Levitico 3:1-17

  • Daton a pakikappia (1-17)

    • Dikay mangan iti taba wenno dara (17)

3  “‘No adda mangipaay ken Jehova iti baka kas daton a pakikappia,+ kalakian man wenno kabaian, masapul a nasalun-at.  Iparabawna ti imana iti ulo ti datonna, sa maparti iti ruangan ti tolda a pagkonsultaan; ket iwarsi dagiti papadi nga annak ni Aaron ti dara ti animal iti amin a sikigan ti altar.  Masapul nga idatagna ti dadduma a paset ti daton a pakikappia kas daton a mapuoran para ken Jehova:+ ti taba+ a nangbalkut kadagiti bagis, ti amin a taba a kimpet kadagiti bagis,  ken ti dua a bato agraman dagiti taba a kimpet kadagita iti asideg dagiti lomo. Ikkatenna met dagiti taba iti dalem agraman dagiti bato.+  Ipuor dayta dagiti annak ni Aaron iti rabaw ti apuy iti altar a maigiddan iti daton a mapuoran.+ Dayta ket daton a mapuoran, a makaay-ayo* ti banglona ken Jehova.+  “‘No karnero wenno kalding ti ipaayna ken Jehova kas daton a pakikappia, masapul a nasalun-at a kalakian wenno kabaian.+  No urbon a kalakian a karnero ti idatonna, ipaayna dayta iti sanguanan ni Jehova.  Iparabawna ti imana iti ulo ti datonna, ket maparti iti sango ti tolda a pagkonsultaan. Iwarsi dagiti annak ni Aaron ti dara ti animal iti amin a sikigan ti altar.  Masapul nga idatagna ti taba manipud iti daton a pakikappia kas daton a mapuoran para ken Jehova.+ Ikkatenna ti intero a nataba nga ipus iti asideg ti duri, ti taba a nangbalkut kadagiti bagis, ti amin a taba a kimpet kadagiti bagis, 10  ken ti dua a bato agraman dagiti taba a kimpet kadagita iti asideg dagiti lomo. Ikkatenna met dagiti taba iti dalem agraman dagiti bato.+ 11  Ipuor dayta ti padi iti rabaw ti altar kas taraon.* Daytoy ket daton a mapuoran para ken Jehova.+ 12  “‘No kalding ti idatonna, ipaayna dayta iti sanguanan ni Jehova. 13  Iparabawna ti imana iti ulo ti datonna, ket maparti iti sanguanan ti tolda a pagkonsultaan. Iwarsi dagiti annak ni Aaron ti dara ti animal iti amin a sikigan ti altar. 14  Ti paset nga idatagna ken Jehova kas daton a mapuoran ket ti taba a nangbalkut kadagiti bagis, ti amin a taba a kimpet kadagiti bagis,+ 15  ken ti dua a bato agraman dagiti taba a kimpet kadagita iti asideg dagiti lomo. Ikkatenna met dagiti taba iti dalem agraman dagiti bato. 16  Ipuor dagita ti padi iti rabaw ti altar kas taraon.* Daytoy ket daton a mapuoran a makaay-ayo* ti banglona. Kukua ni Jehova ti amin a taba.+ 17  “‘Saankayo a pulos mangan iti aniaman a taba wenno dara.+ Daytoy ti agnanayon a paglintegan para iti amin a henerasionyo, sadinoman ti pagnaedanyo.’”

Footnotes

Wenno “makapabang-ar.” Lit., “makapakalma.”
Lit., “tinapay,” kayatna a sawen, ti bingay ti Dios iti daton a pakikappia.
Lit., “tinapay,” kayatna a sawen, ti bingay ti Dios iti daton a pakikappia.
Wenno “makapabang-ar.” Lit., “makapakalma.”