Levitico 19:1-37

  • Nadumaduma a linteg iti panagbalin a nasantuan (1-37)

    • Umiso a panagani (9, 10)

    • Konsiderasion kadagiti tuleng ken bulsek (14)

    • Pammadakes (16)

    • Di agipempen iti sakit ti nakem (18)

    • Maiparit ti panagsalamangka ken espiritismo (26, 31)

    • Maiparit ti tato (28)

    • Respetuen ti lakay ken baket (32)

    • Panangtrato kadagiti ganggannaet (33, 34)

19  Kinuna pay ni Jehova ken ni Moises:  “Ibagam iti amin nga Israelita, ‘Agbalinkayo a nasantuan, ta nasantuanak.+ Siak ni Jehova a Diosyo.  “‘Respetuenyo* ti ina ken amayo,+ ket masapul a ngilinenyo dagiti sabbathko.+ Siak ni Jehova a Diosyo.  Dikay agdayaw kadagiti awan serserbina a didiosen+ wenno mangaramid kadagiti didiosen a metal.+ Siak ni Jehova a Diosyo.  “‘No mangtedkayo ken Jehova iti daton a pakikappia,+ idatonyo dayta iti umiso a pamay-an tapno awatenna.+  Masapul a makan dayta iti aldaw a panangidatonyo ken iti sumaganad nga aldaw, ngem masapul a mapuoran ti matedda iti maikatlo nga aldaw.+  Ngem no makan dayta iti maikatlo nga aldaw, maibilangto a narugit ken saanto nga awaten ti Dios.  Madusa daydiay mangan iti dayta gapu iti basolna, ta rinugitanna ti nasantuan a banag a kukua ni Jehova, ket masapul a mapapatay.  “‘No aganikayo, diyo gapasen agingga iti igid ti talonyo ken diyo sublian dagiti malabsanyo.+ 10  Diyo met burasen dagiti natedda iti kaubasanyo wenno piduten dagiti natnag nga ubas iti kaubasanyo. Ibatiyo dagita para kadagiti napanglaw*+ ken ganggannaet a residente. Siak ni Jehova a Diosyo. 11  “‘Dikay agtakaw,+ dikay agsuitik,+ ken diyo allilawen ti asinoman. 12  Dikay agsapata iti naganko no agulbodkayo+ tapno saan a maibabain ti nagan ti Diosyo. Siak ni Jehova. 13  Diyo sauren wenno takawan+ ti padayo a tao.+ Diyo ipabigat ti sueldo ti matangtangdanan a trabahador.+ 14  “‘Diyo ilunod* ti tuleng wenno bangenan ti pagnaan ti bulsek,+ ket masapul nga agbutengkayo iti Diosyo.+ Siak ni Jehova. 15  “‘Masapul a patas ti panangukomyo. Diyo pabpaboran ti maysa gapu ta napanglaw wenno nabaknang.+ Ukomenyo ti padayo a tao maitunos iti kinahustisia. 16  “‘Diyo padpadaksen ti asinoman.+ Dikay pagpeggaden ti biag* ti padayo a tao* babaen ti panangpadakesyo kenkuana.+ Siak ni Jehova. 17  “‘Diyo guraen ti kabsatyo iti pusoyo.+ Ikagumaanyo a tubngaren ti padayo a tao,+ tapno saankayo a mairaman iti basolna. 18  “‘Dikay agibales+ wenno agipempen iti sakit ti nakem iti padayo a tao no di ket masapul nga ayatenyo a kas iti bagiyo.+ Siak ni Jehova. 19  “‘Masapul a tungpalenyo dagiti paglintegak: Diyo pagassawaen ti agduma a kita ti tarakenyo nga animal. Diyo mulaan ti talonyo iti dua a kita ti bin-i,+ ken dikay mangisuot iti bado a naaramid iti dua a kita ti sinulid.