Levitico 23:1-44

  • Dagiti nasantuan nga aldaw ken piesta (1-44)

    • Sabbath (3)

    • Paskua (4, 5)

    • Piesta ti Tinapay nga Awan Lebadurana (6-8)

    • Panangidaton kadagiti umuna a bungbunga (9-14)

    • Piesta Dagiti Lawas (15-21)

    • Umiso a panagani (22)

    • Piesta ti Pannakapuyot ti Trumpeta (23-25)

    • Aldaw ti Panangabbong (26-32)

    • Piesta ti Abong-abong (33-43)

23  Intuloy a kinuna ni Jehova ken ni Moises:  “Ibagam kadagiti Israelita, ‘Dagiti piesta+ nga imbilin ni Jehova nga aramidenyo+ ket nasantuan a panagtataripnong. Masapul nga ipakaammoyo dagitoy a piesta:  “‘Innem nga aldaw a mabalinyo ti agtrabaho, ngem iti maikapito nga aldaw, naan-anay nga aginanakayo ta sabbath dayta,+ maysa a nasantuan a panagtataripnong. Awan ti aramidenyo nga aniaman a trabaho. Sabbath dayta ken Jehova sadinoman ti pagnaedanyo.+  “‘Dagitoy ti piesta ni Jehova, dagiti nasantuan a panagtataripnong nga imbilinna nga aramiden ken ipakaammoyo:  Selebraranyo ti Paskua+ ni Jehova sakbay a sumipnget kalpasan a lumnek ti init,* iti maika-14 nga aldaw ti umuna a bulan.+  “‘Ti maika-15 nga aldaw daytoy a bulan ket Piesta ti Tinapay nga Awan Lebadurana para ken Jehova.+ Pito nga aldaw a masapul a mangankayo iti tinapay nga awan lebadurana.+  Iti umuna nga aldaw, mangaramidkayo iti nasantuan a panagtataripnong.+ Dikay agtrabaho iti nadagsen.  Ngem mangipaaykayo ken Jehova iti daton a mapuoran iti pito nga aldaw. Iti maikapito nga aldaw, mangaramidkayo iti nasantuan a panagtataripnong. Dikay agtrabaho iti nadagsen.’”  Intuloy a kinuna ni Jehova ken ni Moises: 10  “Ibagam kadagiti Israelita, ‘Inton makadanonkayo iti daga nga itedko kadakayo ket agapitkayo, masapul nga itedyo iti padi+ ti sangabettek ti umuna a bungbunga+ ti apityo. 11  Ingato ti padi ti binettek sa ililina iti sanguanan ni Jehova tapno awatenna dayta. Masapul nga ingato nga ilili dayta ti padi iti sumaruno nga aldaw kalpasan ti Sabbath. 12  Iti aldaw nga ililiyo ti binettek, masapul a mangidatagkayo iti nasalun-at a kalakian a karnero nga agarup maysa ti tawenna, kas daton a mapuoran para ken Jehova. 13  Ti daton a bukbukel ket dua nga apagkapullo ti maysa nga efa* a napino nga arina a nalaokan iti lana, kas daton a mapuoran para ken Jehova, a mangpataud iti makaay-ayo* a banglo. Ti daton nga inumen ket kakapat ti maysa a hin* nga arak. 14  Diyo kanen ti aniaman a tinapay, kinirog a bukel, wenno baro a bukel no saanyo pay a naidaton dayta iti Diosyo. Daytoy ti agnanayon a paglintegan para iti amin a henerasionyo, sadinoman ti pagnaedanyo. 15  “‘Mangbilangkayo iti pito a sabbath manipud iti aldaw kalpasan ti Sabbath, manipud iti aldaw nga inyegyo ti binettek kas daton a mailili.+ Masapul a kompleto dagita a lawas. 16  Mangbilangkayo iti 50 nga aldaw+ agingga iti aldaw kalpasan ti maikapito a Sabbath, ket idatonyo ti kaan-ani a bukbukel ken Jehova.+ 17  Mangyegkayo iti dua a tinapay manipud iti balayyo kas daton a mailili. Naaramid dagiti tinapay manipud iti dua nga apagkapullo ti maysa nga efa* a napino nga arina. Masapul a nalutoda nga adda lebadurana,+ kas umuna nga apit a trigo para ken Jehova.+ 18  Malaksid iti tinapay, mangidatagkayo iti pito a nasalun-at a kalakian a karnero nga agtawen iti maysa, ken maysa nga urbon a baka ken dua a kalakian a karnero.+ Maidatagda ken Jehova kas daton a mapuoran agraman ti daton a bukbukel ken ti daton nga inumen. Mapuoran dagitoy a daton a mangpataud iti makaay-ayo* a banglo ken Jehova. 19  Masapul a mangipaaykayo iti maysa nga urbon a kalding kas daton gapu iti basol+ ken dua a kalakian a karnero, nga agtawen iti maysa, kas daton a pakikappia.+ 20  Ingato nga ilili ti padi ti dua a kalakian a karnero agraman dagiti tinapay manipud iti umuna nga apit a trigo, kas daton a mailili iti sanguanan ni Jehova. Maidaton dagita ken Jehova kas nasantuan a banag ken kukua ti padi.+ 21  Ipakaammoyo+ iti dayta nga aldaw nga adda nasantuan a panagtataripnong. Dikay agtrabaho iti nadagsen. Daytoy ti agnanayon a paglintegan para iti amin a henerasionyo, sadinoman ti pagnaedanyo. 