Levitico 5:1-19

  • Espesipiko a basol ken dagiti maidaton (1-6)

    • Ipulong dagiti basol ti sabsabali (1)

  • Dagiti mabalin nga idaton dagiti napanglaw (7-13)

  • Daton gapu iti biddut para iti di inggagara a basol (14-19)

5  “‘No adda nakasaksi wenno nakakita wenno nakaammo iti maysa a basol ngem saanna nga impulong uray no nangngegna ti panawagan a panagtestigo,*+ maibilang a nakabasol. Madusanto gapu iti biddutna.  “‘Wenno no adda nakasagid iti narugit a banag, bangkay man ti narugit nga atap nga animal, narugit a naamo nga animal, wenno narugit nga agkarkarayam a parsua,+ uray saanna nga inggagara, maibilang a narugit ken nakabasol.  Wenno no adda nakasagid iti aniaman a narugit a mamagbalin kenkuana a narugit+ ngem saanna nga ammo, maibilang a nakabasol apaman a maammuanna dayta.  “‘Wenno no adda sidadarasudos nga agkari a mangaramid iti aniaman a banag—naimbag man wenno dakes—ket saanna nga ammo, maibilang a nakabasol apaman a mabigbigna dayta.*+  “‘No adda nakabasol iti aniaman kadagitoy, masapul nga ipudnona+ no kasano a nagbasol.  Mangted met ken Jehova iti daton gapu iti biddut para iti basol nga inaramidna,+ maysa a kabaian a karnero wenno kabaian nga urbon a kalding kas daton gapu iti basol. Idatag dayta ti padi kas pangabbong iti basol dayta a tao.  “‘No saanna a kabaelan ti maysa a karnero, mangted ken Jehova iti dua a pagaw wenno dua a sibong ti atap a kalapati+ kas daton gapu iti biddut. Ti maysa ket daton gapu iti basol ken ti maysa ket daton a mapuoran.+  Ipanna dagita iti padi, ket idatag nga umuna ti padi ti daton gapu iti basol ken tukkolenna ti tengnged ti billit ngem saanna nga isina ti ulona.  Iwarsina ti dadduma a dara ti daton gapu iti basol iti sikigan ti altar, ngem ti matedda a dara ket maibukbok iti baba ti altar.+ Daytoy ket daton gapu iti basol. 10  Idaton ti padi ti maysa pay a billit kas daton a mapuoran maitunos iti naibilin.+ Idatag dayta ti padi kas pangabbong iti basol tapno mapakawan dayta a tao.+ 11  “‘No saanna a kabaelan ti dua a pagaw wenno dua a sibong ti atap a kalapati, masapul a mangted iti apagkapullo ti maysa nga efa*+ ti napino nga arina kas daton gapu iti basol. Saanna nga ikkan iti lana wenno olibano ta daton dayta gapu iti basol. 12  Ipanna dayta iti padi, ket mangrakem ti padi iti napino nga arina kas simbolo ti daton* daydiay nakabasol. Puoranna dayta iti rabaw ti altar a maigiddan kadagiti daton a mapuoran para ken Jehova. Daytoy ket daton gapu iti basol. 13  Idatag dayta ti padi kas pangabbong iti aniaman kadagitoy a basol a naaramidanna tapno mapakawan.+ Kukua ti padi+ ti natedda nga arina a kas met laeng iti daton a bukbukel.’”+ 14  Kinuna pay ni Jehova ken ni Moises: 15  “No adda nakabasol gapu ta sinukirna ti linteg mainaig kadagiti nasantuan a banag ni Jehova,+ ngem saanna nga inggagara, masapul a mangted ken Jehova iti nasalun-at a kalakian a karnero kas daton gapu iti biddut;+ maikeddeng ti gatad ti karnero iti siklo* a pirak sigun iti siklo a maus-usar iti nasantuan a disso.*+ 16  Bayadanna dayta a gatad tapno mapakawan ti basolna iti nasantuan a disso, ken nayonanna pay iti 20 a porsiento dayta a gatad.+ Itedna dayta iti padi, sa idatag ti padi kas pangabbong+ iti basol agraman ti kalakian a karnero kas daton gapu iti biddut, ket mapakawan ti basolna.+ 17  “No adda nakabasol gapu ta sinukirna ti imbilin ni Jehova, uray saanna nga ammo, maibilang a nakabasol ken madusanto gapu iti biddutna.+ 18  Masapul a mangted iti padi iti nasalun-at a kalakian a karnero, sigun iti gatad nga ikeddeng ti padi, kas daton gapu iti biddut.+ Idaton dayta ti padi kas pangabbong iti di inggagara a basol tapno mapakawan. 19  Dayta ket daton gapu iti biddut. Sigurado a nakabasol ken Jehova.”

Footnotes

Lit., “panagilunod (panagsapata).” Nalabit pakaammo maipapan iti maysa a dakes nga aramid a pakairamanan ti panangilunod iti nakabasol wenno iti nakasaksi no saan nga agtestigo.
Agparang a dina tungpalen ti sapatana.
Ti 1/10 ti 1 efa ket 2.2 L. Kitaem ti App. B14.
Wenno “kas pakalaglagipan (mangirepresentar) a paset dayta.”
Ti 1 siklo ket 11.4 g. Kitaem ti App. B14.
Wenno “sigun iti nasantuan a siklo.”