+ 20  “‘No makidenna ti maysa a lalaki iti adipen a babai a naitulagen iti sabali a lalaki, ngem saan pay a nasaka wenno nawayawayaan, masapul a madusada. Ngem saanda a mapapatay, ta saan pay a nawayawayaan ti babai. 21  Masapul nga iyegna ken Jehova ti daton gapu iti biddut, iti ruangan ti tolda a pagkonsultaan, maysa a kalakian a karnero.+ 22  Masapul nga idatag ti padi daytoy a karnero iti sanguanan ni Jehova kas daton gapu iti biddut tapno mapakawan ti basol ti lalaki. 23  “‘No sumrekkayo iti daga nga itedko kadakayo ket agmulakayo iti kayo a makan ti bungana, ibilangyo ti bungana kas narugit ken saan a makan.* Iti tallo a tawen, maiparitto* dayta kadakayo. Masapul a diyo kanen. 24  Ngem iti maikapat a tawen, agbalinto a nasantuan ti amin a bungana, ket tiemponto dayta iti panagragsak iti sanguanan ni Jehova.+ 25  Iti maikalima a tawen, mabalinyon a kanen ti bungana ken inayon iti apityo. Siak ni Jehova a Diosyo. 26  “‘Dikay mangan iti aniaman a karne nga adda darana.+ “‘Dikay agbirok kadagiti partaan wenno agsalamangka.+ 27  “‘Diyo kiskisan* ti patiliayo wenno dadaelen ti murdong ti barbasyo.+ 28  “‘Diyo sugatsugaten ti kudilyo gapu iti natay a tao,*+ ket dikay ikkan iti tato ti bagiyo. Siak ni Jehova. 29  “‘Diyo ibabain ti anakyo a babai babaen ti panangaramidyo kenkuana a balangkantis,+ tapno saan a marugitan ti dagayo iti panagbalangkantis ken mapno iti dakes nga aramid.+ 30  “‘Masapul a ngilinenyo dagiti sabbathko,+ ket raemenyo* ti santuariok. Siak ni Jehova. 31  “‘Dikay mapan kadagiti espiritista,+ ket dikay agkonsulta kadagiti mammadles+ tapno saankayo nga agbalin a narugit. Siak ni Jehova a Diosyo. 32  “‘Masapul a respetuenyo ti ubanan a tao,+ ket padayawanyo ti lakay,+ ken masapul nga agbutengkayo iti Diosyo.+ Siak ni Jehova. 33  “‘Diyo maltratuen ti ganggannaet a residente a makipagnaed iti dagayo.+ 34  Ibilangyo ida kas padayo nga Israelita;+ ket masapul nga ayatenyo ida kas iti bagiyo, ta ganggannaetkayo idi idiay Egipto.+ Siak ni Jehova a Diosyo. 35  “‘Dikay agusar iti nakusit a pagrukod, pagtimbang, wenno pagsukat.+ 36  Masapul nga agusarkayo iti umiso a pagrukod, umiso a pagtimbang, ken umiso a pagsukat.*+ Siak ni Jehova a Diosyo, a nangiruar kadakayo idiay Egipto. 37  Masapul ngarud a tungpalenyo ti amin a paglintegak ken ti amin a pangngeddengko, ket masapul a surotenyo dagitoy.+ Siak ni Jehova.’”

Footnotes

Lit., “Agbutengkayo.”
Wenno “marigrigat.”
Wenno “idawat ti pagdaksan.”
Lit., “dara.”
Wenno mabalin a, “Diyo buyaen lattan ti padayo a tao no agpeggad ti biagna.”
Lit., “kas iti ukisna.”
Lit., “saan a nakugit.”
Wenno “putdan; pukisan.”
Wenno “kararua.” Ti Hebreo a sao a neʹphesh a nausar ditoy ket tumukoy iti natay a tao.
Wenno “pagsiddaawanyo.” Lit., “pagbutnganyo.”
Lit., “umiso nga efa, ken umiso a hin.” Kitaem ti App. B14.