22  “‘No aganikayo, diyo apiten agingga iti igid ti talonyo ken diyo sublian dagiti malabsanyo.+ Ibatiyo dagita para kadagiti napanglaw*+ ken ganggannaet a residente.+ Siak ni Jehova a Diosyo.’” 23  Intuloy a kinuna ni Jehova ken ni Moises: 24  “Ibagam kadagiti Israelita, ‘Iti umuna nga aldaw ti maikapito a bulan, dikay agtrabaho. Maipakaammo daytoy nga aldaw babaen ti pannakapuyot ti trumpeta+ tapno malagipyo a maysa daytoy a nasantuan a panagtataripnong. 25  Dikay agtrabaho iti nadagsen, ken mangipaaykayo ken Jehova iti daton a mapuoran.’” 26  Kinuna pay ni Jehova ken ni Moises: 27  “Ngem ti maika-10 nga aldaw ti maikapito a bulan ket Aldaw ti Panangabbong.+ Masapul a mangaramidkayo iti nasantuan a panagtataripnong, ket parigatenyo ti bagiyo*+ ken mangipaaykayo ken Jehova iti daton a mapuoran. 28  Dikay agtrabaho iti aniaman ta aldaw dayta ti panangabbong tapno mapakawan ti basolyo+ iti sanguanan ni Jehova a Diosyo. 29  Mapapatay+ ti asinoman a saan nga agladingit* iti dayta nga aldaw. 30  Ken dadaelek ti asinoman nga agaramid iti aniaman a trabaho iti dayta nga aldaw. 31  Awan ti aramidenyo nga aniaman a trabaho. Daytoy ti agnanayon a paglintegan para iti amin a henerasionyo, sadinoman ti pagnaedanyo. 32  Sabbath dayta ti naan-anay a panaginana, ket agladingitkayo+ iti rabii ti maikasiam nga aldaw ti bulan. Masapul a ngilinenyo ti sabbath kalpasan a lumnek ti init agingga iti sumaruno nga ilelennek ti init.” 33  Intuloy a kinuna ni Jehova ken ni Moises: 34  “Ibagam kadagiti Israelita, ‘Ti maika-15 nga aldaw daytoy maikapito a bulan ket Piesta ti Abong-abong* para ken Jehova nga agpaut iti pito nga aldaw.+ 35  Adda nasantuan a panagtataripnong iti umuna nga aldaw, ket dikay agtrabaho iti nadagsen. 36  Pito nga aldaw a mangipaaykayo ken Jehova iti daton a mapuoran. Iti maikawalo nga aldaw, mangaramidkayo iti nasantuan a panagtataripnong,+ ken mangipaaykayo ken Jehova iti daton a mapuoran. Nasantuan nga asamblea dayta. Dikay agtrabaho iti nadagsen. 37  “‘Dagitoy ti piesta+ ni Jehova a masapul nga ipakaammoyo kas nasantuan a panagtataripnong+ para iti panangidatag iti daton ken Jehova: daton a mapuoran,+ daton a bukbukel+ a maidatag agraman ti maidaton nga animal, ken dagiti daton nga inumen+ sigun iti naikeddeng iti inaldaw. 38  Karaman dagitoy kadagiti maidaton kadagiti sabbath+ ni Jehova, ken kadagiti sagut,+ daton a pangtungpal iti kari,+ ken boluntario a daton,+ a masapul nga ipaayyo ken Jehova. 39  Ngem iti maika-15 nga aldaw ti maikapito a bulan, inton nalpasen ti panagapityo, masapul a selebraranyo ti piesta ni Jehova iti pito nga aldaw.+ Ti umuna nga aldaw ken ti maikawalo nga aldaw ket naan-anay a panaginana.+ 40  Iti umuna nga aldaw, mangalakayo kadagiti kasayaatan a bunga dagiti kayo, bulbulong ti palma,+ sanga dagiti nabulong a kayo ken alamo iti tanap,* ket agraragsakkayo+ iti sanguanan ni Jehova a Diosyo iti pito nga aldaw.+ 41  Tinawen a selebraranyo dayta iti pito nga aldaw kas piesta para ken Jehova.+ Selebraranyo dayta iti maikapito a bulan. Daytoy ti agnanayon a paglintegan para iti amin a henerasionyo. 42  Agnaedkayo kadagiti abong-abong iti pito nga aldaw.+ Masapul nga agnaed ti amin nga Israelita kadagiti abong-abong, 43  tapno maammuan dagiti sumaruno a henerasionyo+ a pinagnaedko dagiti Israelita kadagiti abong-abong idi inruarko ida idiay Egipto.+ Siak ni Jehova a Diosyo.’” 44  Iti kasta, imbaga ni Moises kadagiti Israelita ti maipapan kadagiti piesta ni Jehova.

Footnotes

Lit., “iti nagbaetan ti dua a rabii.”
Ti 2/10 ti 1 efa ket 4.4 L. Kitaem ti App. B14.
Wenno “makapabang-ar.” Lit., “makapakalma.”
Ti 1 hin ket 3.67 L. Kitaem ti App. B14.
Ti 2/10 ti 1 efa ket 4.4 L. Kitaem ti App. B14.
Wenno “makapabang-ar.” Lit., “makapakalma.”
Wenno “marigrigat.”
Mabalin a kaipapananna ti nadumaduma a kita ti panangpaidam iti bagi, a pakairamanan ti panagayunar.
Wenno mabalin a, “saan nga agayunar.”
Wenno “Kalapaw.”
Karayan a maaddaan laeng iti danum no panagtutudo.