ti mismo nga inaramidna.+ 21  Agmulta+ ti asinoman a mangdangran ken mangpapatay iti animal, ngem masapul a mapapatay ti asinoman a mangdangran ken mangpapatay iti padana a tao.+ 22  “‘Maymaysa a pangngeddeng ti surotenyo agraman dagiti ganggannaet a residente,+ ta siak ni Jehova a Diosyo.’” 23  Imbaga daytoy ni Moises kadagiti Israelita, ket inruarda iti kampo daydiay nangilunod iti nagan ti Dios sa inuborda.+ Gapuna, inaramid dagiti Israelita ti imbilin ni Jehova ken ni Moises.

Footnotes

Ti 2/10 ti 1 efa ket 4.4 L. Kitaem ti App. B14.
Wenno “kas pakalaglagipan (mangirepresentar) a paset dayta.”
Kayatna a sawen, ti nagan ni Jehova, kas naipakita iti ber. 15 ken 16.
Wenno “indawatna ti pagdaksan.”
Wenno “Biag ti kasukat ti biag.”